20
ኪተተꬃ እፆይ ኤህያ ሴራ
1 ጎዳይ ሙሰኮ ሀይሳዳ ያግስ።
2 እስራኤለ አሳስ ሀይሳዳ ያጋዳ ኦዳ፤ “እስራኤለ አሳፐ ግድን፥ ዎይኮ ህንተ ግዶን ደእያ አላጋ አሳፐ ግድን፥ ኦንካ ባ ናአ ሞሎካ ጌተትያ ኤቃስ አꬅድ እምኮ፥ እ ሀይቆ፤ እስራኤለ አሳይ እያ ሹቻን ጫድድ ዎꬎ።
3 ባ ናኣ ሞሎካ ጌተትያ ኤቃስ እምድ ታ ዱንካንያ ቱንሰይነ ታ ጌሻ ሱንꬃ ካዉሸይ ታ ስንꬃን እፀትዳባ ግዳና። ታ አሳ ግዶፈ ሻካዳ ታኒ እያ ꬋይሳና።
4 ሽን ሄ ኡራ እስራኤለ አሳይ በእሸ ቀል ግድ አꬍኮነ ዎꬎና እፅኮ፥
5 ታኒ ሄ አድያነ እያ ሶ አሳ ሞርካና፤ እያነ ሞሎካ ካልዳይሳታ ኤንታ ደርያ ግዶፈ ሻካዳ ꬋይሳና።
6 “ኦንካ ታና አማነቶና እፅድ ሞይትለ ፄግኮነ ማሮ ሶ ቢኮ፥ ታኒ እያዉ ሞርከ ግዳና፤ አሳ ግዶፈ እያ ꬋይሳና።
7 “ታኒ፥ ጎዳይ፥ ህንተ ፆሳ ግድያ ግሾ፥ ህንተ ህንተና ዱማይተ፤ ጌሽ ግድተ።
8 ታ ዎጋ ናግተ፤ እያ ፖልተ። ታኒ ህንተና ጌሽያ፥ ህንተ ጎዳ።
9 “ኦንካ ባ አዋ ዎይኮ ባ አይዉ ጫይኮ ሀይቆ። እ ባ አዋ ዎይኮ ባ አይዉ ጫይዳ ግሾ፥ እያ ሱꬃ አጮይ እያ ቦላ ግዶ።
10 “እስ አስ ባ ሾሩዋ ማችዉ ፃልኮ፥ ኤንቲ ናምአይ ሀይቆ።
11 እስ አስ ባ አዋ ማችዉ ፃልኮ፥ እ ባ አዋ ካዉሽስ፤ ኤንቲ ናምአይ ሀይቆ። ኤንታ ሱꬃ አጮይ ኤንታ ቦላ ግዶ።
12 እስ አስ ባ ናኣ ማችዉ ፃልኮ፥ ኤንቲ ናምአይ ሀይቆ። ኤንቲ ቱናባ ኦꬅዶሶና፤ ኤንታ ሱꬃ አጮይ ኤንታ ቦላ ግዶ።
13 “እስ አደይ ማጫሳራ ጋሄተይሳዳ አደራ ጋሄትኮ፥ ኤንቲ ናምአይ እፀትዳባ ኦꬅዳ ግሾ ሀይቆ። ኤንታ ሱꬃ አጮይ ኤንታ ቦላ ግዶ።
14 እስ አስ ናእዉነ አይዉ ማቾ ኤክኮ፥ ሄስ ቱናባ። ህንተ ግዶን ቱናተꬅ ዶና መላ እነ ኤንቲ ታማን ፁገቶ።
15 “እስ አስ መሄራ ጋሄትኮ፥ እ ሀይቆ፤ ሄ ሚዝዉ ዎꬍተ።
16 እስ ማጫስ መሄራ ጋሄትኮ ሄ ማጫስያነ ሄ መሄይ ናምአይ ሀይቆ፤ ኤንታ ሱꬃ አጮይ ኤንታ ቦላ ግዶ።
17 “እስ አስ ባ አዋ ናእዉ ዎይኮ ባ አየ ናእዉ ማቾ ኤክኮ፥ ሄስ ቱናባ። ኤንቲ ባንታ አሳ ግዶፈ ሻከትድ ሀይቆ። እ ባ ምችዉ ካዉሽዳ ግሾ፥ ባ ናጋራን ባዉ ኦይሸቶ።
18 እስ አስ ኩሸ መቶራ ደእያ ማጫሳራ አቅኮ፥ እ ቀꬃ ቃርዳ ግሾ፥ ኤንቲ ናምአይ ባንታ አሳ ግዶፈ ኩረቶ።
19 “ነ አየ ምችዉ ዎይኮ ነ አዋ ምችዉ ፃሎፋ፤ ሄሳ ኦይ ባ ማታ ዳቦተꬃ ካዉሼስ። ኤንቲ ናምአይ ባንታ ናጋራን ኦይሸቶ።
20 እስ አስ ባ አዋ እሻ ማችዉ ፃልኮ፥ እ ባ አዋ እሻ ካዉሽስ። ኤንቲ ባንታ ናጋራን ባንታዉ ኦይሸቶ፤ ኤንቲ ናምአይ ናአ የሎና ሀይቃና።
21 እስ አስ ባ እሻ ማችዉ ኤክኮ፥ ሄስ ቱና። እ ባ እሻ ካዉሽስ፤ ኤንቲ ናምአይ የሎ ꬋያና።
22 “ህንተ ዳና መላ ታ ህንተና ገልስያ ቢታይ ህንተና ጩቶና መላ ህንተ ታ ህግያነ ታ ኪታ ናግተ።
23 ታኒ ህንተ ስንꬃፈ ꬋይስያ አሳ ደኡዋ ዎጋ ካሎፍተ። ኤንቲ ሄሳ ኡባ ኦꬅዳ ግሾ፥ ታ ኤንታ እፃስ።
24 ህንተ ኤንታ ቢታ ላታና፤ ማꬅነ ኤስ ጎገይ ቢታ ህንተዉ እማና። ታኒ ህንተና ሀራ አሳፐ ዱማያዳ ከስዳ፥ ጎዳ ህንተ ፆሳ።
25 “ሄሳ ግሾ፥ ህንተ ቱናነ ቱና ግዶና መሄታነ ካፎታ ሻክድ ኤርተ። ታኒ ሄሳት ህንተዉ ቱና ጋዳ ዎꬅዳ መሄታ፥ ካፎታነ ቢታን ቃፅያባታ ኡባን ህንተና ቱንሶፕተ።
26 ታኒ ጎዳይ ጌሽ ግድያ ግሾነ ህንተ ታባ ግዳና መላ ህንተና ሀራ አሳፐ ዱማይዳ ግሾ፥ ህንተካ ታዉ ጌሽ ግድተ።
27 “አደይ ዎይኮ ማጭ ሞይትለራ ሃሳይኮ ዎይኮ ማሮትኮ፥ ኤንቲ ሀይቃናዉ በሴስ። ኤንቲ ሹቻን ጫደትድ ሀይቆ፤ ኤንታ ሱꬃ አጮይ ኤንታ ቦላ ግዶ።”