102
ነ ሶምኡዋ ታፐ ገንꬆፋ
ኡንኤትዳ ዎደ ፆሳ ስንꬃን ዎስዳ አሳ ዎሳ
1 ጎዳዉ፥ ታ ዎሳ ስአ፤
ታ ዋሶይ ኔኮ ጋኮ።
2 ታ ዋይያ ጋላስ ነ ሶምኡዋ ታፐ ገንꬆፋ፤
ነ ሀይꬃ ታኮ ዛራ፤
ታኒ ኔኮ ዋስያ ዎደ፥ ታና ኤሶን አላ።
3 ታ ላይꬃይ ጩያዳ ꬋዬስ፤
ታ መቀꬃይ ታማዳ ኤፄስ።
4 ታ ዎዛናይ ቡጭድ የግዳ ማታዳ መልስ፤
ካꬅካ ታዉ ሜተተና።
5 ታኒ ታ ቃላ ꬎቁ ኦꬃዳ ኦልዳ ግሾ፤
ታ ጎጋይ መቀꬃራ ኦይከትስ።
6 ታኒ ዎራን ደእያ ሶሎ መላ፥
ካይሳ ኬꬃን ደእያ ጉቶ መላ።
7 ታኒ ዝንእን ꬍስኮይ ዬና፤
ታኒ ኬꬃ ሁጰን ባርካ ኡትዳ ካፎ ግዳስ።
8 ታ ሞርከት ጋላስ ኩመꬅ ታና ጫዮሶና፤
ታና ቀልቅሰይሳት ታ ሱንꬃን ባዶሶና።
9 ብዶይ ታዉ ካꬅ ግድስ፤
ታ አፉꬃይ ታ ኡሻራ ዋላከትስ።
10 ሄስ ሀንዳይ ነ ሀንቆይነ ነ ይሎይ፥
ታና ደንꬃድ ዎራ ሆልዳ ግሾሳ።
11 ታ ላይꬃይ ኦማርሳ ኩያ መላ ኤለስድ አꬌስ፤
ታኒ ማታዳ ሹላይስ።
12 ሽን ጎዳዉ፥ ኔኒ ነ አራታን መርናዉ ኡታዳሳ፤
ነ ሱንꬃይ የለታፐ የለታ ጋካናዉ ሀሳየታና።
13 ኔኒ እዮ ማርያ ዎደይ ጋክዳ ግሾ፤
ደንዳዳ ፅዮነስ ቃታ፤
ኔኒ ዶርዳ ዎደይ ጋክስ።
14 እ ሹቻት ነ ኦሳንቾታስ አልኦ፤
እ ቢታይካ ኤንታ ቃꬄስ።
15 ካዎተꬃት ጎዳ ሱንꬃስ ያያና፤
ሳኣ ካዎት እያ ቦንቹዋስ ዳጋማና።
16 ጎዳይ ፅዮነ ዛሪድ ኬፃና፤
ባ ግታተꬃ በሳና።
17 እ ማንቆታ ዎሳ ስአና፤
ኤንታ ኦይሻ ካና።
18 ቡሮ የለታና አሳይ ጎዳ ጋላታና መላ፥
ሀይስ ያ የለታስ ፃፈቶ።
19 ጎዳይ ꬎቃን ደእያ
ባ ጌሻ በሳፈ ፄልስ፤
ሳሎን ግድድ ሳኣ ፆሞሴስ።
20 ሄስካ ቃሸትዳ አሳ ዋሱዋ ስአናዉነ
ሀይቆ ፕርደትዳ አሳ ብርሻናሳ።
21 ሄሳ ግሾ፥ ጎዳ ሱንꬃይ ፅዮነን ኦደታና፤
እያ ጋላታይ የሩሳላመን አዋጀታና።
22 ደረይነ ካዎተꬃይ ሺቅድ፥
ጎዳስ ሄ ዎደ ጎይናና።
23 ታኒ ናአተꬃን ደእሽን፥
ታ ዎልቃ እፅስስ፤ ታ ላይꬃ ቃምስስ።
24 ታኒ፥ “ታ ፆሳዉ፥
ታ ላይꬃ ግዶ ዛዋን ታና ꬉኮፋ” ያጋይስ።
ጎዳዉ፥ ኔኒ የለታፐ የለታ ጋካናዉ ደኣሳ።
25 ኔኒ በን ሳኣ መꬋዳሳ፤
ሳሎይካ ነ ኩሸ ኦሶ።
26 ሀይሳቲ ኡባይ ꬋያና፤ ሽን ኔኒ ዳና፤
ኤንቲ ኡባይ አፍላዳ ዉራና።
ኔኒ ኤንታ ጩርቃ አፍላዳ ላማና፤
ኤንትካ አꬋና።
27 ሽን ኔኒ ነና፤
ነ ላይꬃይ ዉረና።
28 ነ አይለታ ናይታ ኔኒ ሳሮ ዎꬃሳ፤
ኤንታ ኮቻይ ነ ስንꬃን ምንድ ዳና።