1 ታኒ ዎችያ ግምብያ ቦላ ኤቃዳ ናጋና። ሄ በሳን ኤቃዳ ጎዳይ ታዉ ኦድያባነ ታ ሞቱዋስ እምያ ዛሩዋ ስአናዉ ናጋሻና።

2 ጎዳይ ዛሪድ፥ “ዎፅያ አደይ ናባባና መላ ሎቸ ሹቻ ቦላ ታኒ ነዉ ቆንጭስያ ቃላ ኦርድሳዳ ፃፋ። 3 ቆንጨꬃይ ባ ዎድያ ናጌስ፤ ቆንጨꬃይ ፖለትያ ዎደይ ኤለ ጋካና፤ ዎርዶ ግደና። ጋምእኮካ ናጋ፤ እ ቱማ ሀናና፤ ጋምኤና።” 4 ሄኮ፥ እያ ዎዛናይ ኦቶርትስ፤ እያ ቆፋይ ሱረ ግደና፤ ሽን ፅሎይ ባ አማኑዋን ደኦን ዳና። 5 ዱረተꬅ አሰ ጭሜስ፤ ጬቀትያ ኡራስ ሸምፖይ ባዋ። እ ዱፎዳ ያራምባ ግድያ ግሾነ ሀይቆዳ ካል ኤሮና ግሾ፥ ካዎተꬃታ ኡባ ባዉ ሺሼስ፤ አሳ ኡባ ባዉ ድኤስ።

6 ድኤትዳ አሳይ ስሚድ ኤንታ ቦርሸነ ቀልቅስሸ ሀይሳዳ ያጋና፦ “ባባ ግዶና ሚሸ ሺሽድ ዶረይሳነ ቦንቅድ ዱረትዳይሳታ አየ! ሀይስ ሀይሳዳ ሀንድ፥ አዉደ ጋካናዉ ዳኔ?” ያጋና። 7 ኔኒ ኤንታፈ ቦንቅዳ አሳት ነ አኬኮና ነ ቦላ ደንድድ ነና ኮኮርሳና። ሄሳፈ ጉየ፥ ኤንቲ ነ ሻሉዋ ኡባ ቦንቃና። 8 ኔኒ ዳሮ አሳ ሻሉዋ ቦንቅዳ ግሾ፥ ኤንታፈ አትዳይሳት ነ ሻሉዋ ቦንቃና። ነ ዳሮ አሳ ሱꬃ ጉሳዳሳ፤ ሳኣ ቦላ፥ ካታማታ ቦላነ ያን ደእያ አሳ ኡባ ቦላ ኢታ ኦሶ ኦꬃዳሳ። 9 መቶይ ነና ጋኮና መላ ነ ኬꬃ ꬎቃ በሳን ኬፃናዉ ጌላተꬃን ሚሸ ሺሽዳይሶ ነና አየ! 10 ዳሮ አሳ ገናዳ ꬋይስዳ ግሾ፥ ነ ሶ አሳ ካዉሻዳሳ፤ ኔኒ ነ ቦላ ꬋዮ ኤሀዳሳ። 11 ሀር አቶሽን ነ ኬꬃ ግምበ ሹቻይ ነ ቦላ ዋሳና፤ ኬꬃ ቱቀት ዋሱዋ ኮሹማና። 12 ካታማ ኢታተꬃን ባስድ አሳ ሱꬃን ኬፀይሳቶ ህንተና አየ! 13 አሳይ ኦꬅያባ ኡባይ ታማ ካሆ ግዳና መላ፥ ካዎተꬃት ዳቡርዳ ኡባይ ሀዳ ግዳና መላ ኦꬅዳይ ኡባፈ ዎልቃማ ጎዳ ግደኔ? 14 አብ ሃꬃን ኩመይሳዳ ሳእ ጎዳ ቦንቹዋ ኤራተꬃን ኩማና።

15 “ባ ሾሮይ ካሎትን በአና ግድ፥ ማꬆይያ ኡሽ ኡሽያ ኡራ አየ! 16 ኔኒ ቦንቾ አጋዳ ካዉሸ ማአና። ሀእ ማꬆይ ነ ታራ፤ ነ ኡያዳ ካሎታ። ጎዳ ኡሻቻ ኩሽያን ደእያ ፁአይ ነዉ እመታና፤ ነ ቦንቾይ ዬላን ላመታና። 17 ነ ልባኖሰ ꬋይስዳይሳዳ ነካ ꬋያና። ነ ዶአታ ዉርሳዳሳ፥ ሀእ ኤንቲ ነና ያሽሳና። ነ ዳሮ አሳ ሱꬃ ጉሳዳሳ፤ ሳአ ቦላ፥ ካታማታ ቦላነ እያን ደእያ አሳ ቦላ ኢታ ኦሶ ኦꬃዳሳ።

18 “እ ባዉ ኤቅ አይ ማዲ? እያ አሳ ኩሸን ጊግስ ግደኔ? ዎርዶፈ አትሽን፥ እያን ሀራባይ በንተና። ያትን፥ እያ መꬍዳ ኡራይ ሀ አይኮካ ኦደቶና ኤቃን አማነተይስ እያ አይ ማዳኔ? 19 ምꬃፈ ጊግዳይሳ ‘ባርካ’ ገይሶ፥ ቃስ ሸምፖይ ባይና ሹቻ ‘ደንዳ’ ገይሶ ነና አየ! እ ዎና ነዉ አይ ቆንጭሳናዉ ዳንዳኢ? ሄኮ፥ ዎርቃንነ ብራን ሜሸትስ፤ እያዉ ሸምፖይ ባዋ።

20 “ሽን ጎዳይ ባ ጌሻ ኬꬃና። ሄሳ ግሾ፥ ሳአን ደእያ አሳ ኡባይ እያ ስንꬃን ስእ ጎ” ያግስ።