17
ናታን ዳዊታስ ኦድዳ ትንብተ
(2 ሳሜ 7:1-17)
ዳዊቲ ባ ጋꬎን ኡትዳፐ ጉየ ናብያ ናታናኮ፥ “ታኒ ዝጋፐ ኬፀትዳ ኬꬃን ደአይስ፤ ሽን ጎዳ ጫቆ ታቦተይ ዱንካነ ግዶን ደኤስ” ያግስ።
ናታን ዳዊታኮ፥ “ጎዳይ ኔራ ደእያ ግሾ ነ ዎዛናይ ቆፕዳባ ኡባ ኦꬃ” ያግስ።
ሽን ሄ ቃማ ጎዳ ቃላይ ናታናኮ ሀይሳዳ ያግሸ ይስ፤ “ባዳ ታ አይልያ ዳዊታኮ ሀይሳዳ ያጋ፤ ‘ታኒ ዳና ኬ ኬፃናይ ነና ግዳካ። ታኒ እስራኤለ ግብፀፈ ከስዳ ዎደፐ ዶማዳ ሀች ጋካናዉ ኬꬃን ደአብከ፤ ታኒ ዱንካነፐ ዱንካነ፥ በሳፈ በሲ ዩያሸ ደአስ። ታኒ እስራኤለ አሳ ኡባራ ዩይዳ በሳ ኡባን፥ ታ አሳ ሄማና መላ ታኒ ሹምዳ አሳፐ ኦና ታዉ ዝጋ ኬꬅ አይስ ኬፃብኪ?’ ጋዳ ኦይቻብከ” ያጌስ።
“ሄሳ ግሾ፥ ታ አይልያ ዳዊታኮ ባዳ ኡባፈ ዎልቃማ ጎዳይ ሀይሳዳ ያጌስ፤ ‘ታኒ ነና ዶርሰ ሄምያ በሳፔ ደንꬃዳ ታ አሳ እስራኤለ ካለꬃና መላ ኤሀስ። ኔኒ ብዳ በሰ ኡባን ታኒ ኔራ ግዳስ፤ ነ ሞርከታ ኡባ ነ ስንꬃፈ ድጋስ። ህዛ ታኒ ሀ ሳአን ኤረትዳ ግታ አሳዳ ነ ሱንꬃ ግታያና። ታኒ ታ አሳ እስራኤለስ በሰ እማዳ፥ ኤንታ ሄ በሳን ቶካና። ሄሳ ግሾ፥ ኤንቲ ባንታ በሳን ደአና፤ ኤንቲ ዛሪድ ዋባቆኮና። ካሰ ታኒ ታ አሳ እስራኤለ ቦላ ዳይናታ ሹማዳ ዎደ ሞርከት ናቅዳይሳዳ፥ 10 ዛሪድ ኢታ አሳት ኤንታ ናቆኮና። ታኒ ነ ሞርከታ ኡባ ነዉ ሃርሳና።
“ ‘ሄሳ ቦላ ጎዳይ ባ ሁጰን ነዉ ኬ ኬፃናይሳ ኦዴስ። 11 ነ ሀይቃዳ ነ ማይዛታን ጋሄትያ ዎደ ታኒ ኔፐ ጉየ ነ ናይታፐ እሱዋ ደንꬃዳ እያ ካዎተꬃ ምንꬃና። 12 ታዉ ኬ ኬፃናይ * እያ፤ ታኒ እያ አራታ መርናዉ ምንꬃ ኤሳና። 13 ታኒ እያዉ አዋ ግዳና፤ እካ ታዉ ናአ ግዳና። ኔፐ ስን ካዎትዳ ሳኦላፐ ታ ማሮተꬃ ኤክዳይሳዳ ታኒ እያፐ ኤክከ። 14 ታኒ እያ ታ አሳ ቦላነ ታ ካዎተꬃ ቦላ መርናዉ ሹማና፤ እያ አራታይ መርናዉ ምን ኤቃና’ ” ያግስ።
15 ናታን ፆሳይ እያዉ ቆንጭስዳ ቃላ ኡባ ዳዊታስ ኦድስ።
ዳዊታ ዎሳ
(2 ሳሜ 7:18-29)
16 ሄሳፈ ጉየ፥ ካዎይ ዳዊቲ ዱንካንያ ግዶ ገልድ፥ ጎዳ ስንꬃን ኡትድ፥ ሀይሳዳ ያግድ ዎስስ፤ “አቤት ጎዳዉ፥ ፆሳዉ ኔኒ ሀይሳ ኡባ ታዉ ኦꬃናዉ ታኒ ኦኔ? ታ ሶ አሳይካ አይቤ? 17 አቤት ጎዳዉ፥ ሄስ ነ አይፍያ ስንꬃን ጉꬃ ዳንን፥ ነ አይልያ ሶ አሳስ ስንꬃፈ ሀናናባ ኦዳዳሳ። ኔኒ ታና ግታ አስ ኦꬃዳ ፄላዳሳ። 18 ኔኒ ታና ነ አይልያ ቦንችዳ ግሾ፥ ዳዊቲ አይ ጋናዉ ዳንዳኢ? ኔኒ ታና ነ አይልያ ኤራሳ። 19 አቤት ጎዳዉ፥ ነ አይልያ ግሾነ ነ ዎዛና ቆፋዳ ሀ ግታባ ኡባ ኦꬃዳ፥ ሀ ግታ ኡፋይሳ ቃላ ኡባ ታና ኤርሳዳሳ። 20 አቤት ጎዳዉ፥ ነ መል ኦንካ ባዋ። ኑኒ ኑ ሀይꬃን ስእዳይሳዳ ኔፐ አትሽን፥ ሀራ ፆሲ ባዋ። 21 ኔኒ ነ አሰ ኦꬃናዉ ዎዝዳ ነ አሳ እስራኤለ ዳንያ ሀራ ካዎተꬅ ሳአ ቦላ ባዋ። ኔኒ ኦꬅዳ ግታነ ማላልስያ ኦሶታ ጋሶን ነ ሱንꬃይ ቢታን ኤረትስ። ኔኒ ግብፀፈ ዎዝዳ ነ አሳ ስንꬃፈ ካዎተꬃታ ጎዳ ከሳዳሳ። + 22 ኔኒ ነ አሳ እስራኤለ መርናዉ ነባ ኦꬃዳሳ። አቤት ጎዳዉ፥ ኔኒ ኤንታ ፆሰ ግዳዳሳ።
23 “አቤት ጎዳዉ፥ ኔኒ ነ አይልያስነ እያ ሶ አሳስ ኦድዳባይ መርናዉ ምንድ ደኦ፤ ኔኒ ኦꬃና ግዳይሳዳ ኦꬃ። 24 ‘ኡባፈ ዎልቃማ ጎዳይ፥ እስራኤለ ፆሳይ ቱማ እስራኤለ ፆሰ’ አሳይ ጋናዳ ነ ሱንꬃይ መርናዉ ምንድ ዳናነ ግታ ግዳና። ነ አይልያ ዳዊታ ሶ አሳይ ነ ስንꬃን ምንድ ዳና።
25 “አቤት ታ ፆሳዉ፥ ኔኒ ነ አይልያስ ኬ ኬፃና ጋዳ ቆንጭሳዳሳ። ሄሳ ግሾ፥ ታኒ ነ አይለይ ሀ ዎሳ ዎሳናዉ ምናስ። 26 አቤት ጎዳዉ፥ ኔኒ ፆሰ! ኔኒ ሀ ሎኦ ኡፋይሳ ቃላ ታዉ ነ አይልያስ ኦꬃና ጋዳሳ። 27 ነ ስንꬃን መርናዉ ዳና መላ ነ አይልያ ሶ አሳ አንጃናዉ ኮያዳሳ። አቤት ጎዳዉ፥ ነ አንጅዳይስ መርናዉ አንጀትዳይሳ ግዳና” ያግድ ዎስስ።
* 17:12 ኬ ኬፃናይ፦ ሀ በሳን ኬ ኬፃናይ ጌተትያ ሶ አሳ ዎይኮ ሼሻ ዎይኮ የለተꬃ ድቻናይ እያ ጉሱ። ፓይዶ 17፥ 23፥ 24፥ 25፥ 27 ፄላ 17:13 ማሮተꬃ፦ ሀ በሳን ኦደትዳ ማሮተꬃይ ዱፆና ሲቆ ዎይኮ መርናዉ አጎና ሲቆ ዎይኮ ላመቶና ሲቆ ጉሱ። + 17:21 ዛረ 4:7.