51
ታዉ ጌሻ ዎዛና እማ
ዳዊቲ ዛማረታ ሀላቃስ ፃፍዳ ማዝሙረ
ዳዊቲ በርሳበራ ላይማትዳ ዎደ ናብያ ናታን እያዉ ኦድ ስምን ዳዊቲ የፅዳ ማዝሙረ
አቤት ፆሳዉ፥ ነ መርና ሲቁዋዳ ታና ማራ፤
ነ ቃታ ዳሩዋ መላ ታ ናጋራ ቁቻ።
ታ ኢታተꬃፈ ታና ሜጫ፤
ታ ናጋራፐ ታና ጌሻ።
ታኒ ታ ቆሁዋ ኤራይስ፤
ታ ናጋራይ ኡባ ዎደ ታ ስንꬃና።
ታኒ ነና፥ ነ ፃላላ ቆሀስ፤
ነ ስንꬃን ኢታባ ኦꬃስ።
ሄሳ ግሾ፥ ነ ሀንቁዋን ነ ልከ፤
ነ ፕርዳንካ ነ ፅሎ።
ሄኮ ታ የለትያ ዎደ ናጋራንቾ፤
ታ አየ ኡሎን ቡሮ አትያ፥
ዎደፐ ዶማዳ ታኒ ናጋራንቾ።
ኔኒ አሳ ዎዛናፐ ቱማተꬅ ኮያሳ፤
ታ ጋꬃ አሳተꬃ ጭንጫተꬅ ታማርሳ።
ህሶጰ ቦንጮን ታና ዉርፃ፤ ታ ጌያና፤
ታና ሜጫ፤ ታ ሻቻፈ አꬋዳ ቦፃና።
ነ ታና ኡፋይስነ ሎኦባ ስሳ፤
ነ መንረꬅዳ ታ መቀꬃ ዛራዳ ኡፋይሳ።
ነ ሶምኡዋ ታ ናጋራፐ ሀራ ሶ ዛራ፤
ታ ባላ ኡባ ቁቻ።
10 አቤት ፆሳዉ፥ ጌሻ ዎዛና ታናን መꬋ፤
ቃፆና አያና ታ ግዶን ኦራꬃ።
11 ታና ነ ስንꬃፈ የጎፋ፤
ነ ጌሻ አያና ታፐ ኤኮፋ።
12 ነ አቶተꬃ ኡፋይሳ ታዉ ዛራ፤
ታ ነዉ ኪተታና መላ ታና ዘምፕሳ።
13 ታ ሄ ዎደ ህገ መንይሳታ ነ ኦግያ ታማርሳና፤
ናጋራንቾትካ ኔኮ ስማና።
14 አቤት ፆሳዉ፥ ታና አሽያ ፆሳዉ፥
ሱꬁ ጉስያ ናጋራፐ ታና አሻ፤
ሄ ዎደ ታ እንፃርሳይ ነ ፅሎተꬃ የፃና።
15 አቤት ጎዳዉ፥ ታ ዶና ዶያ፤
ታ እንፃርሳይ ነ ጋላታ አዋጃና።
16 ነ ያርሾን ኡፋይትያኮ፥ ታ ነዉ ያርሻናሽን፥
ነ ፁሳ ያርሾን ኡፋይታካ።
17 ፆሳ ያርሾይ አዳ አያና፤
ፆሳዉ፥ ነ መቅዳነ
ካዉይዳ ዎዛና ካꬋካ።
18 አቤት ፆሳዉ፥ ዶሳን ፅዮነስ ኬሀ፤
የሩሳላመ ግምበታ ግምባ።
19 ሄ ዎደ ነ ፅሎተꬃ ያርሾንነ
ፁሳ ያርሾን ኡፋይታና።
ፖሎ ሽቂያ መሄ ያርሾን ኡፋይታና፤
ኮርማት ነ ያርሾ በሳን ያርሸታና።