39
ካህነታ ማኦ
(ከሳ 28:1-14)
1 ካህነት ጌሻ ዱንካንያን ኦꬅያ ዎደ ማአና ቦንቾ ማኦታ፥ ካሎሰን፥ ኦቻ ቴራ ዳንያ ቃጭናፐነ ዞኦ ቃጭናን ዳድዶሶና። አሮን ማእያ ካህነተꬃ ማኡዋ ጎዳይ ሙሰ ኪትዳይሳዳ ኦꬅዶሶና።
2 ቃስ ኤፉድያ፥ ዎርቃፈ፥ ካሎሰፐ፥ ኦቻ ቴራ ዳንያ ቃጭናፐ፥ ዞኦ ቃጭናፐነ አልኦ ሊኖፐ ዳድዶሶና።
3 ኤንቲ ዎርቃ ቆፅድ፥ ሌእስድ፥ እያ ቃራርድ፥ ቃጭናዳ ከስዶሶና። ያትድ ካሎሰን፥ ኦቻ ቴራ ዳነይሳን፥ ዞኦ ቃጭናንነ አልኦ ሊኖን አሌቅስድ ዳድዶሶና።
4 ኤንቲ ናምኡ ሀሽያራ ዎꬍድ፥ ናምኡ ባጋ ዎል ጋꬅድ ኦይሰꬃናዉ ማድያ ቃንጎታ ኤፉድያስ ኦꬅዶሶና።
5 ጎዳይ ሙሰ ኪትዳይሳዳ፥ ሂላንቾይ አሌቅስዳ ዳንጮይካ ኤፉደይ ኦሰትዳይሳታፐ ኦሰትድ፥ ዎርቃን፥ ካሎሰን፥ ኦቻ ቴራ ዳነይሳን፥ ዞኦ ቃጭናንነ አልኦ ሊኖን ዳደትስ።
6 ኤንቲ ማርግደ ጌተትያ ሹቻታ ጊግስድ፥ ዎርቃፈ ኦሰትዳ ካቁዋ ቦላ ዎꬅዶሶና። ማታመ ቦላ ዎጭድ ፃፈይሳዳ፥ ሄ ሹቻታ ቦላ እስራኤለ ናይታ ሱንꬃ ዎጭድ ፃፍዶሶና።
7 ጎዳይ ሙሰ ኪትዳይሳዳ፥ ታማነ ናምኡ እስራኤለ ናይታ ቆፍስያባ ግዳና መላ ኤንታ፥ ኤፉድያ ቃንጎታን ዎꬅዶሶና።
ትራን ማኤትያ ማኦ
(ከሳ 28:15-30)
8 ኤንቲ፥ ትራን ማኤትያ ማኡዋ ኤፉደይ ኦሰትዳይሳታፐ ኦꬅድ፥ ኤፉድያዳ አሌቅስዶሶና።
9 እያዉ ኦይዱ ማዛነት ደኦሶና፤ ጌሳይነ ጎምፓይ እስ እስ ታካꬎ ግድድ፥ ዳኮየቴስ።
10 እያ ቦላ ኦይዱ ማራን እንቆ ጌተትያ አልኦ ሹቻታ ዎꬅዶሶና። ኮይሮ ማራን ሳርድዮነ፥ ቶጳዘነ ጶልያ አልኦ ሹቻታ፤
11 ናምአንꬆ ማራን ባሉረ፥ ሳንፓረነ አልማዘ ጌተትያ አልኦ ሹቻታ፤
12 ሄꬓንꬆ ማራን ያክንተ፥ ከልቀዶነነ አመተስፅኖሳ ጌተትያ አልኦ ሹቻታ፤
13 ኦይዳንꬆ ማራን ብርለ፥ ማርግደነ ያስጵደ ጌተትያ አልኦ ሹቻታ ዎꬅዶሶና። ሄሳታ ኡባ ዎርቃፈ ኦሰትዳ ካቁዋ ቦላ ዎꬅዶሶና።
14 ታማነ ናምኡ ሹቻታ ቦላ እስ እስ እስራኤለ ናይታ ሱንꬃይ ዎጨትድ ፃፈትስ።
15 ትራን ማኤትያ ማኡዋስ ዋላህ ባይና ዎርቃፈ ዎዶሮዳ ዶቃዳ ሳንꬃላታ ኦꬃ።
16 ናምኡ ዎርቃ ካቆታነ ናምኡ ዎርቃ ሳጋዮታ መꬍድ፥ ናምኡ ዎርቃ ሳጋዮታ ትራን ማኤትያ ማኡዋስ ቆሞ ባጋን ደእያ ማዛነታራ ጋꬅድ ኦይሰꬅዶሶና።
17 ሄ ናምኡ ዎርቃ ሳንꬃላታታ ናምኡ ዎርቃ ሳጋዮታራ ጋꬅድ ኦይሰꬅዶሶና።
18 ሄ ሳንꬃላታታ፥ ሀንኮ ባጋ ፄራ፥ ናምኡ ካቆታራ ጋሰꬅዶሶና። ያትድ፥ ኤፉድያስ ስንꬃ ባጋራ፥ ሀሽያራ ዎꬍያ ቃንጎታራ ጋꬅድ ቃችዶሶና።
19 ቃስ ናምኡ ዎርቃ ሳጋዮታ መꬍድ፥ ኤፉድያስ ስንꬃ ባጋራ ደእያ ትራን ማኤትያ ማኡዋስ፥ ጋꬃ ባጋራ ደእያ ናምኡ ማዛነታ ፄራን አꬅዶሶና።
20 ሄሳዳካ፥ ዎርቃፈ ሀራ ናምኡ ምግዶታ ኦꬃዳ፥ ኤፉድያስ ስንꬃ ባጋ ሀሽያራ ዎꬍያ ቃንጉዋስ ጋርሳ ባጋራ፥ ስኩዋ ማታን ዳንጩዋፈ ቆሞ ባጋራ ኦይሰꬅዶሶና።
21 ጎዳይ ሙሰ ኪትዳይሳዳ፥ ትራን ማኤትያ ማኡዋ ቦላ ደእያ ምግዶታ ኤፉድያን ደእያ ምግዶታራ ጋꬅድ፥ ካሎሰ ቃጭና ቃችዶሶና። ትራን ማኤትያ ማኦይ ፄሳፈ ቆሞን ፔእያ ግሾ ቃሾይ ዶልኤና።
ሀራ ካህነ ማኦታ
(ከሳ 28:31-43)
22 ኤፉድያፐ ቦላራ ማኤትያ አዱሳ ማኦይ ኩመꬅ ካሎሰ አፍላፐ ጊግስዶሶና።
23 ሄ አዱሳ ማኡዋስ ሁጰ አꬅያ ሉሆ መꬍድ፥ ፔቶና መላ ጉየ ቃላምእድ፥ ዩሽ አꬅድ ስክዶሶና።
24 አዱሳ ማኡዋስ ዱገ ባጋ ማጫራ ዩሹዋን ካሎሰን፥ ኦቻ ቴራ ዳንያ ዞኦ ቃጭናንነ አልኦ ሊኖን፥ ኦሮማነ ቴራ ምስለታ መꬍዶሶና።
25 ኤንቲ ዋላህ ባይና ዎርቃፈ ዳላታ መꬍድ፥ አዱሳ ማኡዋስ ዱገ ባጋ ጋፃን፥ ኦሮማነ ምስለታ ግዶን ዎꬅዶሶና።
26 ጎዳይ ሙሰ ኪትዳይሳዳ፥ ኦሮማነ ቴራ ምስለታ፥ አዱሳ ማኡዋስ ዱገ ባጋ ማጫራ ዩሹዋን አꬅዶሶና።
27 ኤንቲ፥ ጎዳይ ሙሰ ኪትዳይሳዳ፥ አሮናስነ እያ ናይታስ፥ ሻምዘታ፥
28 ሁጰ ቃጨታ፥ ኡከታነ ጋꬃ ሱረታ አልኦ ሊኖፐ ዳድድ ጊግስዶሶና።
29 ቃስ ዳንጩዋ ካሎሰን፥ ኦቻ ቴራ ዳንያ ቃጭናን፥ ዞኦ ቃጭናንነ አልኦ ሊኖን አሌቅስድ፥ ጊግስዶሶና።
30 ኤንቲ፥ ጌሻ ካላቻ ምስልያ ዋላህ ባይና ዎርቃፈ መꬍድ፥ እያ ቦላ፥ “ጎዳስ ዱማትስ” ግያ ቃላ ዎጭድ ፃፍዶሶና።
31 ያትድ፥ ጎዳይ ሙሰ ኪትዳይሳዳ፥ ሁጰ ቃጭያ ቦላ ካሎሰ ቃጭናራ ቃችዶሶና።
ኦሶይ ጋፃ ጋከꬃ
(ከሳ 35:10-19)
32 ጌሻ ዱንካንያ ኦሶ ኡባይ ኩመꬅ ፖለትስ። እስራኤለ አሳይ፥ ጎዳይ ሙሰ ኪትዳይሳዳ ኦꬅዶሶና።
33 ሄሳፈ ጉየ፥ ኤንቲ ጌሻ ዱንካንያነ እያ ሚሸታ ሙሰኮ ኤህዶሶና። ሄሳትካ፥ ካጨታ፥ ቱሳታ፥ ልዮታ፥ ቱቀታነ ኤንቲ ኤቅያ ቶሆታ።
34 ቦላ ካማስ፥ ዞኦ ቃላመን የግድ ከስዳ ዶርሳ እተ፥ ሃሸትዳ ዶአ እተ፥ ማጋራጁዋ፥
35 ታሙ ኪታታ ኦይክዳ ታቦትያ፥ እያ ቶክያ ካሶ ምꬃታነ ናጋራ አቶተꬃ ካማ፥
36 ፃርጴዛነ እያ ሚሸታ ኡባ፥ ጎዳ ስንꬃን ደእያ ጌሻ ዳቡዋ፥
37 ዋላህ ባይና ዎርቃፈ ኦሰትዳ ፆምፐ ዎꬅያ ኮጫ፥ እያ ቦላ ደእያ ፆምፐታ፥ እያ ሚሸታ ኡባነ ፆምፐ ዛይተ፥
38 ዎርቃፈ ኦሰትዳ ያርሾ በሲ፥ ሹማተꬃ ዛይተ፥ ሳውያ እፃነ፥ ጌሻ ዱንካንያ ፐንገ ማጋራጁዋ፥
39 ናሰ ብራታፐ ኦሰትዳ ያርሾ በሲ፥ ናሰ ብራታ ተቅያ፥ ቶሆ ካሶ ምꬃታነ እያ ሚሸታ ኡባ፥ ሜቻ ከረነ እያ ዎይሳ፥
40 ዳባባ ገልያ ፐንገ ማጋራጁዋ፥ ቱሳታነ፥ ኤንቲ ኤቅያ ቶሆታ፥ ዳባባ ማጋራጁዋ፥ ቶለ ዎዶሮታ፥ ꬍሸታ፥ ጌሻ ዱንካንያን ጎኤትያ ሚሸታ ኡባ፥
41 ካህነት ጌሻ በሳን ማእያ ቦንቾ ማኦታ፥ አሮንነ እያ ናይት ማእያ ካህነተꬃ ማኦታ።
42 እስራኤለ አሳይ ኦሶ ኡባ፥ ጎዳይ ሙሰ ኪትዳይሳዳ ኦꬅዶሶና።
43 አሳይ፥ ኦሶ ኡባ፥ ጎዳይ ኪትዳይሳዳ ኦꬅዳይሳ ሙሰይ በእስ። ሄሳ ግሾ፥ ሙሰይ ኤንታ አንጅስ።