26
1 ቦነ ሻች፥ ካꬅ ጫክያ ዎደ እር ኮሾናይሳዳ፥
ኤያስ ቦንቾ ኮሸና።
2 ካፎት ያነ ሃነ ፕራꬍሸ አሰ ቆሆናይሳዳ፥
ጋሶይ ባይና ባድያ ባደꬅ አሰ ጋከና።
3 ፓራስ ልሶ፥ ሀረስ ብፃላ ኮሸይሳዳ
ኤያ አሳ ዞኮስ ፃምአ ኮሼስ።
4 ኤያ አሳስ እያ ኤያተꬃዳ ዛሮፓ፤
ዛርኮ ነ እያ መላ ግዳና።
5 ኤያ አሳስ እያ ኤያተꬃ ቆንጭሳዳ ዛራ፤
ሄስ ሀኖና እፅኮ እ ባና ጭንጫ ግድ ቆፓና።
6 ኤያ አሳ ቦላ ኪታ የዶይ፥
ባ ቶሆ ቃንፅ የገይሳ መላ
ዎይኮ ዎꬍያባ ኡየይሳ መላ።
7 ኤያ አሳ ሌምሶይ፥
ስልዳ ቶሆ መላ ማደና።
8 ኤያ አሳስ ቦንቾ እሞይ፥
ሹቹ ያምባርሻን ቃች ዎꬅድ
ያምባራናዉ ፓጭያ አሳ መላ።
9 ኤያ አሳ ሌምሶይ
ማꬆትዳ አስ ባ ኩሸ ጫድዳ አጉንꬁ
ከሳናዉ ባፀተይሳ መላ።
10 ኤያ አሳ ዎይኮ ባ ኦገ ብያ አስ
ኡነ ኦስሳናዉ ቃፃርያ አስ
ባ ቶራ ሻራን ፆንግያ አሳ መላ።
11 ካን ባ ጮሻኮ ጉየ ስሚድ ላጨይሳዳ፥
ኤያ አስ ባ ኤያተꬃ ዛር ዛር ቆንጭሴስ።
12 ባና ጭንጫ ኦꬅድ ፄልያ አሳፐ
ኤያ አሳስ ሎኦ ቃድ ደኤስ።
13 “አዛላ አስ ኦገን ጋሞይ ደኤስ፤
ያሽያ ጋሞይ ኦገን ዩዬስ” ያጌስ።
14 ሳንቅ ማፃፈ ቦላ ያነ ሃነ ቃፀይሳዳ፥
አዛላ አስ ባ ሂፃን ያነ ሃነ ሽረቴስ።
15 እስ እስ አዛላ አስ ሀር አቶሽን፥
ዎፀን ቱሽድ ባራናዉ ዋየቴስ።
16 አዛላ አስ ማርካራ ኦድያ ላፑን ጭንጫታፐ
ባና አꬍዳ ጭንጫ ግድ ቆፔስ።
17 ባና ጋꬅያባይ ባይናባን ፓላምያ አስ
ኦገራ ብያ ካና ሀይꬅ ኦይክያ አሳ መላ።
18-19 ባ ሾሩዋ፥ “ታኒ ካሰ ጋይስ”
ያግድ ጭምያ አስ፥
ጎይድ ቦንቆ ታማ ሆልያ፥
ዎይኮ ዎꬍያ ዶንገ ቶራ ዱክያ አሳ መላ።
20 ምꬅ ዉርኮ ታም ቶኤስ፤
ዝግርስ ꬋይኮ ኦሽ አቴስ።
21 ፂፍ ቦንቆ ዳርሰይሳዳነ
ምꬅ ታማ ዳርሰይሳዳ
ፓላማ ዳርስያ አስ ኦሹ ዳርሴስ።
22 ዝግርሳ ቃል ማልኦ ካꬃ መላ
ኡፋይስሸ ዱገ ጋንጀ ቤስ።
23 ዎዛናን ኢታባይ ደእሽን፥
ባ እንፃርሳን ጭሞ ቃላ ሃሳያ አስ
ብራን ላንፀትዳ ኡርቃ ሚሸ መላ።
24 ገነ አስ ባ ዎዛናን ደእያ ኢታተꬃ
ባ እንፃርሳን ገንꬄስ።
25 እያ ዎዛናን ላፑን ቱናት ኩምዳ ግሾ፥
እ ሎኦ ቃላ ሃሳይኮካ እያ አማኖፓ።
26 ባ ሞርከተꬃ እ ገንꬅኮካ፥
እ ኦꬅያ ኢታይ ዳባባን ቆንጫና።
27 ሀራታስ ኦላ ቦክያ አስ ሄ ኦላን ባዉ ኩንዳና፤
ሀራታ ቦላ ሹቹ ጎንዶርስያ አሳ ቦላ
ሄ ሹቻይ ስሚድ ጎንዶረታና።
28 ዎርዶትያ እንፃርስ ባ ቆህዳ አሳታ እፄስ፤
ጭሞ ኦድ ኩንደꬅ ካለꬄስ።