1 አቤት ጎዳዉ፥ ኔኒ ታ ፆሳ። ታኒ ነና ꬎቁ ꬎቁ ኦꬃና፤ ነ ሱንꬃ ጋላታና። ኔኒ ነ ፖሎ አማነተꬃን በንፐ ቆፈትድ ደእያ ማላልስያ ኦሶታ ኦꬃዳሳ። 2 ኔኒ ካታማ ላለꬃ ዶረ ኦꬃዳሳ፤ ምኖ ግምበ ድርሳይ ደእያ ካታማ ላላዳሳ። አላጋታ ካዎ ኬꬃይ ዛሪድ ካታማ ግዶና መላ ኦꬃዳሳ፤ ዛሪድ ፖሎ ኬፀተና። 3 ሄሳ ግሾ፥ ምኖ አሳት ነና ቦንቻና፤ ዎዛና ምኖ ካዎተꬃታ ካታማት ነዉ ያያና። 4 ኔኒ ማንቆይ ባቃትድ አትያ በሲ፥ መቶታንቾይ ቆሰትያ በሲ፥ ኡሾፐ አትያ ገሸነ አዋ ሴላፐ አትያ ኩያ ግዳዳሳ። ዎዛና ምኖ አሳ ሀንቆይ ግምበራ ዶምኤꬅያ ኡሾ መላነ 5 መላ ቢታን ሆንገ መላ። ሻራ ኩያይ አዋ ሴላ እርፅስያ መላ ኔኒ አላጋታ የꬃ ስእ ኦꬃዳሳ፤ ያትን ዎዛና ምኖ አሳ ዋሶይ ስእ ግስ።

6 ኡባፈ ዎልቃማ ጎዳይ አሳ ኡባስ ሀ ዙማ ቦላ ግታ ግብራ ጊግሳና። ሄ ግብራ ቦላ ሞꬎ አሹዋ፥ ሎኦ ካꬅነ ጫልዳ ዎይነ ኡሻ ጊግስስ። 7 እ ሀ ዙማ ቦላ አሳ ኡባ ካምዳ ማጋራጁዋነ ካዎተꬃ ኡባ ቦላ ምጨትዳ ካማ ꬋይሳና። 8 እ መርናዉ ሀይቆ ምታና፤ ኡባ ሃርያ ጎዳይ አይፈ ኡባፈ አፉꬃ ቁቻና፤ ባ አሳ ካዉሻ ቢታ ኡባፈ ድጋና። ጎዳይ ሀይሳ ኦድስ። +

9 ሄ ጋላስ ኤንቲ፥ “ቱማ ሀይስ ኑ ፆሳ፤ ኑኒ እያን አማነትዳ ግሾ እ ኑና አሽስ። ኑ ጎዳይ ሀይሳ፤ ኑኒ እያን አማነትዳ፤ አነ እያ አቶተꬃን ኡፋይቶስ፤ ሀሹ ጎስ” ያጋና።

10 ጎዳ ኩሸይ አሻናዉ ሀ ዙማ ቦላ ሸምፓና። ሽን ኡቱል ኡርቃራ ኦላን የተይሳዳ ሞአበይ የታና።+ 11 ሃ ዋይስ ባ ኩሽያ የደይሳዳ ኤንቲ ባንታ ኩሽያ የዳና። ሽን ጎዳይ እያ ገነ ኩሸ ኦሱዋን ጭመቶና፥ እያ ኦቶሩዋ ካዉሻና። 12 ኤንቲ ꬎቅስድ ግምብዳ ምኖ ድርሳ ግምብያ እ ዎድሳናነ ካዉሻና፤ እ ዱገ ሳአን፥ ኡባ ህርክ ባናን ሆላና።