17
ይሁዳ ካዋ እዮሳፈፃ
1 አሳ ናአይ እዮሳፈፅ ባ አዋ በሳን ካዎትስ፤ እዮሳፈፅ እስራኤለ ኦላናዉ ባና ጊግስስ።
2 ሚፅ ኦሰትዳ ይሁዳ ካታማታን ኦላንቾታ ዎꬅስ፤ ይሁዳ ቢታንነ እያ አዋይ አስ ኦልድ ኦይክዳ ኤፍሬማ ቢታን ኦላንቾታ ዎꬅስ።
3 እዮሳፈፅ፥ እያ አዋይ ዳዊቲ ኮይሮ ሄመትዳ ኦግያን ሄመትዳ ግሾነ ባኣለ ኤቃ ጎይኖና እፅዳ ግሾ ጎዳይ እያ አንጅስ።
4 እዮሳፈፅ ባ አዋ ኦገን ሄመትድ ጎዳ ኪታ ፖልስ። እስራኤለ ካዎት ኦꬅዳ ኢታ ኦሶታ ኦꬅቤና።
5 ጎዳይ እያ ይሁዳ ካዎተꬃን ምንꬅድ ኤስስ። ይሁዳ አሳ ኡባይ እያዉ እሞታ ኤህዶሶና፤ እ ዳሮ ዱረትስነ ቦንቸትስ።
6 እዮሳፈፅ ጎዳስ ኩመꬃ ዎዛናን ኦꬅያ አስ። ꬎቃ ጎይኖ በሳታነ አሼራ ጌተትያ ፆሰ ኤቃ ምስለታ ይሁዳ ቢታፈ ꬋይስስ።
7 እዮሳፈፅ ካዎትዳ ሄꬓንꬆ ላይꬃን ይሁዳ ካታማታን ታማርሳና መላ ባ ሞርናታ በንሃላ፥ አብድዩ፥ ዛካርያሳ፥ ናትናኤላነ ምክያሳ የድስ።
8 ኤንታራ ጉꬃ ሌወታ ሻማያ፥ ናታና፥ ዛባዳ፥ አሳሄላ፥ ሳምራሞታ፥ ዮናታና፥ አዶንያሳ፥ ፆባነ ፆባዶና የድስ፤ ቃስ ኤንታራ ካህነታ ኤልሳማናነ እዮራማ የድስ።
9 ኤንቲ ጎዳ ህገ ማፃፋ ኤክድ ይሁዳ ቢታን ደእያ ካታማታ ኡባ ብድ ያን አሳ ታማርስዶሶና።
10 ይሁዳ ዩሾን ደእያ ካዎተꬃታ ኡባ ጎዳይ ያሽስን፥ ኤንቲ እዮሳፈፃራ ኦለትቦኮና።
11 ፍልስፄመፐ ጉꬃ አሳት እዮሳፈፃስ እሞታነ ብራ ጊራ ኤህዶሶና፤ አራባት እያዉ ላፑን ሙኩሉነ ላፑን ፄቱ ዶርሳ ኡርገታነ ላፑን ሙኩሉነ ላፑን ፄቱ ኮለታ ኤህዶሶና።
12 እዮሳፈፅ ምን ምን ብስ። ይሁዳን ሚፃታነ ሻሎ ምንጅያ ካታማታ ኬፅስ።
13 ይሁዳ ካታማታን ዳሮባ ምንጅስ።
የሩሳላመን እያዉ ምኖ ኦላንቾት ደኦሶና።
14 ኤንቲ ባንታ አዋታ ሶ አሳን አሳን ሀይሳፈ ካልድ ፃፈትዶሶና። ይሁዳ ኮቻፈ ሻላቃይ አድና፤ እያራ ሄꬑ ፄቱ ሙኩሉ ምኖ ኦላንቾት ደኦሶና።
15 አድና ካልድ ደእያ ሀላቃይ ዮሃና፤ እያራ ናምኡ ፄታነ ሆስፑን ታሙ ሙኩሉ ምኖ ኦላንቾት ደኦሶና።
16 ጎዳስ ባ ሸነን ባና ዱማይዳ ዝክራ ናአይ አማሳይ እያ ካልድ ደእያ ሄꬓንꬆ ሀላቃ፤ እያራ ናምኡ ፄቱ ሙኩሉ ምኖ ኦላንቾት ደኦሶና።
17 ብንያመ ኮቻፈ ሀላቃይ ምኖ ኦላንቹዋ ኤልያዳ፤ እያራ ዶንገነ ጎንዳለ ኦይክያ ናምኡ ፄቱ ሙኩሉ ኦላንቾት ደኦሶና።
18 ኤልያዳ ካልድ ደእያ ሀላቃይ ዮዛባታ፤ እያራ ኦላ ባናዉ ዳንጭዳ እስ ፄታነ ሆስፑን ታሙ ሙኩሉ ኦላንቾት ደኦሶና።
19 ሀይሳቲ ካዋስ የሩሳላመን ኦꬅዳይሳታ፤ ሀይሳቲ ይሁዳን ግምበትዳ ካታማታን ደእያ ካዎይ ዎꬅዳ ኦላንቾታፐ ሀራ።