9
ሳባ ካውዉ
(1 ካዎ 10:1-13)
1 ሳባ ካውያ ሶሎሞነ ዎርያ ስአዳ፥ ሰመንከን እያ ፓጫናዉ ሳዎ፥ ዳሮ ዎርቃነ አልኦ ሹቹ ጫነትዳ ዳሮ ግማለራ፥ ዳሮ አዣባን የሩሳላመ ባሱ። ባ ዎዛናን ደእያባ ኡባ ሶሎሞነስ ኦዳሱ።
2 ሶሎሞነይ እያ ኦይችዳባ ኡባስ ዛሮ እሚስ፤ እ እዉ ብርሾና እያፐ ጌምድ አትዳባይ አይብካ ባዋ።
3 ሳባ ካውያ ሶሎሞነ ጭንጫተꬃ፥ እ ኬፅዳ ጋꬉዋ፥
4 እያ ጋይታን ሺቅያ ካꬃ፥ እያ ሞርናት ኡትያ ኡተꬃ፥ እያ ኦሳንቾት ኦꬅያ ኦሱዋነ ማእያ ማኡዋ፥ እያ ኡሻ ትግያ አሳት ማእያ ማኡዋነ ጎዳ ኬꬃን እ ያርሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።
5 እያ ካዋኮ፥ “ነባነ ነ ጭንጫተꬃ ታኒ ታ ቢታን ደአሸ ስእዳይስ ቱማ።
6 ሽን ታ ያዳ ታ አይፈን በአና ጋካናዉ ኤንቲ ታዉ ኦድዳባ አማናብከ። ነ ጭንጫተꬃ ግታተꬃስ ባጋካ ታዉ ኦድቦኮና፤ ታ ስእዳይሳፈ ነ ዳሮ ግታታሳ።
7 ኡባ ዎደ ነ ስንꬃን ኤቅድ ነ ጭንጫተꬃ ስእያ ነ አሳትነ ነ ሞርናት አይ መላ አንጀትዶና!
8 ነናን ኡፋይትድ፥ ነና ባ ካዎተꬃ አራታን ኡትስዳ ጎዳይ ነ ፆሳይ ጋላተቶ! ነ ፆሳይ እስራኤለ ሲቅዳ ግሾነ መርናዉ ምንꬅ ኤሳናዉ ኮይዳ ግሾ ኔኒ ሱረ ፕርዳነ ፅሎተꬃ ኦꬃና መላ እ ነና ኤንታ ቦላ ካዎ ኦꬅስ” ያጋሱ።
9 ካውያ ኦይዱ ሙኩሉ ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ፤ ሳባ ካውያ ካዋ ሶሎሞነስ እምዳ ሽቱዋ መላ ሽቶይ ባዋ።
10 ቃስ ኦፍራፐ ዎርቃ ኤህዳ ክራማነ ሶሎሞነ አሳት ያፐ ሰንዳለ ምꬅነ አልኦ ሹቹ ኤህዶሶና።
11 ካዎይ ሳንዳለ ምꬃ ፆሳ ኬꬃስነ ካዎ ጋꬎስ ደ መꬋናዉ፥ ሄሳዳካ ዛማረታስ ማስንቆነ ዲꬅ ኦꬃናዉ ጎኤትስ። ሄሳ መላ የꬃ ሚሸት ሃይሳፈ ካሴ ይሁዳ ቢታን በንትቤና።
12 ካዎይ ሶሎሞነይ ሳባ ካውያ ኮይዳባነ ኦይችዳባ ኡባ እዉ እሚስ። እያ፥ እያዉ ኤህዳይሳፈ አꬅድ እዉ እሚስ። ሄሳፈ ጉየ፥ ሳባ ካውያ ባ አዣባራ ደንዳዳ ባ ቢታ ስማሱ።
ሶሎሞነ አቁዋ
(1 ካዎ 10:14-25)
13 ሶሎሞነይ ላይꬃን ላይꬃን ኤክያ ዎርቃይ ላታማነ ሄꬑ ሙኩሉ ክሎ ግራመ።
14 ሄስካ ዛልአንቾታፐ ኤክያ ቃራፃ፥ አራበ ቢታ ካዎታፐነ እስራኤለ ቢታን ሃረይሳታፐ ኤክያ ዎርቃነ ብራ ጉጆናሽና።
15 ካዎይ ሶሎሞነይ እስ እስ ጎንዳለይ ላፑን ክሎ ግራመ ግድያ ናምኡ ፄቱ ዎጋ ጎንዳለታ ዎርቃፈ ኦስስስ።
16 እሶይ እሶይ ሄꬑ ክሎ ግራመ ግድያ ሄꬑ ፄቱ ጉꬃ ጎንዳለታ ዎርቃፈ ኦስስስ። ካዎይ ሄ ጎንዳለታ “ልባኖሰ ዎራ” ጌተትያ ካዎ ጋꬎን ዎꬅስ።
17 ካዎይ ዳንጋርሳ ዛለፐ እስ ግታ አራታ ኦስስድ ዋላህ ባይና ዎርቃን ላንፅስ።
18 አራታይ ደእያ በሳ ከያናዉ የꬍያ ኡሱፑን ደꬃት ደኦሶና። አራታራ ኦይከትድ ኡትዳ ዎርቃፈ ኦሰትዳ ቶሆ የꬍያ በሲ ደኤስ። አራታስ ናምኡ ባጋራ ኩሸ ሸምፕስያ ዘምፖት ደኦሶና፤ ሄ ዘምፖታ ማታራ ያ ባጋንነ ሀ ባጋን ኤቅዳ እስ እስ ጋሞ ምስለይ ደኤስ።
19 ሄ አራታይ ደእያ በሳ ከይያ ኡሱፑን ደꬃታ ቦላ ያ ባጋራነ ሀ ባጋራ ኤቅዳ ታማነ ናምኡ ጋሞ ምስለት ደኦሶና። ሄሳ መላ አራት ሀራ ካዎተꬃን አዉንካ ኦሰትቤና።
20 ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋꬎን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብር ዳርዳ ግሾ ታይቦን ገለና።
21 ካዋስ ክራማ አሳት ላግያ ዛልኤ ማርካበታ ደኦሶና። ሄ ማርካበት ዎርቃነ ብራ፥ ዳንጋርሳ ዛለ፥ ቃረታነ ገለሾታ ጫንድ ሄꬑ ላይꬃፈ እስ ቶሆ ኤሆሶና።
22 ካዎይ ሶሎሞነይ ዱረተꬃንነ ጭንጫተꬃን ሳአን ደእያ ካዎታ ኡባፈ አꬌስ።
23 ሳአን ደእያ ካዎት ኡባይ ፆሳይ እያ ዎዛናን ዎꬅዳ ጭንጫተꬃ ስአናዉ ኮዮሶና።
24 ላይꬃን ላይꬃን እያኮ ያ ኡባይ እያዉ ዎርቃነ ብራ፥ ማኦታ፥ ኦላ ሚሸ፥ ሽቶ፥ ፓራነ ባቁሎታ እሞታ ኤሆሶና።
25 ሶሎሞነ ፓራታስነ ጋረታስ ኦይዱ ሙኩሉ ዛዳሎት ደኤስ፤ ታማነ ናምኡ ሙኩሉ ፓራ አሳት ደኦሶና። ሶሎሞነይ ሄሳታ ዱማ ዱማ ካታማታንነ የሩሳላመን ዎꬅስ።
26 ሶሎሞነይ ኤፍራፂሳ ሻፋፐ ዶምድ፥ ፍልስፄመ ቢታነ ግብፀ ዛዋ ጋካናዉ ደእያ ካዎታ ኡባ ሃርስ።
27 ካዎይ የሩሳላመን ብር ሹቻዳ ኬለታናዳ ዝጋ ምꬅ ይሁዳ ዙማታ ፃጶን ድጭያ ቦባዳ ዳራና መላ ኦꬅስ።
28 ሶሎሞነይ ፓራታ ግብፀፈነ ሀራ ቢታ ኡባፈ ኤህሴስ።
ሶሎሞነ ሀይቁዋ
(1 ካዎ 11:41-43)
29 ኮይሮፐ ዉርሰꬅ ጋካናዉ ሶሎሞነ ታርከይ ናብያ ናታና ታርከ ማፃፋን፥ ሴሎ አድያ ናብያ አክያ ማፃፋንነ ናባፃ ናኣ እዮርባማ ዎደ ጋካናዉ ደእያ ናብያ እዶ ቆንጨꬃ ማፃፋን ፃፈትስ ግደኔ?
30 ሶሎሞነይ እስራኤለ ቦላ የሩሳላመን ኦይታሙ ላይꬅ ካዎትስ።
31 ሄሳፈ ጉየ፥ ሶሎሞነይ ሀይቅድ ባ ማይዛታን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።