1 ሞአበ ቢታባ ጎዳይ ኦድዳ ቃላይ ሀይሳ:+ ሞአበን ደእያ ኤራ ካታማይነ ቂራ ካታማይ እስ ቃማ ላለትድ ꬋይዶሶና። 2 ድቦናን ደእያ አሳይ ባንታ ኤቃ ኬꬃን ዬካናዉ ꬎቃ በሲ ከይዶሶና። ሞአበ አሳይ ነቦስነ መደባስ ዬኬስ። ሁጰ ኡባይ ቡሉሰትስ፤ ቡች ኡባይ ሜደትስ። 3 ኦገ ቦላ ካዮ ማኦ ማኦሶና፤ ፖቀ ቦላነ ዳባባ ኡባን ዬኮሶናነ አፉꬅ ꬋርጮሶና። 4 ሀሰቦና አሳይነ ኤላላ አሳይ ዋሶሶና፤ ኤንታ ዋሶይ ያሃፃ ጋካናዉ ስኤቴስ። ሄሳ ግሾ፥ ኦላስ ዳንጭዳ ሞአበ ዎታዳረት ባንታ ቃላ ꬎቁ ኦꬅድ ዋስዶሶና፤ ኤንታ ሸምፖይ ኮኮርስ። 5 ታኒ ሞአበስ ዎዛናፐ ዬካስ፤ እያን ደእያ አሳይ ዞኣረነ ኤግላት-ሸልሻ ካታማ ባቃትስ። ኤንቲ ሉህታ ኦግያን ዬክሸ ቦሶና፤ ባጋት ቃስ ሆሮናይማ ብያ ኦግያን፥ ባንታ ꬋዩዋ ግሾ ዋሶ ጎችዶሶና። 6 ናምርማ ሃꬃት መልዶሶና፤ ማታይ ምጭስ፤ አጫይ ሹልስ፤ ጭልኦባይ አይብካ ባዋ። 7 ሄሳ ግሾ፥ ኤንቲ ባንታ ሺሽዳ ሻሉዋነ ምንጃ ቶክ ኤክድ፥ አሀያ ምꬃይ ደእያ ዛንጋራፐ ሄፍንꬅ ኤፎሶና። 8 ሞአበ ሄራ ኡባይ ዋሶ ፃላላ ግድስ፤ ኤንታ ዋሶይ ኤግላማነ ብኤር-ኤልመ ጋካናዉ ስኤቴስ። 9 ድሞና ሃꬃት ሱꬅ ግድዶሶና፤ ሽን፥ ሀእካ ታኒ ድሞና ካታማ ቦላ ካሰይሳፈ አꬍያ መቶ ኤሀና። ሞአበፐ ከስ ኤክድ ባቃተይሳታ ቦላነ ሄ ቢታን አትዳይሳታ ቦላ ጋሞ የዳዳ ዉርሳና።