115
ኑ ፆሳይ ዱማ
1 አቤት ጎዳዉ፥ ኑ ግሾ ግዶናሽን፥
ነ ሲቁዋነ ነ አማነተꬃ ግሾ፥
ነ ሱንꬃ ቦንቻ።
2 አይስ ካዎተꬃት፥
“ኤንታ ፆሳይ አዉኔ?” ያጋኔ?
3 ኑ ፆሳይ ሳሎን ደኤስ፤
ባ ዶስዳባ ኡባ ኦꬄስ።
4 ሽን ኤንታ ኤቃት አሰ ኩሸን ኦሰትዶሶና፤
ኤንቲ ብራፐነ ዎርቃፈ መትዶሶና።
5 ኤንታዉ ዶን ደኤስ፥ ሽን ሃሳዮኮና፤
አይፈይ ደኤስ፥ ሽን ፄሎኮና።
6 ኤንታዉ ሀይꬅ ደኤስ፥ ሽን ስኦኮና፤
ሲይ ደኤስ፥ ሽን ስንጎኮና።
7 ኤንታዉ ኩሸይ ደኤስ፥ ሽን ቦች ኤሮኮና፤
ቶሆይ ደኤስ፥ ሽን ሄመቶኮና፤
ኤንታ ሲፅናꬃራ ኮሽንች ከየና።
8 ኤንታ መይሳትነ
ኤንታ አማነተይሳት ኤንታ መላ ግዶ።
9 እስራኤለ አሳዉ፥ ጎዳን አማነትተ፤
ህንተና ማደይነ ህንተ ጎንዳለይ እያ።
10 አሮና ኬꬃ አሳዉ፥ ጎዳን አማነትተ፤
ህንተና ማደይነ ህንተ ጎንዳለይ እያ።
11 ጎዳስ ያየይሳቶ፥ ጎዳን አማነትተ፤
ህንተና ማደይነ ህንተ ጎንዳለይ እያ።
12 ጎዳይ ኑና ቆፔስ፤ እ ኑና አንጃና፤
እ እስራኤለ አሳ አንጃና፤
እ አሮና ኬꬃ አሳ አንጃና።
13 ጎዳስ ያየይሳታ፥
እ ጉꬃ ግታ አንጃና።
14 ጎዳይ ህንተና ዳርሶ፤
ህንተናነ ህንተ ናይታ አንጆ።
15 ሳሉዋነ ሳኣ መꬍዳ
ጎዳይ ህንተና አንጆ።
16 ሳሎይ ፆሳባ፤
ሽን ሳአ አሳስ እሚስ።
17 ሀይቅዳይሳት ጎዳ ጋላቶኮና፤
ዱፎን ዝንእዳይሳት እያ ሳቦኮና።
18 ሽን ኑኒ፥ ደኦን ደኤይሳት፥
ሀችፈ መርና ጋካናዉ፥
ጎዳ ጋላቶስ።
ጎዳ ጋላትተ።