24
ይሳቅ ማቾ ኤኩዋ
1 አብራሃመይ ዳሮ ጭምስ። ጎዳይ እያ ኡባባንካ አንጅስ።
2 አብራሃመይ ባ አይልያ፥ ባ ሶ አሳ ኡባስ ሀላቃትያ፥ ባ አቆ ኡባ ቦላ ሱንትዳይሳ ሀይሳዳ ያግስ፥ “ነ ኩሽያን ታ ጉልባታ ኦይካ፤
3 ታኒ ኤንታ ግዶን ደእዳ ካናነታ ማጫ ናይታፐ ታ ናኣስ ማቾ ኦይቾና መላ፥ ጎዳን፥ ሳሎነ ሳአ ፆሳ ሱንꬃን ታኒ ነና ጫቅሳይስ፤
4 ሽን ኔኒ ታ የለትዳ ቢታ፥ ታ ዳቦታኮ ባዳ፥ ታ ናአ ይሳቃስ ማቾ ኦይቻ” ያግስ።
5 እያ አይለይ፥ “ሄ ማጫስያ ታራ ያናዉ ዶሶና እፅኮ፥ ነ ናአ ኔኒ ይዳ ቢታ ጉየ ኤፎ?” ያግድ ኦይችስ።
6 አብራሃመይ፥ “ታ ናአ አይ ጋሶንካ ያ ኤፎናዳ ነና ኤራ!
7 ጎዳይ፥ ሳሉዋ ፆሳይ፥ ታና ታ አዋ ሶፐነ ታ የለትዳ ቢታፈ ከስዳይስ ታዉ፥ ‘ነ ዘረꬃስ ታኒ ሀ ቢታ እማና’ ያግድ ጫቅዳይስ፥ ኔኒ ታ ናኣስ ያፐ ማቾ ደማና መላ፥ እ ባ ኪታንቹዋ ኔፐ ስን ኪታና።
8 ሄ ማጫስያ ኔራ ያናዉ ዶሶና እፅኮ፥ ሀ ታኒ ነና ጫቅስዳ ጫቆይ ነዉ ጎመ ግደና፤ ሽን ታ ናአ ያ ኡባካ ኤፎፓ” ያግስ።
9 አይለይ ባ ጎዳ አብራሃመ ጉልባታ ኦይክስ፤ ሄ ኦዳስ ጫቅስ።
10 ሄሳፈ ጉየ፥ አይለይ ባ ጎዳ ግማለታፐ ታማ ኤክድ፥ ባ ጎዳ ሚሽያፐካ ሙሩታ ሙሩታ ኤክ ብድ ማሰጰፆመ ቢታን ናኮራ ካታማ ጋክስ።
11 ኦማርስ፥ ማጫስ ሃ ትካናዉ ያ ዎደ፥ ካታማፐ ጋፃን ሃꬃ ኦላ ማታን ባ ግማለታ ጉልባትስስ።
12 እ ዎስሸ፥ “ጎዳዉ፥ ታ ጎዳ አብራሃመ ፆሳዉ፥ ሀች ታኒ ቆፓዳ ይዳይሳ ታዉ ጊግሳ፤ ቃስ ታ ጎዳ አብራሃመስ ኬሀባ ኦꬃ።
13 ሄኮ፥ ታኒ ሀ ሃꬃ ፑልቱዋ ማታን ኤቃይስ፤ ሀ ካታማ ማጫ ናይት ሃꬃ ትካናዉ ሃ ዮሶና።
14 ታኒ፥ ‘አነ ኦቱዋ ዝቅ ኦꬃዳ ታና ሃ ኡሻ’ ግያ ዎደ፥ እያ፥ ‘ሄኮ ኡያ፤ ቃስ ነ ግማለታ ታኒ ኡሻና’ ግያራ፥ ህና ነ አይልያ ይሳቃስ ኔኒ ዶርዳሮ ግዶ፤ ኔኒ ታ ጎዳስ ኬሀባ ኦꬅዳይሳ ታኒ ሄሳን ኤራና” ያግስ።
15 ቡሮ እ ዎሳ ዛሮና ደእሽን፥ እርብቃ ሃꬃ ኦቶ ቶካዳ ፑቱ ጋሱ። እያ ባቱኤላ ናአ፥ ባቱኤል ምልካ ናአ፥ ምልካ አብራሃመ እሻ ናኮራ ማችዉ።
16 እርብቂ ዳሮ የገልስን አደ ኤሮና ጌላኦ። ፑልቱዋ ዱገ ዎꬋዳ፥ ባ ኦቱዋ ኩንꬃዳ ባናዉ ደንዳሱ።
17 ያንን፥ ሄ አይለይ ኢኮ ዎፅ ብድ እዮ፥ “ነ ታና ጉꬃ ሃ ኡሻርክ” ያግስ።
18 እያ፥ “ኤሮ ታ ጎዳዉ፥ ኡያ” ያጋሱ። ኤለሳዳ ኦቱዋ ባ ሀሸፐ ዎꬃዳ፥ ገድ ኦꬃ ኦይካዳ እያ ኡሻሱ።
19 እያ ኡሽዳፐ ጉየ፥ “ነ ግማለትካ አላና ጋካናዉ ታኒ ኤንታዉ ሃꬃ ዱቃና” ያጋሱ።
20 አትዳ ሃꬃ ኤለሳዳ ጎንጌን ትጋዳ፥ ሀራ ሃ ዱቃናዉ ኦላ ዎፃሱ፤ ግማለት ኡባይ አላና ጋካናስ፥ ሃꬃ ኦላፈ ዱቃ ዱቃ ኤሀዳ ጎንገን ትጋዳ ኡሻሱ።
21 እ ቆፕድ ይዳ ቆፋ ጎዳይ እንጀይሸ ደእያኮነ ኤራናዉ አደይ ስእ ግድ እዮ ፄሌስ።
22 ግማለት ሃꬃ ኡይ ስምን፥ አደይ እቻሹ ግራመ ባጋ ሲን አꬅያ ዎርቃ ፄታነ ታሙ ግራመ ግድያ ናምኡ ዎርቃ ሳጋዮታ ጊግስስ።
23 እዮ፥ “ኔኒ ኦደ ናኤ? አነ ታዉ ኦዳ፤ ነ አዋ ሶን ኑስ አቅያ በሲ ዳኔ?” ያግስ።
24 እያ፥ “ታኒ ባቱኤላ ናአ፤ ባቱኤል ምልካ ናኮራስ የልዳ ናአ።
25 ኑ ሶን ግድያ ካለይነ ሀርቆይ ደኤስ፤ ቃስ ህንተ አቃናዉ በሲ ደኤስ” ያጋሱ።
26 አደይ ጉልባትድ ጎዳ ጎይንድ፥
27 ሀይሳዳ ያግስ፤ “ታ ጎዳስ ኬሄይሳነ አማነተይሳ አግቦና ጎዳይ፥ ታ ጎዳ አብራሃመ ፆሳይ ጋላተቶ፤ ታኒ ይሽን፥ ጎዳይ ታና ታ ጎዳ ዳቦታ ሶ ካለꬅስ” ያግስ።
28 ናእያ ዎፃ ባዳ፥ ባ አየ ሶን ደእያ አሳስ ሀንዳባ ኦዳሱ።
29 እርብቃስ ላባ ጌተትያ እሺ ደኤስ። ላቢ ካረ ከይድ ሃꬃ ፑልቱዋ ማታን ደእያ አድያኮ ዎፅስ።
30 ሲ ዎርቃነ ባ ምቸ ኩሸን ደእያ ሳጋዮታ በእዳ ዎደ እርብቃ አደይ ባና ግዶይሳ ኦድን ስእዳ ዎደ፥ ከይድ አድያኮ ብስ። አደይካ ግማለታራ ፑልቱዋ ማታን ኤቅዳይሳ ደምስ።
31 እያኮ፥ “ጎዳይ ነና አንጅዳይሶ፥ ሃያ፥ ኔኒ ካረን አይስ ኤቃዲ? ታኒ ነዉ ኬነ ግማለታስካ በሰ ጊግሳስ” ያግስ።
32 ያትን አደይ ሶ ገልስ። ላቢ ግማለታ ጫና ብልድ፥ ካለነ ꬊለ ግማለታስ እማስ። ቶሆ ሜጫናዉ እያስነ እያራ ደእያ አሳስ ሃ ኤህስ።
33 ካꬅ እያ ስን አꬍስ። ሽን፥ “ታኒ ታና ኤህዳባ ህንተዉ ኦዶና ደአሸ ካꬅ ሚከ” ያግስ።
ላቢ፥ “ያኮ ኦዳ” ያግስ።
34 ሄሳ ግሾ፥ እ፥ “ታኒ አብራሃመ አይልያ።
35 ጎዳይ ታ ጎዳ ዳሮ አንጅዳ ግሾ እ ዱረትስ። ዶርሰ፥ ሚዝ፥ ብራ፥ ዎርቃ፥ አደ አይለታ፥ ማጫ አይለታ፥ ግማለታነ ሀረታ እያዉ እሚስ።
36 ታ ጎዳ ማችያ ሳራ ባ ጭማተꬃ ላይꬃን እያዉ አደ ናአ የላሱ። ያትን እ ባዉ ደእያባ ኡባ እያዉ እሚስ።
37 ታ ጎዳይ ታና ሀይሳዳ ጫቅስስ፥ ‘ታኒ ደእያ ካናነ ቢታ ማጫ ናይታፐ ታ ናኣስ ማቾ ኦይቾፋ።
38 ሽን ታ አዋ አሳኮ፥ ታ ዳቦታኮ ባዳ ታ ናኣስ ማቾ ኦይቻ’ ያግስ።
39 ታኒ ታ ጎዳ፥ ‘ናእያ ታራ ያናዉ ዶሶና እፅኮች?’ ያጋዳ ኦይቻስ።
40 እካ፥ ታኒ እያ ስንꬃን ኪተትዳ ጎዳይ ባ ኪታንቹዋ ኪታና፤ ኔኒ ታ ናኣስ ታ አዋ አሳፐ፥ ታ ኮቻፈ ማቾ ደማና መላ፥ ነ በይሳካ እንጀያና።
41 ኔኒ ታ ኮቻታኮ ብን፥ ኤንቲ ነዉ እዮ እሞና እፅኮ፥ ሄ ዎደ ነዉ ጫቆይ ጎመ ግደና” ያግስ።
42 “ታኒ ሀች ሄ ፑልቱዋኮ ያ ዎደ ያጋስ፤ ‘ጎዳዉ፥ ታ ጎዳ አብራሃመ ፆሳዉ፥ ነ ሸነ ግድኮ፥ ታኒ ብያ አላልያ ጊግሳ።
43 ሄኮ፥ ታኒ ሀ ፑልቱዋ ማታን ኤቃይስ፤ ጌላኦ እስንያ ሃ ትካናዉ ዪኮ፥ ታኒ እዮ፥ ታና ነ ኦቱዋፐ ጉꬃ ሃ ኡሻርክ’ ያጋና።
44 እያ፥ ‘ኤሮ ኡያ፥ ቃስ ነ ግማለታስካ ታኒ ሃ ዱቃና’ ግያራ፥ ጎዳይ ታ ጎዳ ናኣስ ዶርዳሮ ግዶ” ያጋስ።
45 “ታኒ ታ ዎዛናን ዎሰይሳ ዛሮና ደእሽን፥ እርብቃ ባ ኦቱዋ ቶካዳ፥ ፑቱ ጋሱ፤ ፑልቱዋ ዱገ ዎꬋዳ ሃ ዱቃሱ፤ ታኒ እዮ፥ ‘ታና ሃ ኡሻርክ’ ያጋስ።
46 “ያግን እያ ኤለሳዳ ባ ሀሽያፐ ኦቱዋ ዎꬃዳ፥ ‘ሄኮ ኡያ፤ ቃስ ታኒ ነ ግማለታ ኡሻና’ ያጋሱ። ያትን ታኒ ኡያስ፤ ቃስ ታ ግማለታ እያ ኡሻሱ።
47 “ታኒ እዮ፥ ‘ኔኒ ኦደ ናኤ?’ ያጋስ።
“እያ ዛራዳ፥ ‘ታኒ ባቱኤላ ናኣ፤ ባቱኤል፥ ምልካ ናኮራስ የልዳ ናአ’ ያጋሱ። ታኒ ዎርቃ እ ሲን፥ ሳጋዮታ እ ኩሸን አꬃስ።
48 ሄሳፈ ጉየ፥ ታኒ ጉልባታዳ፥ ጎዳስ ጎይናስ። ታኒ ጎዳ፥ ታ ጎዳ አብራሃመ ፆሳ፥ ታ ጎዳ እሻ ናአ ናእዉ እያ ናኣስ ኤካናዉ ታና ልከ ኦግያ ካለꬅዳይሳስ ጋላታይስ።
49 ሀእካ ህንተ ታ ጎዳስ ኬሀናባነ አማነታናባ ግድኮ፥ ታዉ ኦድተ፤ ግዶና እፅኮካ ኦድተ፤ ሄሳፈ ጉየ፥ ታኒ ሀናናባ ኤራና” ያግስ።
50 ላብነ ባቱኤል ዛሪድ ያግዶሶና፤ “ሀ ኦዳይ ጎዳፐ ይስ፤ ኑኒ ነዉ ያ ሃ ጋናዉ ዳንዳኦኮ።
51 እርብቆ ሀኖ በአ፤ ኤካዳ ባ፤ ጎዳይ ግዳይሳዳ ነ ጎዳ ናኣስ ማቾ ግዶ” ያግዶሶና።
52 አብራሃመ አይለይ ኤንቲ ግያባ ስእዳ ዎደ፥ ሳአን ጉልባትድ ጎዳስ ጎይንስ።
53 አይለይ ብራ አሌቆ፥ ዎርቃ አሌቆነ ማኦ ከስድ እርብቃስ እሚስ። ቃስ አልኦ ሚሸታ እ እሻስነ እ አየስ እሚስ።
54 ሄሳፈ ጉየ፥ እነ እያራ ደኤይሳት ምዶሶና ኡይዶሶና፤ ያን አቅዶሶና። ኤንቲ ጉራ ደንድን፥ እ፥ “ታና ታ ጎዳኮ የድተ” ያግስ።
55 ያትን እ እሻይነ እ አይያ፥ “ናእያ እስ ታሙ ጋላሳ መላ ኑራ ታኮ፥ ሄሳፈ ጉየ እያ ባና” ያግዶሶና።
56 ሽን እ፥ “ጎዳይ ታ ይዳይሳ እንጀይን፥ ህንተ ታና ጋምእሶፕተ። ታኒ ታ ጎዳኮ ባና መላ ታና ሞይዝተ” ያግስ።
57 ኤንቲ፥ “ናእዉ ፄግድ አነ እዮ ኦይቾስ” ያግዶሶና።
58 እርብቃ ፄግድ፥ “ሀ አድያራ ባኔ?” ያግድ ኦይችዶሶና።
እያ፥ “ኤ፤ ታኒ ባና” ያጋሱ።
59 ያንን፥ ኤንቲ ባንታ ምችዉ እርብቃ፥ እዮ ድችዳሮ፥ አብራሃመ አይልያነ እያ አሳታ ሞይዝዶሶና።
60 ኤንቲ እርብቃ፥
“ኑ ምቸ እርብቀ፥
ሙኩሉፐ ሙኩሉ ጋካናዉ ዳራ፤
ነ ኮቻይ ባንታ ሞርከታ ካታማታ ላቶ”
ያግድ አንጅዶሶና።
61 ሄሳፈ ጉየ፥ እርብቅነ እ ማጫ አይለት ደንድድ፥ ግማለታ ቶግድ፥ አድያራ ብዶሶና። ያትን አይለይ እርብቃ ኤክድ ብስ።
62 ሄ ዎደ ይሳቅ፥ “ታና በእያ ደኦ ፆሳ ፑልቱዋ” ጌተትያ ፑልቱዋ ማታ ብድ፥ ነገበ መላ ቢታን ደኤስ።
63 እስ ጋላስ ኦማርስ ይሳቅ ባ ዎዛናን ቆፕሸ ደምባ ከይድ ዩዬስ፤ እ ꬎቁ ግድ ፄልያ ዎደ፥ ግማለት የይሳታ በእስ።
64 እርብቃካ ꬎቁ ጋዳ ፄልያ ዎደ፥ ይሳቃ በአሱ፤ ግማለታፐ ዎꬋሱ።
65 አብራሃመ አይልያኮ፥ “ሀ ኑራ ጋሄታናዉ ደምባራ ያ አደይ ኦኔ?” ያጋሱ።
አይለይ፥ “እ፥ ታ ጎዳ” ያግስ። እያ ባ ላፃና ኤካዳ ጉሉንታሱ።
66 ቃስ አይለይ ባ ኦꬅዳባ ኡባ ይሳቃስ ኦድስ።
67 ይሳቅ እርብቃ ባ አየ ሳራ ዱንካንያ ግዶ ኤፍስ። እዮ ማችስ፤ እያካ እያዉ ማቾ ግዳሱ። እ እዮ ዶስስ፤ ባ አየ ካዩዋ ዎꬅስ።