5
አስትራ ካዋ ኦይቻሱ
1 ፆማይ ዶመትን ሄꬓንꬆ ጋላስ አስትራ ካዎተꬃ ማኦ ማአዳ፥ ካዎ ጋꬎን ግዶ ዳባባ ገላዳ ኤቃሱ። ካዎይ ካዎ ኬꬅ ገልያ ፐንግያን ደእያ ባ አራታን ኡትስ።
2 አስትራ ገላዳ፥ ግዶ ዳባባን ኤቅዳሮ ካዎይ በእድ እን ኡፋይትዳ ግሾ፥ ባ ዎርቃ ፃምኣ ኢኮ ምጭስ። እያ ሺቃዳ ፃምኣ ፄራ ቦቻሱ።
3 ካዎይ ኢኮ፥ “ካወ አስትረ፥ ኔኒ ታኮ አይስ ያዲ? ቃስ ኔኒ ታና ኦይችያባይ አይቤ? ሀር አቶሽን ታ ካዎተꬃፈ ባጋ ግድኮካ፥ ታ ነዉ እማና” ያግስ።
4 አስትራ ዛራዳ፥ “ካዋዉ፥ ነና ኡፋይስያባ ግድኮ፥ ታኒ ነዉ ጊግስዳ ግብራ ማናዉ ኔራ ሃማራ ናምአይ ሀች ኦማርስ ያኮ ዶሳይስ” ያጋሱ።
5 ሄሳፈ ጉየ ካዎይ፥ “ኑኒ አስትራ ጊግስዳ ግብራስ ባናዉ ሃማ ኤለስድ ኤህተ” ያግስ። ሄሳ ግሾ ናምአይ ሄ በሳ ብዶሶና።
6 ኤንቲ እስፈ ዎይነ ኡሻ ኡይሽን፥ ካዎይ ናምአንꬆ አስትሮ፥ “ኔኒ ታና ዎስያባይ አይቤ? ታኒ ነዉ እማና። ቃስ ኔኒ ታና ኦይችያባይ አይቤ? ሀር አቶሽን ታ ካዎተꬃፈ ባጋ ግድኮካ፥ ታ ነ ኦይሻ ፖላና” ያግስ።
7 አስትራ ዛራዳ ታ ኦይቸይነ ታ ዎሰይ ሀይሳ፤
8 “ካዋዉ፥ ኔኒ ታናን ኡፋይትያባ ግድኮ፥ ቃስ ታኒ ዎስያባ እማናዉነ ታ ኦይሻ ፖላናዉ ኔኒ ዶስያባ ግድኮ፥ ዎንቶ ታ ጊግስያ ሀራ ግብራስ ኔራ ሃማራ ያና መላ ኦይቻይስ። ታኒ አይ ኮያኮ ሄ ዎደ ነዉ ቆንጭሳና” ያጋሱ።
ሃም ማርድክዮሳ ዎꬍሳናዉ ማቅስ
9 ሃም ግብራ በሳፈ ከይድ ብያ ዎደ፥ ዳሮ ኡፋይትዳ ግሾ፥ ባ ዎዛናን ኡፋይስ ኖጩ ግሸ ብስ። ሽን እ ካዎ ኬꬅ ገልያ ፐንግያ ማታራ አꬍድ ብያ ዎደ ያን ኡትዳ ማርድክዮሳ በእስ። እያዉ ደንድቦናይሳነ ያይድ ኮኮርቦናይሳ በእድ ሃም ይሎ ኤፅስ።
10 ግዶሽን፥ ባ ይሉዋ ዳንዳእድ ብድ ባ ሶ ጋክስ።
ሄሳፈ ጉየ፥ ባ ላገታነ ባ ማችዉ ዞሳራ ፄግስድ፥
11 ሃም ባ ዱረተꬃ ልክያ፥ ባ አደ ናይታ ታይቡዋ፥ ካዎይ ባና ቦንችዳ ቦንቹዋነ ሀራ ሀላቃታፐነ ካዎ ሞርናታፐ አꬍያ ሹማተꬅ እምድ፥ ዋትድ እያ ቦንችዳኮ ናሸትስ።
12 ጉጅድካ ሃም፥ “ሀር አቶሽን ካውያ አስትራካ ባ ጊግስዳ ግብራስ ካዉዋራ ባና መላ ታፐ አትሽን፥ ሀራ ኦናካ ፄጋቡኩ። ቃስ ዎንቶካ ካዉዋራ ባና መላ ታና ፄጋሱ።
13 ሽን አይሁደ ግድዳ ማርድክዮስ ካዎ ኬꬅ ገልያ ፐንገን ኡትዳይሳ በእያ ዎደ ሀ ኡባይካ ታና ኡፋይሰና” ያግስ።
14 ሄ ዎደ እያ ማችያ ዞሳራነ እያ ላገት ኡባይ ሀይሳዳ ያግዶሶና፤ “ኔኒ እሻታሙ ዋꬋ ምꬅ ኤስሳዳ ዎንቶ ጉራ ማርድክዮስ ካቀታና መላ ካዋ ኦይቻ። ሄሳፈ ጉየ፥ ኡፋይታሸ ግብራ ማናዉ ባ” ያግዶሶና። ሃማ ሀ ቆፋይ ኡፋይስዳ ግሾ፥ ኤንቲ ግዳይሳዳ ካቃ ምꬅ ጊግስስ።