5
እስራኤለ አሳ ቃፃረተꬃ
1 ዮርዳኖሰ ሻፋፐ ዉሎሀ ባጋን ደእያ አሞረታ ካዎትነ መደትራነ አባ ላንቀን ደእያ ካናነታ ካዎት ኡባይ፥ እስራኤለ አሳይ ፕናና ጋካናስ ዮርዳኖሰ ሻፋ ጎዳይ ዋት መልስዳኮ ስእዳ ዎደ ኤንታ ዎዛናይ ትልእን፥ እስራኤለ አሳራ ኤቀታናዉ ፃላተꬅ ꬋይዶሶና።
2 ሄ ዎደ ጎዳይ እያሱኮ፥ “ሳሎ ሹቹ ቃራያዳ እስራኤለ አደ አሳ ናምአንꬆ ቃፃራ” ያግስ።
3 እያሱይ ቃራ ሳሎ ሹቻ ኤክድ፥ “ቃፃራ ደረ” ጌተትያ በሳን እስራኤለታ ቃፃርስ።
4 እ ሄሳ ኦꬅዳይ፥ ግብፀፈ ከይዳ አደታን ላይꬅ ኦላስ ጋክዳ ኡባይ መላ ቢታን ሀይቅ ዉርዳ ግሾሳ።
5 ግብፀፈ ከይዳ አደ አሳ ኡባይ፥ ቃፃረትዶሶና፥ ሽን ግብፀፈ ብሸ መላ ቢታን የለትዳ አደ ናይት ቃፃረትቦኮና።
6 ግብፀፈ ከይያ ዎደ ላይꬅ ኦላስ ጋክዳ አደ አሳ ኡባይ ጎዳስ ኪተቶና እፅዳ ግሾ፥ ኤንቲ ሀይቅድ ዉራና ጋካናስ እስራኤለት መላ ቢታን ኦይታሙ ላይꬅ ዩይዶሶና። ጎዳይ፥ ኑስ እማና ግድ ኤንታ ማይዛታስ ጫቅዳ ኤስነ ማꬅ ጎግያ አራዳ ቢታ ሀይቅዳ ኤንታ ናይት ላቶና መላ ካሰ ጫቅስ።
7 ሄሳ ግሾ እያሱይ ቃፃርዳይ ጎዳይ ኤንታ በሳን ደንꬅዳ ኤንታ ናይታ። ኤንቲ ኦገ ቦላ የለትዳ ግሾ ቃፃረትቦኮና።
8 አሳ ኡባይ፥ ቃፃረትዳፐ ጉየ፥ ኤንታ ማዱንꬃይ ፓፃና ጋካናዉ ኤንቲ ዱንካንዳ በሳን ጋምእዶሶና።
9 ጎዳይ እያሱኮ፥ “ሀች ታኒ ግብፀታ ቦርያ ህንተፈ ድጋስ” ያግስ። ሄሳ ግሾ፥ ሄ በሳ ሱንꬃይ ሀች ጋካናዉ ጋልጋላ ጌተትድ ፄገቴስ።
10 እስራኤለ አሳይ እያርኮ ደንባን ጋልጋላ ጌተትያ በሳን ዱንካንድ፥ ኮይሮ አጌናን ታማነ ኦይዳንꬆ ጋላሳን ኦማርስ ፓስካ ባልያ ቦንችዶሶና።
11 ፓስካፐ ጉየ፥ ዎንተꬃ ጋላስ፥ ሄ ጋድያን ዶልዳ ካꬃ አይፍያ፥ ኡይꬁነ ትያ ጫጫ ምዶሶና።
12 ሄ ጋድያን ሞክዳ ካꬃ ኤንቲ ምዳ ዎንተꬃ ጋላስ ማናይ ዎይሳ አግስ። ሄ ዎደፐ ዶምድ እስራኤለ አሳይ ማና ደምቦኮና። ሄሳፈ ጉየ ኤንቲ ካናነን ካፅዳ ካꬃ ምድ ደእዶሶና።
እያርኮ ኩንደꬃ
13 እያሱይ እያርኮ ማታን ደእያ ዎደ ማሻ ኦይክድ ባ ስንꬃን ኤቅዳ እስ አደ በእስ። እያሱይ እያኮ ሺቅድ፥ “ኔን ኑ ባጋየ ዎይኮ ኑ ሞርከታ ባጌ?” ያግድ ኦይችስ።
14 አደይ ዛሪድ፥ “ታኒ ኦደ ባጋካ ግድከ። ሽን ታ ጎዳ ቶራ ሞጮና ግዳዳ ያስ” ያግስ።
እያሱይ ሳአን ኩንድ ጎይንድ፥ “ታ ጎዳዉ፥ ታ ኦꬃናባ ታዉ ኦዳ” ያግስ።
15 ጎዳ ቶራ ሞጮናይ እያሱኮ፥ “ኔን ኤቅዳ በሳይ ጌሽ ግድያ ግሾ፥ ነ ቶሁዋፐ ጫማ ከሳ” ያግስ። ያትን እያሱይ እ ግዳይሳዳ ኦꬅስ።