16
እዮባ ሃሳያ
1 እዮብ ሀይሳዳ ያግድ ዛርስ፤
2 “ታኒ ሄሳ መላ ሃሳያ ዳሮ ስአስ፤
ህንተ ምንꬆይ ታና ሳለꬅስ።
3 ጎእ ባይና ህንተ ኦዳስ ዉርሰꬅ ባዌ?
ታራ ህንተና ሄሳዳ ፓላንꬅያ ጋሶይ አይቤ?
4 ህንተ ታ በሳን፥ ታኒ ህንተ በሳን ግድዳባ ግድያኮ፥
ታኒ ታ ሁጵያ ቃꬃሸ፥
ሀእ ህንተ ግያባ ኡባ ህንተ ቦላ ሎይꬃዳ ጋናሽን!
5 ታ ዞርያን ታ ህንተና ምንꬃናሽን!
ታ ዶናፐ ከይያ ኦዳይ ህንተና ምንꬃናሽን!
6 “ሽን ታ ሃሳይኮካ ታ ሳሆይ ደጨና፤
ታ ስእ ጋዳ ዳንዳእኮካ ታፐ ክቸና።
7 አቤት ፆሳዉ፥ ነ ታና ታ አሳተꬃፈ ከሳዳሳ፤
ታ ኬꬃ አሳ ኡባ ꬋይሳዳሳ።
8 ሹቅዳ ታ ጎጋይ ታዉ ማርካ ግድስ፤
ታ ግልቃተꬃይ ታና ናጋራንቾ ከስስ።
9 ፆሳይ ሀንቀትድ ታ አሳተꬃ ቃንፀረꬅስ፤
ታና እፅድ ባ አቻ ታ ቦላ ጋርጭስ፤
ታ ሞርከይ ባ አይፍያ ታ ቦላ ከስስ።
10 አሳይ ታ ዩሾን ሺቅድ ታና ቀልቅስዶሶና፤
ታና ለቅድ ባቅዶሶና።
11 ፆሳይ ታና ናጋራቾታስ አꬅድ እሚስ፤
ኢታታ ኩሸን ታና የግስ።
12 ታኒ ካሰ ሳሮ ደአስ፤
ሽን ፆሳይ ታና ትንቸረꬅስ፤
ታ ምርጋጭያ ኦይክድ ታና መንረꬅስ፤
ጫቸ ሎህስያ ማላ ኦꬅስ።
13 እያ ቶራንቾት ባንታ ዶንገን ታና ተቅዶሶና፤
ቃይ ባይና ታ ክላሁዋ ሙፀረꬅዶሶና፤
ታ ጭያ ሳአን ጉስዶሶና።
14 እ ታና ዛር ዛር ማዱንፅስስ፤
ኦላንቾዳ ቶልድ ጫድስ።
15 ታኒ ካዮ ማኦ ማአስ፤
ታ ዎልቃይ ዉርን ባናን ኡታስ።
16 ዬሆን ታ ሶምኦይ ጋቢስ፤
ታ አይፈይ ዞእስ።
17 ሽን ሄ ኡባን ታ ባልዳባይ ባዋ፤
ታ ጌሻ ዎዛናን ዎሳይስ።
18 ቢታዉ፥ ታና ጋክዳ ቆሁዋ ካሞፋ፤
ታ ዋሶይ ሸምፕያ ሶ ደሞፎ።
19 ሄኮ ታ ማርካይ ሳሎና፤
ታ ፃባቃይ ቦላና።
20 ታ ላገት ታና ካꬍድ ፄሎሶና፤
ታ አይፈይ ፆሳ ስንꬃን አፉꬅ ትጌስ።
21 አሰ አሳራ ስገꬅያ አስ ደኤይሳዳ፥
ታና ፆሳራ ስገꬅያ አስ ደእዳባ ግድረነሽን።
22 ታ ላይꬃይ ዉራና ሀኔስ፤
ጉꬃ ዎደፐ ጉየ ታ ስሞና ሶ ባና።