አስትር ማፃፋ
ጋꬃ ቆፋ
አስትር ማፃፋን ፃፈትዳ ታርከት ፖለትዳይ፥ ፋርሰ ካዎይ፥ ሱሳ ካታማን ባ ካዎ ጋꬎን ደእሽና። ሄ ማፃፋይ ናምኡ ግታ ቆፋታ ኦይክስ፤
1. ባ ፃላተꬃንነ ባ አሳስ ደእያ ግታ ምሻን፥ ሞርከት ኤንታ ꬋይሳና ሀንያ ዎደ ባ አሳ አሽዳ፥ አስትሮ ጌተትያ አይሁደ ማጫሰ ታርከ ኦዴስ።
2. አይሁደት ቦንችያ፥ ፑርማ ጌተትያ ባለይ ቦንቸትያ ጋሱዋ ቆንጭሴስ።
አስትር ማፃፋን ዳሮ ቆንጭድ ኤረትዳ እቻሹ አሳት ደኦሶና። ኤንትካ፥ (1) ፋርሰ ካዋ አርፀክስሳ፤ (2) እያ ሹማ ሃማ፤ (3) ጎዳትዉ አስፂኖ፤ (4) አይሁደ ማጫስዉ አስትሮ፤ (5) አስትር አዋ እሻ ማርድክዮሳ።
ሀ ማፃፋን ፆሳ ሱንꬅ ፄገቶና እፅኮካ፥ እያ ኦሶይ፥ ማሮተꬃይ፥ እያ ኬሀተꬃይነ ሲቆይ ቆንጭዳ ማፃፋ።
ማፃፋ አይፈ ቆፋታ
አስትራ ካዎ ማቾ ግዳሱ (1:1—2:23)
ሃም አይሁደ ꬋይሳናዉ ቆፕስ (3:1-15)
ማርድክዮስ አስትሮ ማደ ኦይችስ (4:1-17)
ማርድክዮስ ደምዳ ቦንቹዋ (5:1—6:14)
ሃማ ቦላ ሀይቆ ፕርዳ (7:1-10)
አይሁደት ባንታ ሞርከታ ꬋይሱዋ (8:1—9:19)
ፑርማ ባኣለ ቦንቹዋ (9:20-32)
አርፀክስሳነ ማርድክዮሳ ሹማተꬃ (10:1-3)
1
ካዋ ግብራ
1 ካዎይ አርፀክስስ ህንደ ቢታፈ ቶጰ ቢታ ጋካናዉ ደእያ፥ ፄታነ ላታማነ ላፑን ቢታ አይስያ ዎደ ሀንዳባ።
2 ካዎይ ባ አራታን ኡትድ አይስያ ዋና ካታማይ ሱሳ ጌተቴስ።
3 እ ካዎትዳ ሄꬓንꬆ ላይꬃን፥ ባፐ ጋርሳራ ዳይናታስነ ቢታ አይሰይሳታስ ግታ ግብራ ጊግስስ። ሄ ግብራ በሳን ሜዶናነ ፋርሰ ቶራ ሞጮናት፥ ቢታ ሃረይሳትነ አይሰይሳት በንትዶሶና።
4 ካዎይ እስ ፄታነ ሆስፑን ታሙ ጋላስ ኩመꬅ ባ ካዎተꬃ ዱረተꬃነ ባ ያሽያ ቦንቹዋ ኡባ ኤንታ በስስ።
5 ሄ ጋላሳታፐ ጉየ፥ ካዎይ ቃስ ሀራ ላፑን ጋላስ ጋምእያ ግብራ፥ ሱሳ ካታማን፥ ዱረፐ ማንቆ ጋካናዉ ደእያ አሳ ኡባስ ጊግስስ። ሄ ግብራይ ካዎ ጋꬎይ ደእያ አታክልተ በሳን ጊግስ።
6 ሄ በሳን ደእያ ዳባባይ፥ ሊኖፐ ኦሰትዳ ቦꬅነ ካሎሰ ገሸታን አሌቅስ። ገሸት ኦቻ ቴራ ዳንያ አልኦ ሊኖ ክረን አꬅን፥ እብነባራደ ጌተትያ ሹቻፈ ኦሰትዳ ቱቅያ ቦላ ደእያ ብራ ምግዶታን ካቀትድ ኡትዶሶና። ቃስ ዎርቃፈነ ብራፐ ኦሰትዳ አርሳት፥ ዱማ ዱማ ማል ደእያ አልኦ ሹቻታፐ ኦሰትዳ ባሱዋን ማራን የገትዶሶና።
7 እሶይ እሱዋፈ ዱማ ግድዳ ዎርቃ ቡርጩኮን ዎይነ ኡሽ አሳ ኡባስ እመትስ። ካዎይ ዳሮ ኬሀ ግድዳ ግሾ፥ ዎይነ ኡሻስ ዛው ባዋ።
8 እስ እስ አስ ባ ኮይዳ መላ ኡዬስ፤ ሄሳ ካዎይ ኮይሮትድ ባ አይለታስ ኦድስ።
9 ሄ ዎደ ካውያ አስፂና ማጫሳ ኡባስ ግብራ ካዎ ጋꬎን ጊግሳሱ።
10 ግብራይ ዶመትዳ ላፑንꬃ ጋላስ፥ ካዎይ አርፀክስስ ዎይነ ኡሻ አልድ ኡፋይትዳ ዎደ፥ ባ አይለታ መሁማና፥ ብዝታ፥ ሀርቦና፥ ብግታ፥ አባግታ፥ ዛታራነ ካርካሳ ጌተትያ ላፑን ሹፋታ ፄግድ፥
11 “ካውዉ አስፂኖ ካዎተꬃ ካላቻ ዎꬅድ ሃ ኤክድ ዪተ” ያግድ ኪትስ። እያ ዳሮ ማላ ሎኦ ግድያ ግሾ፥ ሀላቃትነ አሳ ኡባይ እዮ በአና መላ ካዎይ ኮይስ።
12 ሽን ካዋ ኪታ እዉ ኦድን፥ ካውያ አስፂና ካዋ ስን ዮና እፃሱ። ሄስ ካዋ ዳሮ ሀንቀꬅስ።
13 ሄ ቢታ ህግያነ ደኦ ዎጋ ኤርያ አሳ ዞረ ኦይሾይ ካዋ ማታን ሜዘትዳባ ግድያ ግሾ፥ ዎድያባ ሻክድ ኤርያ ጭንጫ አሳታራ ኦደትስ።
14 ካዎይ ግታ ማት ደእያ ላፑን ፋርሰነ ሜዶና ሹማታ፥ አርቀስዮሳ፥ ሸታራ፥ አድማታ፥ ታርሸሻ፥ ማሬሳ፥ ማርሳናነ መሙካና ፄግስስ።
15 ካዎይ ኤንታ፥ “ታኒ፥ ካዎይ አርፀክስስ፥ ታ ሹፋታ ኪትን፥ ካውያ አስፂና ታ ኪታ ፖሎና እፃሱ። ሄሳ ግሾ፥ ህገይ ኦድያ ማራን እዮ ዋታናዉ በሲ?” ያግድ ኦይችስ።
16 ኤንታፈ እሶይ፥ መሙካን ካዋ ስንꬃንነ ሀላቃታ ስንꬃን ሀይሳዳ ያግስ፤ “ካውያ አስፂና ካዋ ፃላላ ግዶናሽን፥ እያ ሀላቃታ ኡባነ እያ ካዎተꬃ ግዶን ደእያ አሳ ኡባ ናቃሱ።
17 ሀ ካዎተꬃ ግዶን ደእያ ማጫስ ኡባይ ካውያ አስፂና ኦꬅዳይሳ ስእድ፥ ባንታ አዝናታ ካꬎ ዶማና። ኤንቲ፥ ‘ካዎይ አርፀክስስ ባኮ ያና መላ ፄግስን፥ ካውያ አስፂና እፃበከዬ?’ ያጋና።
18 ሄሳ ፃላላ ግዶናሽን፥ ፋርሰነ ሜዶና ሀላቃታ ማጫሳይ ሄሳ ስእዳ ዎደ፥ ሀች አው ዉላና ጋካናዉ ባንታ አዝናታ ሄሳዳ ግድ ካꬋና። ሄሳ ጋሶን ማቸታ ግዶንነ አዝናታ ግዶን ኦሽ ከያና።
19 ሄሳ ግሾ ካዋዉ፥ ኔኒ ዶስኮ፥ ካውያ አስፂና ናምአንꬆ ነ ስን አꬎና መላ ተቅያ አዋጆ ከሳ። ሄ አዋጆይ ናምአንꬆ ላመቶና መላ ፋርሰነ ሜዶና ህግያ ግዶን ፃፈቶ። ሄሳፈ ጉየ፥ ካዎተꬃ ቦንቹዋ ኢፐ ኤካዳ ሀራ ሎኦ ማጫሳስ እማ።
20 ሀ ኔኒ አꬅዳ አዋጆይ ሀ ግታ ካዎተꬃ ኡባን ኦደትያ ዎደ እስ እስ ማጫስ ዱረ ግድን ማንቆ ግድን፥ ሻኮና ባ አዝና ቦንቻና” ያግስ።
21 ካዎይነ እያ ሀላቃት ሀ ዞርያን ኡፋይትዶሶና። ሄሳ ግሾ፥ መሙካን ግዳይሳዳ ካዎይ ኦꬅስ።
22 እ ባ ካዎተꬃ ግዶን ደእያ ዱማ ዱማ ቢታታስ ኤንታ ፕዳለንነ ኤንታ ዶናን ፃፍድ፥ ዳብዳበ የድስ። ሄ አዋጆይ፥ እስ እስ አዝን ባ ኬꬃ ኬꬃ አይስያ ሀላቃ ግደይሳ ኦዴስ።