11
አማኖ
1 አማኖ ጉሳይ፥ ደማና ግድ ኡፋይሳን አማነትድ ናግያባነ ኑ በኦናባ በእያዳ ኦꬅድ ኤክያባ።
2 በን አዋት አማኖን ፆሳፈ ማርካተꬅ ኤክዶሶና።
3 አላመይ ፆሳ ቃላን መትዳይሳ ኑ አማኖን ኤሮስ። ቃስ በንትያባይ በንቶናባፐ መትስ።
4 አበል ቃየላፐ አꬍያ ያርሾ ፆሳስ ያርሽዳይ አማኖና። ፆሳይ አበላ እሙዋ ኡፋይትድ ኤክዳ ዎደ እ ፅሎ ግድዳይሳ ማርካትስ። አበል ሀር አቶሽን፥ ሀይቅድካ ባ አማኑዋን ሀእ ጋካናዉ ኦዴስ።
5 ሄኖከይ ሀይቆና ሳሎ ብዳይ አማኖና። ፆሳይ እያ ኤክዳ ግሾ ኦንካ እያ በአናዉ ዳንዳእቤና። ሄኖከይ ሳሎ ኤከታናፐ ስን እ ፆሳ ኡፋይስዳ አስ ግደይስ ኦደትስ።
6 አማኖይ ባይና ኦንካ ፆሳ ኡፋይሳናዉ ዳንዳኤና። ፆሳኮ ያ ኦንካ ፆሳይ ደኤይሳነ ባና ኮየይሳታስ ዎይቶ እመይሳ አማናናዉ ኮሼስ።
7 ኖሄይ ቡሮ በንቶናባስ ፆሲ እያዉ ኦድዳ ዎደ ፆሳስ ያይድ፥ ባናነ ባ ሶ አሳ አሻናዉ አማኖን ማርካበ ኬፅስ። ያትድ ባ አማኑዋን አላመ ፕርድድ፥ አማኖን በንትያ ፅሎተꬅ ፆሳፈ ኤክስ።
8 አብራሃመይ ላታ ኦꬅድ ኤካና ቢታ ባና መላ ፆሳይ እያ ፄግዳ ዎደ ሀር አቶሽን፥ እ አዉ ብያኮ ኤሮና እፅኮካ ኪተትዳይ አማኖና።
9 አብራሃመይ ፆሳይ እያዉ እማና ግዳ ቢታን በተ አሳዳ ደእዳይ አማኖና። ፆሳይ ሄ እማና ግዳይሳ እያራ እስፈ ላታናው ደእያ ይሳቃራነ ያይቆባራ ዎላ ዱንካነን ደእስ።
10 እ፥ ፆሳይ ቆፕድ ኬፅዳ ፃላ ባሶይ ደእያ ካታማ ናጌስ።
11 ሳራ ባ ሁጰን ጭምዳባ ግድኮካ ኡፋይስ እምዳ ፆሳይ አማነትዳይሳ ግደይሳ ኤርዳ ግሾ ቃንꬃታናዉ ዎልቃ ደምዳይ አማኖና።
12 ሄሳ ግሾ፥ ሀይቅዳ አስ ዳንያ እስ አድያፈ ሳሎ ፆልንቶ መላነ አባ ጋፃን ደእያ ታይቦይ ባይና ሻፈ መላ ዘረꬃይ የለትዶሶና።
13 ሄ አሳ ኡባይ ባንታዉ ጌተትዳ ኡፋይሳ ቃላ ኤኮና አማኖን ሀይቅዶሶና። ሽን ሃሆራ ሄሳ በእድ፥ ደምዳዳ ኦꬅድ፥ ኡፋይሳን ኤክዶሶና። ቃስ ኤንቲ ሳአን እማነ በተ አስ ግደይሳ ኤርዶሶና።
14 ሄሳዳ ግያ አሳይ ባንታ ቢታ ናገይሳ ቆንጨን በሴስ።
15 ኤንቲ ሄ አግድ ከይዳ ቢታ ጉየ ቆፕዳባ ግድያኮ ጉየ ስማናዉ ዳንዳኦሶና።
16 ሽን ሀእ አꬍድ ሎእያ ሳሎ ቢታ ላሞቶሶና። ሄሳ ግሾ፥ ፆሳይ ኤንታዉ ካታማ ጊግስዳ ግሾ፥ “ኤንታ ፆሳ” ጌተትድ ፄገታናዉ ዬላተና።
17 አብራሃመይ ፓጨትዳ ዎደ ይሳቃ ያርሽዳይ አማኖና። ሄ ኡፋይሳ ቃላ ኤክዳ አብራሃመይ ባ እስ ናኣ ያርሻናዉ ጊግስ።
18 ፆሳይ አብራሃመኮ፥ “ነ ዘረꬃይ ይሳቃ ባጋራ ፄገታና” ያግድ ኦድስ።
19 ፆሳይ ሀይቆፐ ደንꬃናዉ ዳንዳኤይሳ አብራሃመይ አማንዳ ግሾ፥ ይሳቃ ሀይቆፐ ፓፅ ደንድዳዳ ኦꬅድ ዛር ኤክስ።
20 ይሳቅ ዎደፐ ሀናናባ ኤርድ ያይቆባነ ኤሳዌ አንጅዳይ አማኖና።
21 ያይቆብ ሀይቃና ሀንሸ፥ እስ እስ ዮሰፋ ናይታ አንጅዳይነ ጉፈ ቦላ ካትድ ጎይንዳይ አማኖና።
22 ዮሰፍ ሀይቃናዉ ማትዳ ዎደ እስራኤለ አሳይ ግብፀፈ ከያናይሳ ኦድዳይነ ባ መቀꬃ ኦꬃናባ ኤንታ ኪትዳይ አማኖና።
23 ሙሰይ የለትዳፐ ጉየ እያ አያነ እያ አዋይ ማላ ሎኦ ናአ ግድዳይሳ በእድ ሄꬑ አጌና ቆትዳይ አማኖና፤ ኤንቲ ካዋ አዋጁዋ ባብቦኮና።
24 ሙሰይ ድጭዳፐ ጉየ ግብፀ ካዋ ናኤ ናአ ጌተታናይሳ እፅዳይ አማኖና።
25 ሙሰይ ናጋራን ጉꬃ ዎደስ ኡፋይታናፐ፥ ፆሳ አሳራ ዋየ ኤካናይሳ ዶርስ።
26 እ ዎደፐ ደማና ዎይቱዋ ትሽ ኦꬅድ ፄልዳ ግሾ፥ ግብፀ ሻሉዋፐ አꬅድ ክርስቶሳ ግሾ ቦረታናይስ ዳሮ አꬍያ ዱረተꬅ ግድዳይሳ ኤርስ።
27 ሙሰይ ካዋ ሀንቁዋ ያዮና፥ ግብፀፈ ከይዳይ አማኖና። በንቶና ፆሳ በእዳ አሳዳ ሀንድ ባ ቆፋን ገንጭስ።
28 ሀይቆ ኤህያ ኪታንቾይ እስራኤለ አሳ ባይራ ናይታ ዎꬎና መላ ሙሰይ ፓስካነ ሱꬃ ዉርፀꬃ ዎጋ ኦꬅዳይ አማኖና።
29 እስራኤለ አሳይ መላ ቢታራ ሄመትያዳ ሄመትድ፥ ዞኦ አባ ፕንዳይ አማኖና። ሽን ግብፀ አሳይ ገላናዉ ፓጭድ በእያ ዎደ ሃꬃይ ኤንታ ምትስ።
30 እስራኤለ አሳይ እያርኮ ካታማ ሹቻ ድርሳ ላፑን ጋላስ ዩይድ፥ ኩንድስዳይ አማኖና።
31 ላይምያ ራኣባ ቢታ ዎቸይሳታ ሞክዳ ግሾ፥ ኪተቶና አሳራ ሀይቆና አትዳይ አማኖና።
32 ህዛ፥ ሀራ ታ አይ ጎ? ገድዮናባ፥ ባራቃባ፥ ሳምሶናባ፥ ዮፍታሄባ፥ ዳዊታባ፥ ሳሜላባ፥ ቃስ ናበታባ ኦዳናዉ ታዉ ዎደይ ግደና።
33 ኤንቲ አማኖን ካዎተꬃታ ፆንዶሶና፤ ፅሎተꬃን አይስዶሶና፤ ፆሳይ እማና ግዳ ኡፋይሳ ኤክዶሶና፤ ጋሞታ ዶና ጎርድዶሶና፤
34 ታማ ዎልቃ ቶይስዶሶና፤ ሞርከታ ማሻፈ አትዶሶና፤ ባንታ ዳቡራን ምንዶሶና፤ ኦላን ዎልቃማ ግድዶሶና፤ አላጋ ቶራ ጎድዶሶና።
35 ማጫሳት ባንታ ሀይቅዳይሳታ ሀይቆፐ ፓፅን ኤክዶሶና።
ቃስ ሀራት አꬍያ ሀይቆፐ ደንዱዋ ኤካናዉ ኮይድ ቃሾፐ ብለታናይሳ እፅዶሶና።
36 ሀራት አሳን ቦረትድ ልሶን ጋራፈትዶሶና፤ ሀራት ሳንꬃላታን ቃሸትድ ቃሾ ኬꬃን የገትዶሶና።
37 ኤንቲ ሹቻን ጫደትዶሶና፤ ማጋዘን ናምአ ከይድ ጳልቀትዶሶና፤ ፓጨትዶሶና፤ ማሻን ሀይቅዶሶና፤ ኤንታዉ ኡባባይ ꬋይን መቶትዶሶና። ዶርሳ እተነ ዴሻ እተ ማእድ ዩይዶሶና።
38 ኤንታዉ ሀ አላመይ ጊጎና እፅን መላ ቢታን፥ ደረ ቦላ፥ ጎንጎሎንነ ኦላ ግዶን ዩይዶሶና።
39 ፆሳይ ኤንታ አማኑዋባ ማርካትኮካ፥ ሄ ኡባይ ጌተትዳ ኡፋይሳ ቃላ ኤክቦኮና።
40 ፆሳይ ኑስ ሎኦባ ቆፕ ዎꬅዳ ግሾ ኤንቲ ኑኒ ባይና ፖሎ ግዶኮና።