12
ጎሻንቾታ ሌምሶ
(ማቶ 21:33-46፤ ሉቃ 20:9-19)
1 የሱሲ ኤንታዉ ሌምሶን ያግድ ኦድስ፦ “እስ ኡራይ ዎይነ ቶክድ፥ እያ ዩሾን ድርስ ድርስ። ቃስ ሄ ዎይነ ጉምእያ ኦላ ቦክስ። እያ ናጋናዉ አዱሳ ሻኮ ሻክስ። ሄሳፈ ጉየ፥ ኮ ኦꬅያ አሳስ እምድ፥ ሀራ ቢታ ብስ።
2 ዎይነ አይፍያ ማፅያ ዎደይ ጋክን፥ ባና ጋክያ ግሹዋ ኤሀና መላ፥ እስ ባ አይልያ ኮ አዋታኮ የድስ።
3 ኮ አዋት እያ አይልያ ኦይክድ ዋꬍድ፥ መላ ኩሸ የድዶሶና።
4 ናምአንꬆ ሀራ አይለ ኤንታኮ ኪትን፥ ኤንቲ ሄ አይልያ ሁጵያ ቆእድ ካዉሽድ የድዶሶና።
5 ዎይነ አታክልትያ ጎዳይ ቃስካ ሀራ አይለ ኪትስ። ሄ አይልያ ዎꬍዶሶና፥ ቃስ ሀራ ዳሮታ ሄሳዳ ኦꬅዶሶና፥ እሶታ እሶታ ዋꬍድ፥ ሀራታ ዎꬍዶሶና።
6 “ዎይነ አታክልትያ ጎዳስ ኪታናዉ ኡባፈ ዉርሰꬃን እ ዳሮ ዶስያ ባ ናኣ ፃላል አትስ። እ፥ ‘ኤንቲ ታ ናኣ ቦንቾና አጎኮና’ ግድ፥ ባ ናኣ ኤንታኮ ኪትስ።
7 “ሽን ኮ አዋት ባንታ ግዶን፥ ‘ላታናይስ ሀይሳ፤ የꬍተ እያ ዎꬎኦስ፤ እያ ላታይ ኑባ ግዳና!’ ያግዶሶና።
8 ናኣ ኦይክድ ዎꬍድ፥ እያ አሀ ዎይነ ጋድያ ግዶፈ ጋፃ ከስድ የግዶሶና።
9 “ህዛ፥ ዎይነ ጋድያ ጎዳይ ዋታኔ? ይድ ሄ ኮ አዋታ ዎꬍ ኦንግድ፥ ዎይንያ ኮ ኦꬅያ ሀራ አሳስ እማና።
10-11 “ ‘ግምበይሳት ቦርድ እፅዳ ሹቻይ
ጎዳ ፃጱዋ ምንꬅያ፥
ኡባፈ አꬍያ ሹቹ ግድስ።
ሀይስ ጎዳይ ኦꬅዳባ፤
ቃስ ኑ አይፍያስካ ማላልስያባ’
ያገይሳ ጌሻ ማፃፋፐ ናባብበከቲ?” ያግስ።
12 ካህነ ሀላቃት፥ ህገ አስታማረትነ ጭማት የሱሲ ሄ ሌምሱዋ ባንታ ቦላ ሌምስዳይሳ ኤርዳ ግሾ፥ እያ ኦይካናዉ ኮይዶሶና፥ ሽን አሳስ ያይድ፥ አግድ ብዶሶና።
ጊራባ
(ማቶ 22:15-22፤ ሉቃ 20:20-26)
13 ቃስ እያ ኦዳፐ ባላ ደምድ፥ እያ ኦይካና መላ፥ ፋርሳወታፐነ ሄሮዲሳ ባጋታፐ ጉꬃ አሳታ እያኮ ኪትዶሶና።
14 ኤንቲ እያኮ ይድ፥ “አስታማርያዉ፥ ኔኒ ቱማ ኦደተይሳነ አሳፐ አሰ ሻኮናይሳ ኑኒ ኤሮስ። ኔኒ አሰ ዱማያካ፤ ቃስ ፆሳ ኦግያ ቱማተꬃን ታማርሳሳ። ኑኒ ሮመ ቢታ ካዋ ቄሳረስ ጊራ ጊረይስ ዎገየ ዎጋ ግደኔ? ጊራ ጊራነ አጋኔ?” ያግዶሶና።
15 ሽን የሱሲ ኤንታ ጩቦተꬃ ኤርድ፥ “ታና አይስ ፓጨቲ? አነ እስ ሳንትመ ታና በስተ” ያግስ።
16 ኤንቲ እያዉ ኤህዶሶና፥ “ሀ ምስለይነ ሱንꬃይ ኦደባዬ?” ያግድ ኤንታ ኦይችስ።
ኤንቲ፥ “ሮመ ካዋ ቄሳረይሳ” ያግዶሶና።
17 የሱሲ ዛሪድ፥ “ያትኮ፥ ቄሳረባ ቄሳረስ፥ ፆሳባ ፆሳስ እምተ” ያግን ኤንቲ እያባ ማላለትዶሶና።
ሀይቆፐ ደንዶባ
(ማቶ 22:23-33፤ ሉቃ 20:27-40)
18 ሀይቅዳ አስ ደንደና ግያ ሳዱቃወታፐ እስ እስ አሳት የሱሳኮ ይድ፥ ሀይሳዳ ያግድ፥ እያ ኦይችዶሶና።
19 “አስታማርያዉ፥ ሙሰይ ኑስ ህግያ ፃፍሸ፥ ‘ማቾ ኤክዳ አስ ናአ የሎና ሀይቅኮ፥ ሄ ሀይቅዳይሳ እሻይ እያ ማችዉ ኤክድ፥ ባ እሻስ ናአ የላናዉ በሴስ’ ያግስ።
20 በን ዎደ ላፑን እሻት ደኤይሳታፐ ባይራይ ማቾ ኤክድ፥ ናአ የሎና ሀይቅስ።
21 ናምአንꬆይ እዮ ኤክስ፥ እካ ናአ የሎና ሀይቅስ። ሄꬓንꬆይካ ሄሳዳ ሀንስ።
22 ላፑናትካ ሄሳꬆ እዮ ኤክድ፥ ናአ የሎና ሀይቅዶሶና። ኡባፈ ጉየ፥ ቃስ ሄ ማጫስያ ሀይቃሱ።
23 ያትን፥ ላፑናት እዮ ኤክዳ ግሾ ሀይቅዳ አሳይ ሀይቆፐ ደንድያ ጋላስ፥ እያ ኤንታፈ አዉሳስ ማቾ ግዳኔ?” ያግዶሶና።
24 የሱሲ ዛሪድ፥ “ህንተ ባለተይ፥ ጌሻ ማፃፋታ ዎይኮ ፆሳ ዎልቃ ኤሮና ግሾሳ!
25 ሀይቅዳ አሳይ ሀይቆፐ ደንድያ ጋላስ፥ ሳሎን ደእያ ኪታንቾታ መላ ግዳናፐ አትሽን፥ ኤኮኮና፤ ገለኮና።
26 ሽን ሀይቅዳይሳታ ደንዱዋባ ግድኮ፥ ሙሰ ማፃፋን ፃፈትዳ ፁገትያ ቱሽያባ ኦድያ በሳን፥ ፆሳይ ሙሰኮ፥ ‘ታኒ፥ አብራሃመ ፆሳ፥ ይሳቃ ፆሳ፥ ያይቆባ ፆሳ’ ግዳይሳ ናባብበከቲ?
27 ሄሳ ግሾ፥ እ፥ ፓፃ ደኤይሳታ ፆሳፈ አትሽን፥ ሀይቅዳይሳታ ፆሰ ግደና። ህንተ ዳሮ ባልደታ” ያግስ።
ኡባፈ ባይራ ኪታ
(ማቶ 22:34-40፤ ሉቃ 10:25-28)
28 ህገ አስታማረታፐ እሶይ ኤንቲ ፓላመይሳ ሺቅድ ስእስ። ቃስ የሱሲ ኤንታዉ ሎይꬅ ዛርዳይሳ ስእድ፥ “ኪታ ኡባፈ አꬍያ ኪታይ አዉሴ?” ያግድ የሱሳ ኦይችስ።
29 የሱሲ ዛሪድ፥ እያ ሀይሳዳ ያግስ፦ “ኪታ ኡባፈ አꬍያ ኪታ ስእተ፤ ‘እስራኤለ አሳዉ፥ ጎዳይ ኑ ፆሳይ እስ ጎዳ።
30 ነ ጎዳ ነ ፆሳ ነ ኩመꬃ ዎዛናፐ፥ ነ ኩመꬃ ሸምፑዋፈ፥ ነ ኩመꬃ ቆፋፐ፥ ነ ኩመꬃ ዎልቃፈ ዶሳ’ ያጌስ።
31 ቃስ ኪታ ኡባፈ አꬍያ ናምአንꬆ ኪታይ ሀይሳ፤ ‘አሰ ኡባ ነ ሁጵያዳ ዶሳ’ ያገይሳ፤ ሀይሳታፐ አꬍያ ሀራ ኪት ባዋ” ያግስ።
32 ህገ አስታማረይ የሱሳኮ፥ “አስታማርያዉ፥ ቱማ ጋዳሳ፤ ኔኒ ‘ፆሳይ እስ ፆሳ ፃላላ። እያፐ አትሽን፥ ሀር ባዋ’ ግዳይስ ቱማ።
33 ፆሳ ኩመꬃ ዎዛናፐ፥ ኩመꬃ ቆፋፐነ ኩመꬃ ዎልቃፈ ዶሰይስነ ቃስ አሰ ኡባ ባ ሁጵያዳ ዶሰይስ፥ ፁሳ ያርሾፈነ ሀራ ያርሾ ኡባፈ አꬌስ” ያግስ።
34 የሱሲ ህገ አስታማርያ ዛሮይ አꬍዳ ኤራንቾ አሳ ዛሮ ግድዳይሳ በእድ፥ “ኔኒ ፆሳ ካዎተꬃፈ ሃካባካ” ያግስ፤ ሄሳፈ ጉየ፥ የሱሳ ሀራባ ኦይቻናዉ ኦንካ ምንቤና።
ክርስቶስ ኦደ ናኤ?
(ማቶ 22:41-46፤ ሉቃ 20:41-46)
35 የሱሲ ፆሳ ኬꬃን ታማርስሸ፥ ሀይሳዳ ያግስ፦ “ህገ አስታማረት ክርስቶሳ ዎይግድ ዳዊታ ናአ ጎና?
36 ዳዊቲ ጌሻ አያናን ኩምድ፥
“ ‘ጎዳይ፥ ታ ጎዳ፥ “ታኒ ነ ሞርከታ
ነ ቶሆይ የꬍያሶ ኦꬃና ጋካናዉ፥
ሀይሳን ታፐ ኡሻቻ ባጋራ ኡታ” ግስ’ ያግስ።
37 ዳዊቲ ባ ሁጰን ክርስቶሳ፥ ‘ጎዳ’ ግድ ፄግኮ፥ ያትን፥ ክርስቶስ ዋንድ፥ ዳዊታ ናአ ግድ?” ያግስ።
ዳሮ አሳይ የሱሲ ገይሳ ኡፋይሳን ስእዶሶና።
ህገ አስታማረታነ ፋርሳወታ አየ!
(ማቶ 23:1-36፤ ሉቃ 20:45-47)
38 የሱሲ ታማርስሸ፥ ሀይሳዳ ያግስ፦ “ህገ አስታማረታፐ ናገትተ፤ ኤንቲ አዱሳ ማኦ ማእድ ዩየይሳነ ግያንካ አሳይ ኤንታ ቦንችድ ሳሮይሳ ዶሶሶና።
39 ኤንቲ አይሁደ ዎሳ ኬꬃታን ዳሮ ሎእያ ኦይድያ ዶሶሶና፤ ቃስ አስ ባንታና ሞክያ በሳን ቦንቾ በሲ ዶሶሶና።
40 ኤንቲ አምኤታ ኬꬃ ቦንቅድ፥ ባንታዉ ሎኦ ዳናናዉ ዎሳ አዱሶሶና፤ ኤንቲ ኡባፈ አꬍያ ፕርዳ ኤካና” ያግስ።
አምኤ ሙፃታ
(ሉቃ 21:1-4)
41 የሱሲ ፆሳ ኬꬃን ሙፃታ የግያ ሳፅንያ ማታን ኡትድ፥ አሳይ ባ ሚሽያ ሄ ሳፅንያን የገይሳ በእስ፤ ዳሮ ዱረ አሳይ ዳሮ ሚሽያ ሄ ሳፅንያን የጎሶና።
42 እስ ማንቆ አምእያ ያዳ፥ ናምኡ ባካና ሄ ሳፅንያን የጋሱ።
43 የሱሲ ባ ታማረታ ፄግድ፥ “ታኒ ህንተዉ ቱማ ኦዳይስ፤ ሙፃታ ሳፅንያን የግዳ አሳ ኡባፈ ሀ ማንቆ አምእያ ዳርሳዳ የጋሱ።
44 አይስ ጊኮ፥ ሀራት ኡባይ ባንታዉ ፓላህዳ ሚሽያፐ የግዶሶና። ሽን እያ ባ ፓጫፐ፥ ባዉ ደእያ አቁዋ ኩመꬅ እማሱ” ያግስ።