39
ዮሰፋነ ጶፅፋራ ማችዉ
1 እስማኤላ አሳት ዮሰፋ ግብፀ ቢታ ኤፍዶሶና። ግብፀ ካዋ ሞርናታፐ እሱዋስ፥ ካዋ ናገይሳታ ሀላቃስ ዮሰፋ ባይዝዶሶና።
2 ጎዳይ ዮሰፋራ ደእያ ግሾ፥ እ ኦꬅያባ ኡባ እያዉ እንጀይስ። ያትን፥ ባ ግብፀ ጎዳ ሶን ደእስ።
3 ጎዳይ እያራ ደኤይሳነ እ ኦꬅያባ ኡባ እያዉ እንጀይዳይሳ ጶፅፋር በእዳ ዎደ፥
4 ዮሰፋ ዶስስ፥ ባዉ ማታ ኦሳንቾ ኦꬅስ። ጶፅፋር እያ ባ ኬꬃ ቦላነ ባዉ ደእያባ ኡባ ቦላ ሹምስ።
5 ሄ ዎደፐ ዶምድ፥ ጎዳይ ግብፀ ኡራ ኬꬃ ዮሰፋ ግሾ አንጅስ። ጎዳ አንጆይ ጶፅፋራ ሶንነ እያ ጋደን ደእያባ ኡባ ቦላ ዎꬍስ።
6 ሄሳ ግሾ፥ እ ምያ ካꬃፈ አትሽን፥ ባዉ ደእያ ሀራባ ኡባ ዮሰፋ ኩሸን ሼꬍስ።
ዮሰፍ የገልስነ ማላ ሎኦ አስ።
7 ጉꬃ ዎደፐ ጉየ፥ እያ ጎዳ ማችያ ዮሰፋ በአዳ፥ “ሃያ፥ ታራ ዝንአ” ያጋሱ።
8 ሽን እ እፅድ፥ ኢኮ፥ “በአ፥ ታ ጎዳይ፥ ባዉ ደእያባ ኡባ ታ ኩሸን የግዳ ግሾ፥ ባ ሶን ደእያባስ አይኮካ ህርገና።
9 ሀ ሶን ታፐ አይ ኦንካ ባዋ። ኔኒ እያ ማቾ ግድያ ግሾ፥ ኔፐ አትሽን፥ ሀራ፥ እ ታዉ እሞናባይ ባዋ። ያትን፥ ታኒ ዋታዳ ሀይሳ መላ ዳሮ ኢታባ ሀናዳ ፆሳ ቦላ ናጋራ ኦꬆ?” ያግስ።
10 እያ ሄ ኦዳ ዎንታ ዎንታ ዮሰፋስ ኦድንካ፥ እ ኢራ አቆና ይኮ እ ማታ ሺቆና እፅስ።
11 ሽን እስ ጋላስ እ ባ ኦሶ ኦꬃናዉ ሶ ገልያ ዎደ፥ ሶ አይለታፐ ኦንካ ሶን ባዋ።
12 እያ ዮሰፋ አፍላ ኦይካዳ፥ “ታራ ዝንአ” ያጋሱ። ሽን እ ባ አፍላ እ ኩሽያን የግ አግድ፥ ሶፐ ካረ ዎፅ ከይስ።
13 ዮሰፍ ባ አፍላ እ ኩሽያን የግ አግድ፥ ሶፐ ካረ ዎፅ ከይዳይሳ እያ በእዳ ዎደ፥
14 ባ ሶ አይለታ ፄጋዳ፥ “ሄኮ፥ ታ አዝናይ ኤህዳ ሀ እብራወ ኡራይ ታና ካዉሻናዉ ኦይክስ። እ ታና ኢሳናዉ ታ ደእያሱዋ ገልስ፥ ሽን ታኒ ዋሳስ።
15 ያትን፥ እ ባ አፍላ ታ ማታን የግ አግድ፥ ሶፐ ካረ ዎፅድ ከይስ” ያጋሱ።
16 እ አዝናይ ሶ ያና ጋካናስ እያ ዮሰፋ አፍላ ባ ማታን ዎꬃሱ።
17 እ ይን፥ እያዉ ሀይሳዳ ጋዳ ኦዳሱ፤ “ሀይስ ነ ኤህዳ እብራወ አይለይ ታና ኢሳናዉ ታኮ ገልስ።
18 ሽን ታኒ ዋስን፥ ባ አፍላ ታ ማታን የግ አግድ፥ ሶፐ ካረ ዎፅ ከይስ” ያጋሱ።
19 እያ ጎዳይ ሀንዳባ ስእዳ ዎደ ዳሮ ይሎትስ።
20 እያ ጎዳይ ዮሰፋ ኤፍድ፥ ካዋ ቃሾ አሳይ ደእያ ቃሾ ኬꬃን የግስ።
21 ሽን ዮሰፍ ቃሾ ኬꬃን ደእያ ዎደ፥ ጎዳይ እያራ ደኤስ። ባ ኬሀተꬃ እያዉ ዳርስድ፥ ቃሾ ኬꬃ ካፑዋ ስንꬃን እያዉ ሳባ እሚስ።
22 ያንን፥ ቃሾ ኬꬃ ካፖይ ቃሾ አሳ ኡባ ዮሰፋ ኩሸን የግስ። ያን ኦሰትያባ ኡባስ አዋተꬃ እሚስ።
23 ጎዳይ ዮሰፋራ ግድድ፥ እ ኦꬅያባ ኡባ እያዉ እንጀይዳ ግሾ፥ ቃሾ ኬꬃ ካፖይ ዮሰፋ ኩሸን ደእያባስ አይኮካ ህርገና።