12
እዮባ ሃሳያ
1 እዮብ ሀይሳዳ ያግድ ዛርስ።
2 ኤ፥ ህንተ ቱማካ አሰ፤
ጭንጫተꬅ ህንተራ ሀይቃና!
3 ሽን ታካ ህንተዳ አኬክ ደእያ አስ፤
ታኒ ህንተፈ ጉፅከ፤
ሀ ህንተ ኦደትዳባ ኤሮናይ ኦኔ?
4 ታኒ ፆሳ ዎስን እ ታና ስእዳ አስ ግድኮካ፥
ሀእ ታ ላገታስ ሚቻስ አታስ፤
ታኒ ፅሎነ ቦረይ ባይና አስ ግድኮካ ቀልቅሰꬃስ አታስ።
5 መቶትድ በእቦና አስ ሀራ አሳ መቶን ሚጬስ፤
ህንተ ኩንዳናዉ ጋንድጋርያ አስ ሱጌታ።
6 ቦንቀይሳታ ኬꬃይ ሳሮ ደኤስ፤
ፆሳ ይሎየይሳት ህርግ ባይና ደኦሶና፤
ባንታ ዎልቃ ባንታዉ ፆሰ ኦꬆሶና።
7 አነ መሄታ ኦይቻ፤ ኤንቲ ነና ታማርሳና፤
ዎይኮ ሳሎ ካፎታ ኦይቻ፤ ኤንቲ ነዉ ኦዳና።
8 ዎይኮ ሳአ መተꬃታስ ኦዳ፤ ኤንቲ ነና ታማርሳና፤
አባ ሞሎትካ ነዉ ኦዳና።
9 ጎዳ ኩሸይ ሄሳ ኦꬅዳይሳ ኤሮናይ ኦኔ?
10 ደኦይ ደእያ መተꬅ ኡባይነ
አሳ ሸምፖይ እያ ኩሸና።
11 እንፃርስ ካꬅ ሻክድ ኤረይሳዳ፥
ሀይꬅ ኦዳ ሻክድ ኤረነዬ?
12 ጭንጫተꬅ ዶንꬒዳ አሳ ማታን ደነዬ?
ዳሮ ላይꬅ ደእዳ አሳ ማታን አኬክ በንተነዬ?
13 ጭንጫተꬅነ ዎልቅ ፆሳሳ፤
ዞረይነ አኬክ እያ ማታን በንቴስ።
14 ፆሳይ ላልዳባ ዛር ኬፃናይ ኦኔ?
እ ቃችዳ ኡራ ብርሻናይ ኦኔ?
15 ፆሳይ እራ ተቅኮ ቢታይ መሌስ፤
እራ ቡክስኮ ድኦይ ቢታ ꬋይሴስ።
16 ምኖተꬅነ ፆኖይ ፆሳሳ፤
ጭመተይስነ ጭመይስ ናምአይካ እያፐ ጋርሳን ደኤስ።
17 ዞረይሳታፐ ጭንጫተꬃ ቃር ኤኬስ፤
ሀላቃታካ ኤያ ከሴስ።
18 እ ካዎታ አራታፐ ዎꬅድ አይለ ከሴስ።
19 ካህነታፐ ቦንቹዋ ቃር ኤኬስ፤
አዱሳ ዎደ ፃጶ የድዳ ዎልቃማታ ሽር የጌስ።
20 አማነትዳ ዞረይሳታ ስእ ኦꬄስ፤
ጭማታፐካ አኬካ የግሴስ።
21 ቦንቸትዳይሳታ ካዉሼስ፤
ምኖታ ዳንጮ ብልሴስ።
22 ꬉማን ደእያ ፁራ ቆንጨ ከሴስ፤
ሌልዳ ꬉማ ፖኦ ከሴስ።
23 ፆሳይ ካዎተꬃታ ግታዬስ፤ ዛሪድ ꬋይሴስ፤
ካዎተꬃታ ዳልግሴስ፤ ዛሪድ ላሌስ።
24 አላምያ ካዎታ አኬካ ድጌስ፤
ኦገይ ባይና መላ ቢታን ቶይላታና መላ ኦꬄስ።
25 ፖኦይ ባይና ꬉማን ታታፎሶና፤
ማꬆትዳ አሳዳ ጋንድጋሮሶና።