12
አላመ ኢታተꬃፈ አተꬃ ዎሳ
ዛማረታ ሀላቃስ ፃፈትዳ ዳዊታ ማዝሙረ
ፆሳ አስ ቢታፈ ዉርዳ ግሾ፥
አሳ ግዶን አማነተꬅ ባይና ግሾ፥
ጎዳዉ ኑና ማዳርኪ?
ኡባይ ዎርዶ ሃሳዮሶና፤
እሶይ እሱዋ ጭምያ እንፃርሳን
ናምኡ ዎዛናን ኦደቶሶና።
አቤት ጎዳዉ፥ ጭምያ ዶና ጎርዳ፤
ኦቶሮን ጬቀትያ እንፃርሳ ተቃ።
ኤንቲ፥ “ኑ እንፃርሳን ኑ ፆናና፤
ኑ ዶናይ ኑሳ፤
ኑስ ጎድ ኦኔ?” ያጎሶና።
“ማንቆታ ኡንኣ ግሾነ፥
መቶታንቾታ ኦልያ ግሾ፥
ሀእ ታኒ ደንዳና፤
ኤንቲ አሞትያ ሳሮተꬃ ኤንታዉ እማና” ያጌስ ጎዳይ።
ጎዳ ቃላይ ጌሽ፤
ታማን ላፑን ቶሆ ሴርዳ ብራዳ ጌሽ።
አቤት ጎዳዉ ኔኒ ኤንታ ናጋ፤
ሀይሳ መላ አሳፐ መርናዉ ኤንታ አሻ።
ኢት አሳ ግዶን ቦንቸትያ ዎደ፥
ጌላ አሳት ጬቀትሸ ስመረቶሶና።