6
ዳርዮሳ አዋጁዋ
1 ሄሳ ግሾ፥ ካዎይ ዳርዮሳ ኪታን፥ ባብሎነ ደእያ ሚሸ ዎꬅያ ኬꬃን ደእያ ታርከ ማዝጋበታ ኮይዶሶና።
2 ሜዶና አዉራጃን አህማታ ካታማን እስ ፃꬃ ማፃፍ በንትስ፤ ሄ ማፃፋን ፃፈትዳባይ ሀይሳዳ ያጌስ፦
3 “ካዎይ ቅሮስ ባ ካዎትዳ ኮይሮ ላይꬃን፥ የሩሳላመን ደእያ ፆሳ ኬꬃ ግሾ፥ ሀይሳዳ ግያ አዋጆ ከስስ። ፆሳ ኬꬃይ ያርሾ ሺሽያ በሲ ግድድ ዛር ኬፀቶ፤ እያ ባሶይካ የገቶ። ሄ ኬꬃ አዱሳተꬃይ ኡሱፑን ታሙ ዋꬋ፥ ዳልጋተꬃይ ኡሱፑን ታሙ ዋꬋ ግዶ።
4 ሄꬑ ቶሆ ግታ ሹቻን ዩሾ፥ እስ ቶሆ ምꬃ ቱሳት ዩዮ። ሄሳስ ኮሽያ ሚሸ ኡባይ ካዎ ሻሎ ምንጅያ ኬꬃፈ እመቶ።
5 ናቡካዳናፆር የሩሳላመን ደእያ ፆሳ ኬꬃፈ ኤክድ፥ ባብሎነ ኤህዳ ፆሳ ኬꬃ ዎርቃነ ብራ ሚሸት ባንታ በሳ ጉየ የሩሳላመ ስሚድ፤ ፆሳ ኬꬃን ደኦ” ያግስ።
6 ሄሳፈ ጉየ፥ ዳርዮስ ፃፍዳ ዳብዳበይ ሀይሳዳ ያጌስ። “ህንተኖ ኤፍራፂሳ ሻፋፐ ሄፍንꬃ ቢታ አይስያ ታታናያ፥ ሳታርቦዝንያነ ኤንታራ ኦይሳቶ፥ ሀ ፆሳ ኬꬃኮ ሺቆፕተ።
7 ሀ ፆሳ ኬꬃ ኦሱዋስ ꬉበ ግዶፕተ። አይሁደታ ሀላቃትነ አይሁደ ጭማት ፆሳ ኬꬃ ካሰ በሳን ዛሪድ ኬፆ።”
8 ሄሳ ቦላ ቃስ፥ “ሀ አይሁደ ጭማት ፆሳ ኬꬃ ኬፅያ ዎደ፥ ኤንቲ ኦꬅያ ኦሶይ ኤቆና መላ ኤንታዉ ኮሽያ ሚሸ ኡባ ኤፍራፂሳ ሻፋፐ ሄፍንꬃ ቢታፈ ሺሽዳ ካዋ ጊራ ሚሽያፐ ኤንታዉ እማና መላ ታኒ ኪታስ።
9 የሩሳላመን ደእያ ካህነት ሳሎ ፆሳስ ፁሳ ያርሾ ያርሻናዉ ኮሽያ ዎፋኖ ግድን፥ ማራዘ ግድን ዎይኮ ዶርሳ ኡርገ ግድን ኤንታዉ እምተ። ቃስ አይባካ ፓጭሶና ኤንቲ ኮይያ ግስተ፥ ማፅነ፥ ዎይነነ ዛይተ ኤንታዉ ጋላስ ጋላስ እምተ።
10 ሄሳ ህንተ እመይ ኤንቲ ሳሎ ፆሳ ኡፋይስያ ያርሾ ያርሻናሳነ ካዋስነ እያ ናይታስ ዎሳናሳ።
11 ሀ አዋጁዋ ላምያ ኦንካ ደእኮ፥ እያ ኬꬃ ቱሳ ሾድድ፥ ሄ ቱሳ ቦላ እያ ካቆ፤ እያ ኬꬃይካ ፕቶ የግያ በሰ ግዶ።
12 ሀ ኪታ ላማናዉ ዎይኮ የሩሳላመን ደእያ ፆሳ ኬꬃ ላላናዉ ኩሸ ደንꬅያ አይ ካዎይ ዎይኮ አስ ግድን፥ ባ ሱንꬃይ ፄገታና መላ የሩሳላመ ዶርዳ ፆሳይ እያ ꬋይሶ። ታኒ ዳርዮስ ሀይሳ ኪታስ። ሀ ኡባይ ምኖተꬃን ፖለቶ” ያግስ።
ፆሳ ኬꬅ አንጅሶ ባኣለ
13 ሄሳፈ ጉየ፥ ኤፍራፂሳ ሻፋፐ ሄፍንꬃ ቢታ አይስያ ታታናያ፥ ሳታርቡዛንነ ኤንታራ ኦꬅያ ኡባይ ካዎይ ዳርዮስ ኪትዳይሳዳ ምኖተꬃን ኦꬅድ ፖልዶሶና።
14 አይሁደ ጭማት ባንታ ኦሱዋ አጎና ኦꬅዶሶና፤ ቃስ ናበይ ሀገይነ እዶ ናአይ ዛካርያስ ኦድዳ ቃላን ምነትዶሶና። እስራኤለ ፆሳይ ኪትዳይሳዳ ፋርሰ ካዎት ቅሮስ፥ ዳርዮስነ አርፀክስስ አዋጅዳይሳዳ ፆሳ ኬꬃ ኬፅድ ዉርስዶሶና።
15 ዳርዮስ ካዎትዳ ኡሱፑንꬆ ላይꬃን አዳረ ጌተትያ አጌናን ሄꬓንꬆ ጋላሳን፥ ፆሳ ኬꬃ ኦሶይ ፖለትስ።
16 እስራኤለ አሳይ፥ ካህነት፥ ሌወትነ ድኦፐ ስምዳ አሳ ኡባይ ፆሳ ኬꬃ አንጅስያ ባኣለ ኡፋይሳን ቦንችዶሶና።
17 ሄ ባለይ ቦንቸትያ ዎደ ኤንቲ እስ ፄቱ ኮርማ፥ ናምኡ ፄቱ ማራዘ፥ ኦይዱ ፄቱ ዶርሳ ኡርገታ ያርሽዶሶና። ቃስ ናጋራ ያርሾስ ታማነ ናምኡ እስራኤለ ኮቻታ ታይቦን ታማነ ናምኡ ኮለ ያርሽዶሶና።
18 ሙሰ ማፃፋን ፃፈትዳይሳዳ፥ የሩሳላመን ደእያ ፆሳ ኬꬃን ኦꬃና መላ ካህነትነ ሌወት ኤንታ ማራዳ ማራዳ ዎꬅዶሶና።
ፓስካ ባኣለ
19 ድኦፐ ስምዳ አሳይ ኮይሮ አጌናን ታማነ ኦይዳንꬆ ጋላስ ፓስካ ባኣለ ቦንችዶሶና።
20 ካህነትነ ሌወት ባንታና ጌሽዶሶና፤ ኤንቲ ኡባይ ዎጋዳ ጌይዶሶና። ሌወት ድኦፐ ስምዳ ኡባስ፥ ካህነታስነ ባንታዉ ፓስካ ዶርሰ ሹክዶሶና።
21 ድኦፐ ስምዳ እስራኤለ አሳይነ አይሁደ ግዶና አሳይ ኦꬅያ ቱናተꬃፈ ባንታና ሻክድ፥ ጎዳኮ፥ እስራኤለ ፆሳኮ ስምዳ አሳ ኡባይ ፓስካ ምዶሶና።
22 ጎዳይ አሶረ ካዋ ቆፋ ላምድ እስራኤለ ጎዳ፥ ፆሳ ኬꬃ ኬፅድ ፖላና መላ ማድዳ ግሾ፥ ኤንቲ ላፑን ጋላስ ኡይꬃ ባኣለ ኡፋይሳን ቦንችዶሶና።