35
ሌወታስ እመትዳ ካታማታ
1 እያርኮፈ ሄፍንꬃን፥ ዮርዳኖሰ ሻፋ ማታን ደእያ ሞአበ ደንባን፥ ጎዳይ ሙሰኮ ሀይሳዳ ያግስ፤
2 “እስራኤለት ባንታ ላታፐ ሌወት ዳና ካታማታነ ኤንታ ዩሹዋን ሄንꬃ ቢታ እማና መላ ኤንታዉ ኦዳ።
3 ሄ ካታማት ኤንታዉ ዱሳ በሲ ግዶ፤ ሄንꬃ ቢታት ኤንታ ሚዛስ፥ ኤንታ ዶርሳስነ ኤንታ ሀራ መሄታስ ግዶ።
4 ህንተ ኤንታዉ እምያ ሄንꬃ ቢታይ ኡባ ባጋራ ካታማ ግምበ ድርሳፈ እስ ሙኩሉ ዋꬋ ግዶ።
5 ካታማ ግዶ ኦꬅድ ዶሎሀ ባጋራ ናምኡ ሙኩሉ ዋꬋ፥ ዱገሀ ባጋራ ናምኡ ሙኩሉ ዋꬋ፥ ዉሎሀ ባጋራ ናምኡ ሙኩሉ ዋꬋነ ፑደሀ ባጋራ ናምኡ ሙኩሉ ዋꬋ ዋꬍተ። ሌወት ሄ ሄራ ባንታ ካታማስ ሄንꬃ ቢታ ኦꬆ።
6 “ሌወታስ ህንተ እምዳ ካታማት፥ አሰ ዎꬍዳ ኡራይ ባቃትድ አትያ ኡሱፑን ካታማታ፤ ሄሳታ ቦላ ጉጅድካ፥ ኦይታማነ ናምኡ ሀራ ካታማታ ኤንታዉ እምተ።
7 ኦይታማነ ሆስፑን ካታማታ ኤንታ ሄንꬃ ቢታራ እስፈ ሌወታስ እምተ።
8 እስራኤለ አሳ ላታፐ ኤንታ ላታ መላ ዳሮ ኮቻፈ ዳሮ ካታማ፥ ጉꬃ ኮቻፈ ጉꬃ ካታማ ኤክድ ሌወታስ እምተ” ያግስ።
ባቃትድ አትያ ካታማታ
(ዛረ 19:1-13፤ እያ 20:1-9)
9 ጎዳይ ሙሰኮ፥
10 “እስራኤለ አሳኮ ሀይሳዳ ያጋ፤ ዮርዳኖሰ ሻፋ ፕንድ፥ ካናነ ቢታ ህንተ ገልያ ዎደ፥
11 እስ አስ ቆፖና አሰ ዎꬍዳባ ግድኮ ሄ ኡራይ ባቃትድ አታና መላ ካታማታ ህንተዉ ዶርተ።
12 ያን ሱꬁ ዛራናዉ ኮያ ሀይቅዳ ኡራ ዳቦታፐ እ አቴስ። ሸምፖ ዎꬍዳ ደርያ ስንꬃን ፕርዳስ ሺቆና ሀይቃናዉ በሰና።
13 ሀ ህንተ እምያ ኡሱፑን ካታማት ህንተ ባቃትድ አትያ ካታማ ግዶ።
14 ሄꬑ ካታማት ዮርዳኖሰ ሻፋፐ ዶሎሀ ባጋን ግዶ፤ ቃስ አትዳ ሄꬓት ካናነ ቢታን ግዶ።
15 ሀ ኡሱፑን ካታማት ኤሮና አሰ ዎꬍዳ እስራኤለ አሳይ፥ በታንቾትነ ጉꬃ ዎደስ ህንተ ግዶን ደእያ አሳት ባቃትድ አትያ በሲ ግዶ።
16 “እስ አስ ሀራ አስ ብራታ ሚሸን ሾጭድ ዎꬍኮ ሄ ኡራይ ሸምፖ ዎꬍስ፤ እ ሀይቆ።
17 እስ አስ ዎꬋናዉ ዳንዳእያ ሹቻን ሀራ አስ ጫድድ ዎꬍኮ ሄ ኡራይ ሸምፖ ዎꬍስ፤ እ ሀይቆ።
18 እስ አስ ዎꬋናዉ ዳንዳእያ ምꬃ ሚሸን ሀራ አስ ሾጭድ ዎꬍኮ ሄ ኡራይ ሸምፖ ዎꬍስ፤ እ ሀይቆ።
19 ሱꬁ ዛርያ ማታ ዳቦይ ሄ ሸምፖ ዎꬍዳይሳ ደምኮ ዎꬎ።
20 “እስ አስ ሀራ አስ ባ ዎዛናን ሞርክድ ሱግ የግኮ ዎይኮ ሀይቆ ግድ እያ ቦላ እስባ ሆልን ሄ ኡራይ ሀይቅኮ፥
21 ዎይኮ ሞርክድ ባ ኩሸ ጩጩምድ ደችን ሄ ኡራይ ሀይቅኮ፥ እ ሸምፖ ዎꬍስ፤ እ ሀይቆ። ሱꬁ ዛርያ ማታ ዳቦይ ሸምፖ ዎꬍዳይሳ ደምኮ ዎꬎ።
22 “ሽን ሞርከተꬅ ባይናን፥ እስ አስ ሀራ አስ አኬኮና ሱግድ ዎይኮ ቆፖና እያ ቦላ እስባ ሆልኮ፥
23 ዎይኮ ዎꬋናዉ ዳንዳእያ ሹቹ እ በኦና እያ ቦላ ሆልን፥ ሄ ኡራይ ሀይቅኮ፥ ሄሳን ሞርከተꬅ ባይና ግሾነ እያ ቆሀናዉ ቆፕድ ደንዶና ግሾ፥
24 ዱላታይ እያ ግዶንነ እያ ሱꬃ ዛራናዉ ኮያ ኡራ ግዶን ፕርድያ ዎጋይ ካልድ ደእያ ዎጋꬆ ግዶ።
25 ኤሮና ዎꬍዳይሳ ሱꬃ ዛራናዉ ኮየይሳ ኩሸፐ ሄ ኡራ ዱላታይ አሽድ፥ እ ባቃትድ አትያ ካታማ ዛሮ። ሄ ዎደ ደእያ ዛይተን ትየትዳ ካህነ ሀላቃይ ሀይቃና ጋካናዉ እ ያን ደኦ።
26 “ሽን ኤሮና ዎꬍዳይስ ባቃትድ አትያ ካታማ ዛዋፐ በትኮ፥
27 ሀይቅዳ ኡራ ዳቦይ እያ ደምድ ዎꬍኮ፥ ሸምፖ ዎꬎን ኦይሸተና።
28 ሄ ዎደ ደእያ ካህነ ሀላቃይ ሀይቃና ጋካናዉ ሄ ኤሮና ዎꬍዳ ኡራይ ባቃትድ አትያ ካታማን ኡቶ። ሽን ሄ ካህነ ሀላቃይ ሀይቅዳፐ ጉየ ኤሮና ዎꬍዳ ኡራይ ባ ሶ ስማናዉ ዳንዳኤስ።
29 “ሀ ዎጋይነ ህገይ ህንተ ደእያ ቢታን ህንተዉነ ህንተ ዘረꬃስ ኤቅድ ደእያ ዎጋ ግዶ።
30 “አሰ ዎꬍዳ ኦንካ እ ሸምፖ ዎꬍዳይሳ ናምኡ ዎይኮ ሄꬑ ማርክ ማርካትኮ ሀይቆ፥ ሽን እስ አሳ ማርካተꬃን ኦንካ ሀይቃናዉ በሰና።
31 ቃስ ሸምፖ ዎꬍዳ አሳፐ አጫ ኤኮፍተ፤ እ ሀይቃናዉ በሴስ።
32 ባቃትድ አትያ ካታማ በትዳ ኦደፈካ ካህነ ሀላቃይ ሀይቃናፐ ስን ባ ሶ ስማና መላ አጫ እያፐ ኤኮፍተ።
33 ሱꬅ ቢታ ቱንስያ ግሾ ሱꬁ ጉሶፍተ። ሱꬁ ጉስዳ ኡራ ሱꬃፈ አትሽን፥ ሱꬅ ጉክዳ ቢታ ሀራ ኦገራ ቱናተꬃፈ ጌሽያ ዎግ ባዋ።
34 ታኒ፥ ጎዳይ እስራኤለ አሳ ግዶን ደእያ ግሾ፥ ህንተ ደእያ ቢታ፥ ታኒ አቅያ ቢታ ቱንሶፕተ” ያግስ።