10
ቦለ ጋዶ
1 ሄሳፈ ጉየ፥ ጎዳይ ሙሰኮ፥ “ግብፀ ካዋኮ ባ። ታኒ ሀ ማላታታ ኤንታ ግዶን ኦꬃናዉ ኮያዳ ካዉዋ ዎዛናነ እያ ሞርናታ ዎዛና ሙምሳስ።
2 ታኒ ሄሳ ኦꬅዳይ ታ ማላታታን ዋታዳ ግብፀታ ሴርዳኮ ህንተ ህንተ ናይታስነ ህንተ ናይታ ናይታስ ኦዳና መላ ኮይዳ ግሾሳ። ሄ ዎደ ታኒ ጎዳ ግደይሳ ህንተ ኤራና” ያግስ።
3 ሙሰይነ አሮን ካዋኮ ብድ፥ “ጎዳይ፥ እብራወታ ፆሳይ ኔኮ፥ ‘ኔኒ ታዉ ኪተተꬅ እፀይ አዉደ ጋካናሴ? ታዉ ጎይናና መላ ታ አሳ የዳ።
4 ኔኒ ኤንታ የዶ እፅኮ፥ ዎንቶ ነ ቢታ ቦላ ታኒ ቦለ የዳና።
5 ቦለይ ዳሮተꬃፈ ደንዶይሳን ቢታ ኡባ ካማና። ኤንቲ ሻቻ ጋዱዋፐ አትዳ ጉꬃባነ ምꬃ ሀይꬅ ኡባ ማና።
6 ነ ኬꬃ፥ ነ ሞርናታ ኬꬃነ ግብፀ አሳ ኡባ ኬꬃ ኤንቲ ኩማና። ሄስ ነ ማይዛት ሀ ቢታን ደኦሳፐ ሀኖ ጋካናዉ በእዳ ኢታባፐ አꬍያባ ግዳና’ ያጌስ” ያግዶሶና።
ሄሳፈ ጉየ፥ ሙሰይ ካዉዋ ስንꬃፈ ከይድ ብስ።
7 ካዋ ሞርናት ካዋኮ፥ “ሀ ኡራይ አዉደ ጋካናዉ ኑስ ፅሄ ግዳኔ? አሳይ ጎዳ፥ ባንታ ፆሳ ጎይናና መላ ኤንታ የዳ። ግብፀ ቢታይ ꬋየይሳ ኔኒ አኬክኪ?” ያግዶሶና።
8 ካዎይ ሙሰነ አሮና ጉየ ፄግስድ፥ “ብድ ጎዳ፥ ህንተ ፆሳ ጎይንተ፥ ሽን በይሳት ኦናንቴ?” ያግስ።
9 ሙሰይ፥ “ኑኒ ብያ በሳን ጎዳ ቦንቻናዉ ባኣለ ኦꬃና ግሾ፥ ኑኒ ኑ ጉꬃ ናይታ፥ ኑ ጭማታ፥ ኑ አደ ናይታ፥ ኑ ማጫ ናይታ፥ ኑ ዶርሳታነ ኑ ሚዛታ ኤክድ እስፈ ባና” ያግስ።
10 ካዎይ፥ “ህንተ ህንተ ናይታነ ህንተ ማጫሳታ ኤክ ቦና መላ ታኒ ጎዳን ጫቅሳይስ። ህንተ ህንተ ዎዛናን ኢታባ ቆፕዳይስ ኤረቴስ።
11 ህንተ፥ ብድ ጎዳ ጎይናናዉ ኮያባ ግድኮ አደታ ፃላላ ኤክ ቢተ” ያግስ። ሄሳፈ ጉየ፥ ሙሰነ አሮና ካዉዋ ስንꬃፈ ጎደትድ ከይዶሶና።
12 ጎዳይ ሙሰኮ፥ “ቦለይ ይድ ሻቻ ጋዱዋፐ አትዳ ኡባ ማና መላ ነ ኩሽያ ግብፀ ቢታ ቦላ ደንꬃ” ያግስ።
13 ሙሰይ ባ ፃምኣ ግብፀ ቢታ ቦላ ደንꬅዳ ዎደ፥ ጎዳይ ዶሎሀ ባጋ ጫርኮ ሄ ቃማነ ጋላስ ኩመꬅ ቢታ ቦላ ጫርክስስ። ዎንትያ ዎደ ሄ ጫርኮይ ቦለ ኤህስ።
14 ቦለይ ግብፀ ቢታ ኡባ ጋክድ ማእስ። ሄሳ መላ ቦለ ጋዶይ ሄ ቢታን ካሰካ ሀንቤና፤ ስንꬃፈካ ሀነና።
15 ቢት ꬉማና ጋካናዉ ቦለይ ቢታ ኡባ ማእስ። ሄ ቦለይ ሻቻፈ አትድ ጋደን ድጭያባ ኡባነ ምꬃ አይፈ ኡባ ምዶሶና። ግብፀ ቢታን ደእያ ምꬃ ሀይꬅነ ጭልኦባ ኡባ ምድግስ።
16 ካዎይ ሙሰነ አሮና ኤለስ ፄግስድ፥ “ታኒ ጎዳ ህንተ ፆሳነ ህንተና ናቃስ።
17 ህዛ ታ ናጋራ ታዉ እስ ቶሆ አቶ ጊተ። ሀ ꬋይስያ ጋዱዋ ታፐ ድጋና መላ ጎዳ ህንተ ፆሳ ዎስተ” ያግስ።
18 ሙሰይ ካዉዋ ማታፐ ከይድ ጎዳ ዎስስ።
19 ጎዳይ ዉሎሀ ዎልቃማ ጫርኩዋ ኪትድ ቦልያ ቢታፈ ደንꬅድ፥ ዞኦ አባ የድስ። ግብፀ ቢታ ኡባን እስ ቦለይካ ሀይቅቤና።
20 ሽን ጎዳይ ካዉዋ ዎዛና ሙምስዳ ግሾ እስራኤለታ የዶና እፅስ።
ሳካና ꬉማ
21 ጎዳይ ሙሰ፥ “ግብፀ ቢታን አስ ኦይክ በእያ ꬉም ꬉማና መላ ነ ኩሽያ ሳሎ ደንꬃ” ያግስ።
22 ሙሰይ ባ ኩሽያ ሳሎ ደንꬅስ። ግብፀ ቢታ ኡባን ሄꬑ ጋላስ ኩመꬅ ሳካና ꬉማይ ꬉምስ።
23 ሄ ሄꬑ ጋላሳታን ግብፀት እሶይ እሱዋ በእቦኮና ዎይኮ ኦንካ ባ ሶፐ ከይቤና። ሽን እስራኤለት ደእያ ጌሳመን ፖኦይ ደኤስ።
24 ካዎይ ሙሰ ፄግስድ፥ “ብድ ህንተ ጎዳ ጎይንተ። ህንተ ማጫሳይነ ህንተ ናይት ህንተራ ባናዉ ዳንዳኦሶና። ህንተ ዶርሳ ዉድያነ ህንተ ሚዛ ዉድያ ፃላላ አግድ ቢተ” ያግስ።
25 ሽን ሙሰይ፥ “ኑኒ ፁሳ ያርሾነ ሀራ ያርሾ ጎዳ ፆሳስ ያርሻና መላ መሄ ኔኒ ኑስ እማናዉ ኮሼስ።
26 እሶይካ ጉየ አቶና ኑ መሄይ ኑራ ባናዉ ኮሼስ። ጎዳ፥ ኑ ፆሳ ጎይናናዉ መህያፐ ዶራናዉ በሰይ ኑና። ኑኒ ያ ጋኮና ደእሸ አይ መሄ ያርሻነኮ ኤራናዉ ዳንዳኦኮ” ያግስ።
27 ሽን ጎዳይ ካዉዋ ዎዛና ሙምስዳ ግሾ፥ እ ኤንታ የዳናዉ ኮይቤና።
28 ሄሳፈ ጉየ፥ ካዎይ ሙሰኮ፥ “ታ ስንꬃፈ ክቻ፤ ታ ስንꬃን ዛራ በንታዳ ነና ኤራ። ታ አይፍያ ነ በእዳ ጋላስ ሀይቃና” ያግስ።
29 ሙሰይ እያኮ፥ “ቱማካ ነ ግዳይሳዳ ኔኒ ታ አይፍያ ዛራዳ በአካ” ያግስ።