ጌሻ ማፃፋ እሳያሳ ማፃፋ 59

ናጋራነ ፕርዳ

1 ሄኮ፥ ጎዳ ኩሸይ

ህንተና አሻናዉ ቃምቤና፤

እያ ሀይꬃይ ስአናዉ ቱልቤና።

2 ሽን ህንተ ናጋራይ ህንተፈነ

ህንተ ፆሳፈ ግዶን ሻሄተꬅ መꬍስ።

እ ስኦና መላ ህንተ ናጋራይ

እያ ሶምኡዋ ህንተፈ ገንꬅስ።

3 ህንተ ኩሸይ ሱꬃን፥

ህንተ ብራይ ናቆን ቱንስ፤

ህንተ ዶናይ ዎርዶ ኦደቴስ፤

ህንተ እንፃርሳይ ኢታባ ዙዙሜስ።

4 ፅሎተꬃን ሞተይ ባዋ፤

ሱረተꬃን ፕርደይካ ባዋ።

ኤንቲ ጮ ፓላማን ጬቀቶሶና፤

ዎርዶ ኦደቶሶና፤

ጭሞ ቃንꬃትድ ኢታተꬅ የሎሶና።

5 ኤንቲ ሾሻ ጱጱለ ሀጶሶና፤

ሻንጎ ሃዳ ዳዶሶና።

ሄ ጱጱለታ ምያ አስ ሀይቄስ፤

ጱጱልያፈ እሶይ መቅኮ፥

እያፐ ሾሽ ከዬስ።

6 ኤንቲ ዳድዳ ሻንጎ ሃዳይ ማኦስ ሀነና፤

እያራ ባንታ አሳተꬃ ካማናዉ ዳንዳኦኮና።

ኤንታ ኦሶይ ኢታ፤

ጌላ ኦሶይ ኤንታ ኩሸን ኩምስ።

7 ኤንታ ቶሆት ኢታባ ኦꬃናዉ ዎፆሶና፤

ፅሎ ሱꬅ ጉሳናዉ ኤሶቶሶና።

ኤንታ ቆፋይ ኢታ፤ ኤንቲ ብዳ በሳ ኡባን

ቆሆይነ ቦሽ ደኤስ።

8 ኤንቲ ሳሮተꬃ ኦገ ኤሮኮና፤

ኤንታ ኦግያን ሱረ ፕርድ ባዋ።

ኤንቲ ባንታ ኦግያ ጌላይዶሶና፤

ሄ ኦግያራ ሄመትያ ኦንካ ሳሮ ደመና።

9 ሄሳ ግሾ፥ ሱረ ፕርድ ኑፐ ሃክስ፤

ፅሎተꬅ ኑኮ ሺቀና።

ኑኒ ፖኦ ኮዮስ፥ ሽን ꬉማ ግድስ፤

ዋጋጋ ፖኦ ኮዮስ፥

ሽን ሳካና ꬉማን ሄመቶስ።

10 ኑኒ ቆቀዳ ድርሳ ግምብያ ቦላ ታታፎስ፤

ሴታ ጋላስ፥ ሳእ ለምእን ሄመትያዳ ꬉበቶስ፤

ዎልቃራ ደእያ አሳ ግዶን

ኑኒ ሀይቅዳ አሳ መላ ግድዳ።

11 ኑኒ ኡባይ ባባንꬃዳ ዋሶስ፤

ሆለዳ ካዮትድ ኦሎስ።

ኑኒ ሱረ ፕርዳ ኮይዳ፥

ሽን ደምቦኮ፤

አቶተꬅ ኮይዳ፥ ሽን እ ኑፐ ሃክስ።

12 ኑ ባላይ ነ ስንꬃን ዳርስ፤

ኑ ናጋራይ ኑ ቦላ ማርካቴስ።

ኑ ናቆይ ኑራ ደኤስ፤

ኑ ቆሁዋ ኑ ኤሮስ።

13 ኑኒ ማካልድ፥ ጎዳ ካꬍዳ፤

ኑ ፆሳ አግድ ጉየ ስምዳ።

ጌላተꬅነ ገነ ኦደትዳ፤

ኑኒ ዎርዶ ቃንꬃትድ ዎርዶ የልዳ።

14 ሱረ ፕርድ ጉየ ሱገትስ፤

ፅሎተꬅ ኑፐ ሃክስ።

ቱማተꬅ ዳባባን ꬉበቴስ፤

አማነተꬅ ገላናዉ በሰ ꬋይስ።

15 ቱማተꬅ አዉንካ በንተና፤

ኢታተꬃፈ ሃክያ አስ ቆሆስ አꬍድ እመቴስ፤

ጎዳይ ሱረ ፕርድ ባይናይሳ በእድ አዛንስ።

16 ኡንኤተይሳታ ማድያ አስነ

ኤንታዉ ጋናትያ አስ ባይናይሳ

ጎዳይ በእድ ማላለትስ።

ሄሳ ግሾ፥ እያ ቀሰይ እያዉ አቶተꬅ ኤህስ፤

እያ ፅሎተꬃይ እያ ካትስድ ኦይክስ። +

17 እ፥ ፅሎተꬅ ትራን ዎꬅያ ኦላ ሚሸዳ ማእስ፤

ባ ሁጵያን አቶተꬃ ባርኔፃ ዎꬅስ፤

ሀሎ ከስ ማኦዳ፥ ሀንቆ አፍላዳ ማእስ።

18 እ ኤንታዉ ኤንታ ኦሱዋዳ ኦሱዋዳ ዛራና፤

ሀንቁዋ ባ ሞርከታስ፥

ሴራ ባራ ኤቀተይሳታስ ጭጋና፤

ዩሾይ አባን ተቀትዳ ቢታታስ ኤንታ ኦሱዋዳ እማና።

19 ጎዳ ፔኖይ ዎልቃማ ጎተዳ ድእሸ ያና ግሾ፥

ዉሎሀ ባጋን ደኤይሳት ጎዳ ሱንꬃስ ያያና፤

ዶሎሀ ባጋን ደኤይሳት እያ ቦንቻና።

20 “ፅዮነስነ ያይቆባ ዘረꬃ ግዶን

ባንታ ናጋራፐ ስመይሳታ ዎዘይስ ያና።

21 ታዉ ኤንታራ ደእያ ጫቆይ ሀይሳ፦

ህንተ ቦላ ደእያ ታ አያናይነ

ታኒ ህንተ ዶናን ዎꬅዳ ታ ቃላይ፥

ሀችፈ ዶምድ፥ መርና ጋካናዉ፥

ህንተ ዶናፐ፥ ህንተ ናይታ ዶናፐነ

ህንተ ናይታ ናይታ ዶናፐ ሻከተና”

ያጌስ ጎዳይ።