63
ፆሳ ፕርዳ ጋላስ
1 ኤዶመ ቢታን፥ ባሶራ ካታማፐ
ዞኦ ማኦ ማእድ የይ ሀይስ ኦኔ?
ቦንቾ ማኦ ማእድ
ባ ዎልቃ ምኖተꬃን ስን ሆርዶፈይ ኦኔ?
“ፅሎ ኦደተይነ
አሽያ ዎልቅ ደኤይ ታና”
ያጌስ ጎዳይ።
2 ዎይነ ጉምእያሶን ዎይነ የꬍያ አሳ ማኦዳ
ነ ማኦይ አይስ ዞእዴ?
3 “ታኒ ዎይነ ጉምእያሶን ዎይንያ ታርካ የꬋስ፤
ካዎተꬃታፐ እስ አስካ ታራ ባዋ።
ታኒ ኤንታ ታ ሀንቁዋን የꬋስ፤
ታ ይሉዋን ኤንታ ድርፀረꬃስ።
ኤንታ ሱꬃይ ታ ማኡዋ ቦላ ꬋርጨትን፥
ታ ማኦ ኡባይ ኢትስ።
4 ታኒ ታ አሳ ዎዝያ ጋላሳይነ
ኤንታ ሞርከታ ሀሎ ከይያ ላይꬃይ ጋክስ።
5 ታኒ በአስ፥
ሽን ታና ማድያ እስ አስካ ደማብከ፤
ማደይ ꬋይዳ ግሾ፥ ታኒ ማላለታስ።
ሄሳ ግሾ፥ ታ ቀሰይ ታዉ አቶተꬅ ኤህስ፤
ታ ሀንቆይ ታና ማድስ።
6 ታኒ ታ ሀንቁዋን ካዎተꬃታ የꬋስ፤
ታ ይሉዋን ኤንታ ድርፀረꬃስ፤
ኤንታ ሱꬃ ቢታን ጉሳስ” ያጌስ ጎዳይ።
ዎሳነ ጋላታ
7 ጎዳይ ኑስ ኦꬅዳ ኦሶ ኡባ፥
ጎዳይ ባ ማሮተꬃንነ ባ ቃꬍያን
እስራኤለ አሳስ ኦꬅዳ ሎኦ ኦሶ ኡባነ
እያ ሱንꬃይ ጋላተታና መላ
በስዳ ኬሀተꬃ ኡባ ታኒ ኦዳና።
8 እ፥ “ኤንቲ ቱማ ታ አሰነ ታ ናአ ግድያ ግሾ፥
ታዉ ዎርዶቶኮና” ያግስ።
ሄሳ ግሾ፥ እ ኤንታ አሸይሳ ግድስ።
9 ኤንታ ዋየ ኡባ እ ዋየትስ፤
እያ ስንꬃ ኪታንቾይ ኤንታ አሽስ።
እ ኤንታ ባ ሲቁዋንነ ባ ማሮታን ዎዝስ፤
ካሰ አꬍዳ ዎደታ ኡባን እ ኤንታ ቶክስ።
10 ሽን ኤንቲ ማካልዶሶና፤
እያ ጌሻ አያና አዛንꬅዶሶና።
ሄሳ ግሾ፥ እ ስሚድ፥
ኤንታዉ ሞርከ ግድስ፤ ኤንታ ኦልስ።
11 ሄሳፈ ጉየ አሳይ በንባነ
ባ አይልያ ሙሰ ዎደ ኦꬅዳባ ቆፕድ፥
ሀይሳዳ ያግዶሶና፦
“ባ ዉድያ ሄንꬃንቾታራ እስፈ
አባ ግዶራ ካንꬅስዳ ፆሳይ አዉን ደኢ?
ሄ ዎደ ባ ጌሻ አያና ኤንታ ግዶን፥
ዎꬅዳ ፆሳይ ሀእ አዉን ደኢ?
12 ባዉ መርና ሱንꬁ ግዳና መላ
ኤንታ ስንꬃን ሃꬃ ሻክድ፥ ባ ቦንቾ ዎልቃማ ቀሰይ
ሙሰስ ኡሻቻ ኩሸ ግዳና መላ ኪትዳይስ አዉን ደኢ?
13 ቢታ ቦላራ ፓር ብያዳ ኤንቲ ꬉበቶና
ጪሞ ሃꬃ ግዶራ ፕንꬅዳይስ አዉን ደኢ?”
ያግዶሶና።
14 ዛንጋራ ዎꬍያ መሄዳ፥
ጎዳ አያናይ ኤንታዉ ሸምፖ እሚስ።
ነ ሱንꬃይ ቦንቸታና መላ
ሄሳዳ ኦꬃዳ ነ አሳ ካለꬃዳሳ።
15 አቤት ጎዳዉ፥ ሳሎራ ዱገ ፄላ፤
ኔኒ ደእያ ጌሽነ
ቦንቾ ግድዳ አራታፐ በአ።
ነ ቅናተይነ ነ ዎልቃይ አኔ?
ነ ማሮታይነ ነ ቃይ ኑፐ ሃክስ።
16 አብራሃመይ ኑና ኤሮና እፅኮካ፥
ያይቆብ ኑና አኬኮና እፅኮካ፥
አቤት ጎዳዉ፥ ኔኒ ኑ አዋ፤
በንፐ ዶምድ፥ ነ ሱንꬃይ ኑና ዎዘይሳ።
17 አቤት ጎዳዉ፥ ኑኒ ነ ኦግያፐ
ꬋያናዳነ ነዉ ያዮናዳ
ኑ ዎዛና አይስ ሙምሳዲ?
ጎዳዉ፥ ነ አይለታ ግሾ፥
ነ ላታ ግድዳ ኮቻታ ግሾ፥
ኑኮ ስማ።
18 ነ ጌሻ አሳይ
ነ ኬꬃ ጉꬃ ዎደስ ላትዶሶና፤
ሽን ሀእ ኑ ሞርከት እያ የꬍዶሶና።
19 ኑኒ በንፐ ነባ፤
ሽን ኤንታ ኔኒ ሃራባካ፤
ነ ሱንꬃንካ ኤንቲ ፄገትቦኮና።