23
ሌወታ
1 ዳዊቲ ጭምዳ ዎደ ባ ናኣ ሶሎሞነ እስራኤለ ቦላ ካዎꬅስ።
2 ዳዊቲ እስራኤለ ካለይሳታ ኡባ፥ ካህነታነ ሌወታ እስፈ ሺሽስ።
3 ላይꬅ ሀስታማነ እያፐ ቦላ ግድዳ ሌወት ታይበትድ ኩመꬅ 38,000 ግድዶሶና።
4 ኤንታፈ ጎዳ ኬꬃ አዋተꬃን አይስያ 24,000 ሌወታ ካዎይ ዎꬅስ፤ 6,000 ሌወታ ሀላቃታነ ፕርዳ ዳይናታ ኦꬅድ ዎꬅስ።
5 4,000 ሌወታ ፐንገ ናገይሳታ ኦꬅድ ዎꬅስ። ቃስ ጎዳ ጋላታናዉ ዳዊቲ ጊግስዳ የꬃ ሚሸን ጎዳ ጋላትያ 4,000 ሌወታ ዎꬅስ።
6 ዳዊቲ ሌወ አደ ናይታ ገድሶና፥ ቃሃታነ ማራራ ኤንታ ያራን ያራን ሄꬑ ጩጋን ሻክስ።
ገድሶናታ
7 ገድሶና አደ ናይት ላእዳነነ ሳምአ።
8 ላእዳነ ሄꬑ አደ ናይት ይኤላ፥ ዘታማነ እዩኤላ።
9 ሳመአ ሄꬑ አደ ናይት ሳሎሞታ፥ ሀዝኤላነ ሀራና፤ ሀይሳቲ ላእዳነ ያራ ሀላቃታ።
10 ሳማአ ኦይዱ አደ ናይት ያሃታ፥ ዚዛ፥ ኡሳነ ባርአ።
11 ኡስ ባይራ፥ ዚዝ ካሎ። ሽን ኡሳስነ ባርአስ ናይት ዳሮና ግሾ ኤንቲ እስ ያራዳ ታይበትዶሶና።
ቃሃተታ
12 ቃሃታ ኦይዱ አደ ናይት አንባራማ፥ ይስሃራ፥ ከብሮናነ ኡዝኤላ።
13 አንባራማ አደ ናይት አሮናነ ሙሰ። አሮንነ እያ ኮቻይ ኡባፈ ጌሽ ግዳና መላ ዱማትዶሶና። ኤንቲ ጎዳ ስንꬃን እፃነ ጩይሳናዉ፥ ጎዳስ ኦꬃናዉነ ጎዳ ሱንꬃን አሳ አንጃናዉ መርናዉ ዱማትዶሶና።
14 ፆሳ አሰ ግድዳ ሙሰ ናይታ ሌወ ኮቻታራ ጋꬅድ ታይብዶሶና።
15 ሙሰ ናይት ገድሶና አላዛራ።
16 ገድሶና ናይታ ግዶፈ ሀላቃይ ሳቡኤላ።
17 አላዛራ ናአይ ራሃባ። አላዛራስ ሀራ ናእ ባዋ፤ ሽን ራሃባስ ናይት ዳሮ።
18 ይስሃራ ናይታ ሀላቃይ ሳሎምታ።
19 ከብሮና ናአይ ባይራይ ይርያ፤ ካሎይ አማረ፤ ሄꬓንꬆይ ያሀዝኤላ፤ ኦይዳንꬆይ ያቅምኣማ።
20 ኡዝኤላ ባይራ ናአይ ምክያሳ፤ ካሎይ ይሽያ።
ማራራታ
21 ማራራ ናይት ማህላነ ሙሳ። ማህላ ናይት አላዛራነ ቂሳ።
22 አላዛር ማጫ ናአፐ አትሽን፥ አደ ናአ የሎና ሀይቅስ። ሄሳ ግሾ፥ ኤንታ አዋ እሻ ቂሳ ናይት ኤንታ ማችዶሶና።
23 ሙሳ ሄꬑ ናይት ማህላ፥ ኤደራነ ይረሞታ።
24 ሌወ የለታን ባንታ ኮቻንነ ሶ አሳን ባንታ ሱንꬃን ማዝጋበትዳ ሌወ ኮቻት ሀይሳታ። ላይꬅ ላታማነ እያፐ ቦላ ግድዳ ሌወ ኮቻት ኡባይ ጎዳ ፆሳ ኬꬃን ኦꬅዶሶና።
25 ዳዊቲ፥ “ጎዳይ፥ እስራኤለ ፆሳይ ባ አሳ ሸምፕስስ። ጎዳይ የሩሳላመን መርናዉ ዳና።
26 ሌወት ዱንካንያነ እያ ግዶን ጎኤትያ ሚሸታ ህዛፐ ጉየ ቶካናዉ በሰና” ያግስ።
27 ዳዊቲ ዉርሰꬃ ኪታን፥ ላይꬅ ላታማነ እያፐ ቦላ ግድዳ ሌወት ታይበትዶሶና።
28 ኤንቲ ጎዳ ፆሳ ኬꬃን ኦꬅያ አሮና ኮቻታ ማዶሶና። ጎዳ ፆሳ ኬꬃን ካረራነ ሶራ ኦꬆሶና፤ ጌሻ ሚሸ ኡባ ቱኖና መላ ናጎሶና።
29 ኤንቲ ፆሳ ስንꬃን ዎꬅያ ኡይꬃ፥ ካꬃ ያርሾስ ሺሽያ ꬊልያ፥ እርሾይ ባይና ኡይꬃነ ዛይተራ ሙኑቀትያ ꬊልያ አዋተꬃን አይሶሶና፤ ፆሳ ኬꬃን ማከትያባነ ልከያባ ኡባ አዋተꬃን ፄሎሶና።
30 ቃስ ኤንቲ ኡባ ጋላስ ዎንታነ ኦማርስ ጎዳ ጋላታናዉነ ሳባናዉ ኤቆሶና።
31 ሳምባታ ጋላስ፥ አጌና ፄሮን፥ ዎጋይ ኪትያ ሀራ ባኣለ ጋላሳይ ጋክያ ዎደ ጎዳስ ፁሳ ያርሾ ያርሾሶና። ኤንታዉ እመትዳ ታይቡዋዳነ ኪታዳ ኡባ ዎደ ጎዳ ስንꬃን ኦꬆሶና።
32 ዱንካንያነ ጎዳ ፆሳ ኬꬃ ናጋና መላነ ባንታ እሻ ግድዳ፥ አሮና አደ ናይታ፥ ማዳና መላ አዋተꬅ ሌወታስ እመትስ።