1 ጎዳይ አብራመኮ፥ “ነ ቢታፈ፥ ነ ደርያፐ፥ ነ ሶ አሳፐ፥ ሻከታዳ ታ ነና በሲያ ቢታ ባ። 2 ታ ነና ዎልቃማ ደረ ኦꬃና፥ ነና ታ አንጃና ነ ሱንꬃ ግታ ከሳና፤ ነ ሀራታስ አንጆ ግዳና። 3 ታኒ ነና አንጀይሳታ አንጃና፤ ነና ባደይሳታ ባዳና፥ ቢታ ቦላ ደእያ ደረ ኡባይ ነ ጋሶራ አንጀታና” ያግስ።

4 ሄሳ ግሾ፥ አብራመይ ፆሳይ እያ ኪትዳይሳዳ ከይስ። ሎፀይ እያራ እስፈ ብስ። አብራመይ ካራነፐ ከይያ ዎደ እያዉ ላይꬅ ላፑን ታማነ እቻሻ። 5 አብራመይ ባ ማችዉ ሶራ፥ ባ እሻ ናአ ሎፀ፥ ካራነን ደእሸ ሺሽዳ ሻሉዋነ ባ አይለታ ኡባ ኤክድ ካናነ ቢታ ብድ ጋክዶሶና። 6 አብራመይ ሴከማን ደእያ ሞረ ጌተትያ ግታ ምꬃኮ ጋካናዉ ካንꬅድ ብስ። ሄ ዎደ ካናነ አሳት ሄ ቢታን ደኦሶና። 7 ፆሳይ አብራመስ ያን ቆንጭድ፥ “ሀ ቢታ ታኒ ነ ሼሻስ እማና” ያግስ። እካ ባ ቆንጭዳ ጎዳስ ሄ በሳን ያርሾ በሲ ጊግስስ። 8 ሄ በሳፈ ደንድድ ቤተለፐ ዶሎሀ ባጋራ ደእያ ዙማኮ ብስ። ያን ቤተለ ዉሎሀ ባጋን፥ ጋየ ዶሎሀ ባጋን አግድ፥ ባ ዱንካንያ ቶክስ፤ ያን ጎዳስ ያርሾ በሲ ጊግስድ ጎዳ ሱንꬃ ፄግስ። 9 ሄሳፈ ጉየ፥ አብራመይ በሳፈ በሰ አꬍሸ ነገበ ጋክስ።

10 ሄ ዎደ ካናነ ቢታን ኮሽ ከይስ። ኮሻይ ምንዳ ግሾ ጉꬃ ዎደ ያን ዳናዉ አብራመይ ግብፀ ቢታ ብስ። 11 ግብፀ ገላናዉ ማትያ ዎደ አብራመይ ባ ማቸ ሶራኮ፥ “ኔኒ ማላ ሎኦ ግደይሳ ታኒ ኤራይስ፤ 12 ግብፀ አሳት ነና በእድ፥ ‘ሀና እያ ማችዉ’ ያግድ ታና ዎꬍድ ነና አጋጋና። 13 ሄሳ ግሾ፥ ነ ግሾ ግድ ታዉ ሎኦባ ኦꬃና መላነ ታ ሸምፕያ አታና መላ ‘ታ እያዉ ምቾ’ ያጋ” ያግስ። 14 አብራመይ ግብፀ ቢታ ጋክዳ መላ ግብፀ አሳት ሶራ ማላ ሎኦ ማጫስ ግዶይሳ በእዶሶና። 15 ግብፀ ፓሮና ሞርናት እዮ በእድ ዳሮ ናሽድ ካዋ ፋሮናስ ኦድዶሶና፥ እዮካ ካዋ ስን ኤፍዶሶና። 16 እ ጋሶን ካዎይ አብራመ ቦንችድ ሞክስ። ጉጅድካ ዶርሳታ፥ ሚዛታ፥ ሀረታ፥ ግማለታ፥ አደ አይለታነ ማጫ አይለታ እያዉ እሚስ። 17 ሽን ጎዳይ አብራመ ማቸ ሶራ ጋሶን ግብፀ ካዋነ እያ ኬꬃ ጋዶ ሀርገን ሾጭስ። 18 ሄሳፈ ጉየ፥ ካዎይ አብራመ ፄግስድ፥ “ነ ታ ቦላ ኦꬅዳባይ ሀይስ አይቤ? እያ ነ ማቾ ግደይሳ አይስ ታዉ ኦዳብኪ? 19 አይስ ታ ምቾ ጋዳ ዎርዶታዲ? ታ እዮ ማቾ ኦꬃዳ ኤካስ፥ ሽን አትስ፤ ነ ማችያ ሀናሹ ኤካ ባ” ያግስ። 20 ሄሳፈ ጉየ፥ አብራመነ እያ ማችዉ እያዉ ደእያባ ኡባራ ከስ የዳና መላ ካዎይ ባ አሳታ ኪትስ።