112
ፅሎይ ቃፀና
ጎዳ ጋላትተ፤
ጎዳስ ያየይስነ
እያ ኪታ ናገይስ አንጀትዳይሳ።
እያ ናይት ቢታን ዎልቃማ ግዳና፤
ሱረ አሳ የለታይ አንጀታና።
ሻሎይነ ዱረተꬅ እያ ኬꬃን ደኤስ፤
እያ ፅሎተꬃይ መርናዉ ዳና።
ኬሀ፥ ፅሎነ ቃትያ አሳስ፥
ꬉማ ግዶን ፖኦይ ፖኤስ።
ኬሀተꬃን ጮ ታልእያ ኡራስ፥
ባ ኦሱዋ ሱረተꬃን ኦꬅያ ኡራስ
ኬሀባይ ያና።
ፅሎ አስ አዉደካ ኩንደና፤
እ መርናዉ ሀሳየታና።
እያ ዎዛናይ ህርጎና ግሾነ
እ ጎዳን አማነትያ ግሾ፥
ኢታባ ስእኮካ እ ዳጋመና፤
እያ ዎዛናይ ምኖ ግድያ ግሾ ያየና፤
ዉርሰꬃን እያ ሞርከት ፆነትን በአና።
እ ማንቁዋስ ዳርስድ እሜስ፤
እያ ፅሎተꬃይ መርናዉ ደኤስ፤
እያ ካጨይ ቦንቾን ꬎቁ ꬎቁ ጋና።
10 ኢታ አስ ሄሳ በእድ ይሎቴስ፤
መተርሸ ሳፅሸ ጮ ꬋዬስ፤
ኢታ አሳ አሞይ ጮ አታና።