1 እስራኤለ አሳይ ዮርዳኖሰ ሻፋፐ ዶሎሀ ባጋራ ደእያ አርኖና ዛንጋራፐ ብድ አርሞና ዙማ ጋካናዉ፥ ቃስ ዶሎሀ ባጋራ ዮርዳኖሰ ዛንጋራ ጋካናዉ ደእያ ቢታ ኡባ ኦልድ ኦይክስ። ሄ ፆነትዳ ካዎት ሀይሳፈ ካልድ ፃፈትዳይሳታ፤ 2 ሀሰቦናን ኡትድ ሃርያ አሞረታ ካዋ ስሆና። እ ጋላዳ ቢታስ ባጋ ኤክድ፥ አርኖና ዛንጋራ ማታን ደእያ አሮራፐ ደንድድ፥ አሞነታ ዛዋ ያቦቃ ሻፋ ጋካናዉ ደኤይሳ ሃሬስ። 3 ቃስ ዶሎሀ ባጋራ ዮርዳኖሰ ዛንጋራን ከነሬታ አባፈ ብድ፥ ቤት-ያሽሞታ ባጋራ ማፅነ አባ ካንꬅድ፥ ፕስጋ ደርያፐ ጋርሳ ባጋራ ደእያ ቢታታ ሃሬስ።

4 ሄሳዳካ፥ ራፋይመታ ሼሻፐ ዉርሰꬅ ግድዳ፥ አስታሮተነ ኤድራአ ሃርያ፥ ባሳነ ካዋ ኦገ ፆንስ። 5 ኦገይ፥ ሃርያ ዛዋይ ፑደሀን አርሞና ዙማ፥ ዶሎሀን ሳላካ ካታማ ጋክድ፥ ዉሎሀን ጌሹረታነ ማካታ ዛዋ ጋካናዉ ደእያ ባሳነ ቢታ ኡባ ጋኬስ። ሀሰቦና ካዋ ስሆና ቢታ ጋላዳ ፑደሀ ባጋ ጉጅድ ሃሬስ።

6 ጎዳ አይለይ ሙሰይ ካለꬅን፥ እስራኤለ አሳይ ሀ ካዎታ ፆንዶሶና። ጎዳ አይለይ ሙሰይ ኤንታ ቢታ ሮቤላ ኮቻታስ፥ ጋዳ ኮቻታስነ ምናሰ ኮቻፈ ባጋስ ሻክድ ላትስስ።

7 እያሱይነ እስራኤለ አሳይ ዮርዳኖሰ ሻፋፐ ዉሎሀ ባጋን ደእያ ካዎታ ኡባ ፆንዶሶና። ሄ ቢታይ ልባኖሰ ዛንጋራን ደእያ ባኣል-ጋደፐ ብድ፥ ዱገሀ ባጋራ ሳይረ ማታን ደእያ ሀላቃ ደርያ ጋኬስ። እያሱይ ሄ ቢታ ሻክድ፥ እስራኤለ ኮቻታስ ላታ ቢታ ኦꬅድ እምስ። 8 ሄ እ እምዳ ቢታይ፥ ደረይ ዳርያ ቢታ፥ ዉሎሀ ባጋን ደእያ ጋꬋ፥ ዮርዳኖሰ ዛንጋራ፥ ይሁዳነ ነገበ መላ ቢታ። ሄ ቢታይ ካሰ ህተት፥ አሞረት፥ ካናነት፥ ፓርዘት፥ ህወትነ ያቡሰት ደእያ ቢታ። 9 እስራኤለ አሳይ ፆንዳ ካዎት ሀይሳፈ ካልድ ፃፈትዳይሳታ፤ እያርኮ ካዋ፥ ቤተለ ማታን ደእያ ጋየ ካዋ፥ 10 የሩሳላመ ካዋ፥ ከብሮና ካዋ፥ 11 ያርሙታ ካዋ፥ ላክሶ ካዋ፥ 12 ኤግሎና ካዋ፥ ገዘራ ካዋ፥ 13 ዳብራ ካዋ፥ ገደራ ካዋ፥ 14 ሆርማ ካዋ፥ አራዳ ካዋ፥ 15 ልብና ካዋ፥ አዱላማ ካዋ፥ 16 ማቀዳ ካዋ፥ ቤተለ ካዋ፥ 17 ታፑሀ ካዋ፥ ሄፌራ ካዋ፥ 18 አፌቃ ካዋ፥ ሳሮና ካዋ፥ 19 ማዶና ካዋ፥ ሀዞራ ካዋ፥ 20 ሽምሮን-ማሮና ካዋ፥ አዝፋ ካዋ፥ 21 ታናካ ካዋ፥ ማግዶ ካዋ፥ 22 ቃደሳ ካዋ፥ ቃርመሎሳን ደእያ ዮቅናመ ካዋ፥ 23 ገዘን ደእያ ዶራ ካዋ፥ ጋልጋላን ደእያ ጎይማ ካዋነ 24 ትርሳ ካዋ።