ጌሻ ማፃፋ እሳያሳ ማፃፋ 44

ዶረትዳ እስራኤለ

1 ሽን ታ አይልያ ያይቆባ፥ ታ ዶርዳ እስራኤለ፥

ሀእካ ስአ።

2 ነና መꬍዳ፥ ነ አየ ኡሎን ነና ጊግስዳ

ጎዳይ ሀይሳዳ ያጌስ።

ታ አይልያ ያይቆባ፥

ታኒ ዶርዳ ይሹሩና፥ ያዮፋ።

3 ታኒ ሳሞትዳ ቢታን ሃꬃ ጉሳና፤

መላ ቢታ ቦላ ሻፋ ጎግሳና።

ታ አያና ነ ናይታ ቦላ፥

ታ አንጁዋ ነ ኮቻ ቦላ ጉሳና።

4 ኤንቲ ሃꬃ ዶናን ዶልዳ ማታዳ፥

ሻፋ ላንቀን ደእያ ምꬃዳ አጫና።

5 እሶይ ባና፥ ታኒ ጎዳባ ያጋና፤

ሀንኮይ ባና ያይቆባ ሱንꬃን ፄጋና፤

ሀራይ ባ ኩሽያ ቦላ፥ “ታኒ ጎዳባ” ያግድ ጫዳና፤

እ እስራኤለ እያ ሱንꬃን ፄገታና።

6 ጎዳይ፥ እስራኤለ ካዎይነ እያ ዎዝዳይ፥

ኡባፈ ዎልቃማ ጎዳይ ሀይሳዳ ያጌስ፦

“ኮይሮይ ታና፤ ዉርሰꬃይ ታና፤

ታፐ ሀራ ፆሲ ባዋ። +

7 ታ መል ኦኔ? ደእኮ አነ አዋጆ፤

አነ ታ ስንꬃን ኤቅድ ኦዶ።

በንፐ ዶምድ፥ ሀንዳባ ኦዶ፤

ስንꬃፈ ሀናናባ ቆንጭሶ።

8 ያዮፍተ፤ ዳጋሞፕተ፤

ታኒ ሀይሳ በንፐ ዶማዳ ኦዳብክና?

ካሰታዳ ኤርሳብክና?

ሄሳስ ህንተ ታዉ ማርካ።

ታፐ አትሽን፥ ሀራ ፆሲ ደኢ?

ሀራ ዛል ባዋ፤

ኦንካ ባይናይሳ ታ ኤራይስ” ያጌስ።

9 ኤቃ ምስለታ መꬍያ ኡባይ ሀዳ፤

እያን ኡፋይትያባት ኤንታ ጎኦኮና።

ኤንታ ማርካት ቆቀታ ኤንታዉ ኤር ባዋ፤

ኤንቲ ዬላታና።

10 ባና ጎኦና ኤቃ

ፆሳ ኦꬅድ ጊግስዳይ ኦኔ?

11 ኤቃ መይ አሰፐ አትሽን፥ ሀራ ግደና፤

እነ እያ ላገት ዬላታና፤

ኡባት እስፈ ሺቅድ ኤቆ፥ ያዮ፥ ዬላቶ።

12 ብራታ ቆፀይስ ኤቃ ኦꬃናዉ

ባ ብራታ ታማን ሴርስድ ማላ እማናዉ

ባ ምኖ ኩሽያን ናርቃን ቆፄስ።

ሄሳ ጊግስሸ ኮሻቴስ፤

እያ ዎልቃይ ዉሬስ፤

ሳሞተስነ ላባኔስ።

13 አናፀይ ዎዶሮን ልክድ

እርሳሰን እያ ቦላ ማላ ዎꬄስ፤

ሊቅስያ ሚሸን ሊቅሴስ።

ሎኦ አሳ ማላን መꬍድ

ባ ኤቃ ኬꬃን ዎꬄስ።

14 እ ሄሳ ኦꬃናዉ ዝጋ ቃንፄስ፤

ዎላ ዎይኮ ፂዳ ዎራ ግዶፈ ዶርድ

ድጫና መላ ኦꬄስ።

ዎይኮ ዝጋ ቶክድ

እራን ድጫና መላ ናጌስ።

15 እያፐ ባጋ ኤꬃናዉ ጎኤቴስ፤

እያፐ ባጋ ኤክድ፥ ኤꬅድ ካዬስ፤

ባጋ ኤꬅድ ካꬅ ካꬄስ።

አትዳይሳ ኤክድ ፆሰ ኦꬅድ እያዉ ጎይኔስ፤

ኤቃ መꬍድ እያ ስንꬃን ጉፋኔስ።

16 እያፐ ባጋ ኤꬅድ ካꬅ ካꬄስ፤

ባጋን አሾ ጫጭድ ካልድ ሜስ።

ቃስ ታማ ካይሸ፥ “ኤሮሾ፥ ታማ ጎፓ፤

ዋን ሆእ” ያጌስ።

17 ቃስ አትዳ ምꬃ ማስድ፥

ጎይንያ ፆሳ ምስለ ከሴስ።

ሄ ምስልያ ስንꬃን ጉፋንድ፥ እያዉ ጎይኔስ፤

“ኔኒ ታዉ ፆሰ ግድያ ግሾ፥

ታና አሻ” ያግድ ዎሴስ።

18 ኤንቲ አይኮካ ኤሮኮና፤ አይኮካ አኬኮኮና፤

ኤንቲ በኦና መላ ኤንታ አይፈይ ጎዘትስ፤

አኬኮና መላ ኤንታ ዎዛናይ ጎርደትስ።

19 ኤቃ ኦꬅያ አሳ ግዶፈ ባ ዎዛናን፥

“እያፐ ባጋ ታማን ኤꬃስ፤

እያ ቦንቁዋን ካꬅ ካꬃስ፤

እያን አሾ ጫጫዳ ማስ።

እያፐ አትዳይሳ እፀትዳ ኤቃ ኦꬃዳ መꬎ?

አትዳ ጩገꬃ ምꬃስ ጉፋናዳ ጎይኖ?”

ያግድ ቆፕያ ዎይኮ አኬክያ አስ ባዋ።

20 እ ብዶ ሜስ፤ እያ ጭመትዳ ዎዛናይ

እያ ሀራ ሶ ካለꬅስ።

እ ባ ሸምፑዋ አሻናዉ ዳንዳኤና፤

“ሀይስ ታ ኡሻቻ ኩሸን ደኤይ ዎርዶ ግደና”

ጋናዉ ዳንዳኤና።

21 ጎዳይ ሀይሳዳ ያጌስ፦

“ያይቆባ፥ ሀይሳ አኬካ፤

እስራኤለ፥ ኔኒ ታ አይለ ግድያ ግሾ ሀይሳ ሀሳያ።

ታኒ ነና መꬋስ፤ ኔኒ ታ አይለ፤

ነኖ እስራኤለ፥ ታኒ ነና ዶግከ።

22 ታኒ ነ ናጋራ ፕታዳ ድጋስ፥

ነ ናቁዋ ጫጋናዳ ቁቻስ።

ታኒ ነና ዎዝዳ ግሾ፥

ታኮ ስማ” ያጌስ።

23 “ህንተኖ ሳሎቶ፥ ጎዳይ ሀይሳ ኦꬅዳ ግሾ፥

ኡፋይሳን የፅተ፤ ነኖ ቢታዉ፥ እልላ።

ህንተኖ ደረቶ፥ ዎራዉነ

እያ ግዶን ደእያ ምꬃ ኡባይ ማዝሙረ የፅተ።

ጎዳይ ያይቆባ ዎዝስ፤

እስራኤለ ግዶን ቦንቸትስ።

24 ነ አየ ኡሎን ነና መꬍዳይስ፥

ነና ዎዝዳይስ ጎዳይ ሀይሳዳ ያጌስ፦

ኡባባ መꬍዳይ፥ ሳሎታ ታርካ ምጭዳይ፤

ሳኣካ ታርካ ሂፅዳይ፥ ታኒ ጎዳ።

25 ታኒ ዎርዶ ናበታ ትንብትያ ሀዳ ኦꬃስ፤

ማሮታ ካዮዋ ኤያተꬅ ከሳስ።

ታኒ ጭንጫታ ጭንጫተꬃ ሽራ የጋስ፤

ኤንታ ኤራ ኤያ ኦꬃስ።

26 ታኒ ታ አይለታ ቃላ ምንꬃና፤

ታ ናበታ ትንብትያ ፖላና።

ታኒ የሩሳላመ ካታማ፥

‘ኔኒ አሳይ ደእያ በሲ ግዳና’ ያጋስ፤

ይሁዳ ካታማታ፥

‘ህንተ ስሚድ ኬፀታና፤ ህንተ ግምበይ ኦራፃና’ ያጋስ።

27 ታኒ ጎግያ ሃꬃታ መልሳና ግሾ

ጪሞ ሃꬃ፥ ‘ነ መላ’ ያጋና።

28 ቅሮሳኮ፥ ‘ኔኒ ታ አሳ ሄመይሳ፤

ኔኒ ታ ሀልቹዋ ፖለይሳ’ ያጋና።

እ፥ የሩሳላመ ካታማ፥ ‘ኔኒ ስማዳ ኬፀታና’፤

ፆሳ ኬꬃ፥ ‘ነ ባሶይ የገታና’ ” ያጋና።