8
ጌሻ አያናን ደኦ
ሄሳ ግሾ፥ ክርስቶስ የሱሳን ደኤይሳት ሀእ ፕርደቶኮና። ክርስቶስ የሱሳ ባጋራ ኑስ ደኦ እምያ ጌሻ አያና ህገይ፥ ታና ናጋራነ ሀይቆ ህገ አይለተꬃፈ ከስስ። ኑ ናጋራ አሳተꬃ ጋሶን፥ ህገይ ዳቡራንቾ ግድያ ግሾ ኑና አሻናዉ ዳንዳእቤና። ፆሳይ ባ ናኣ ናጋራንቾ አሳ ሌምሶን ናጋራስ ያርሾ ግዳና መላ ኪትድ ሄሳ ኦꬅስ። ያትድ፥ ፆሳይ ክርስቶሳ አሹዋ ባጋራ ናጋራ፥ ናጋራንቾ አሳ ግዶን ፕርድስ። ፆሳይ ሄሳ ኦꬅዳይ፥ ኑ አሾ አሞይ ኮየይሳዳ ግዶናሽን፥ ጌሻ አያናይ ኮየይሳዳ ደእያ ኑ ቦላ ህግያ ፅሎ ኪታይ ፖለታና መላሳ።
ባንታ አሾ አሙዋ ካልድ ደኤይሳት ባንታና ኡፋይስያባ ቆፖሶና። ሽን ጌሻ አያና ሸነን ደኤይሳት ጌሻ አያና ኡፋይስያባ ቆፖሶና። ኑ ቆፋይ አሾ አሞስ ሃረትኮ ሀይቆ ኤሄስ፥ ሽን አያና አሞስ ሃረትኮ ደኦነ ሳሮተꬅ ኤሄስ። አሾ አሞስ ሃረትያ አስ ፆሳ ህግያስ ኪተታናዉ ኮዮና ግሾነ ኪተታናዉ ዳንዳኦና ግሾ፥ ፆሳራ ሞርከ። ባንታ አሾ አሙዋስ ሃረተይሳት ፆሳ ኡፋይሳናዉ ዳንዳኦኮና።
ሽን ፆሳ አያናይ ህንተናን ደእኮነ ህንተና ሃርኮ፥ ህንተ አያና ሸነን ደኤታፐ አትሽን፥ ህንተ አሾ አሙዋስ ሃረተከታ። ክርስቶሳ አያናይ ባይና ኦንካ ክርስቶሳባ ግደና። 10 ሽን ክርስቶስ ህንተናን ደእኮ፥ ህንተ አሳተꬃይ ናጋራ ጋሶን ሀይቅዳይሳ። ሽን ህንተ አያናይ ፅሎተꬃ ጋሶን ደኦን ደኤስ። 11 ሽን የሱሳ ሀይቆፐ ደንꬅዳ ፆሳ አያናይ ህንተናን ደእኮ፥ ክርስቶሳ ሀይቆፐ ደንꬅዳ ፆሳይ፥ ህንተናን ደእያ ባ ጌሻ አያናን ሀይቅያ ህንተ አሳተꬃስ ደኦ እማና። +
12 ህዛ፥ ታ እሻቶ፥ ኑኒ ኑ አሾ አሙዋ ካልድ ዳናዉ በሰና። 13 ህንተ፥ ህንተ አሾ አሙዋስ ደእኮ ሀይቃና፥ ሽን ጌሻ አያና ዎልቃን ናጋራ ኦሱዋ ዎꬍኮ ህንተ ደኦን ዳና። 14 ፆሳ አያናይ ካለꬅያ ኡባይ ፆሳ ናይታ። 15 ኑኒ፥ “አባ፥ ታ አዋዉ” ያግድ ፄግያ፥ ፆሳ ናይታ ኦꬅያ ጌሻ አያና ኤክዳፐ አትሽን፥ ዛሪድ ያሻን ዳናዉ አይለ ኦꬅያ አያና ኤክቦኮ። + 16 ፆሳ አያናይ ኑ አያናራ ግድድ ኑኒ ፆሳ ናይታ ግደይሳ ማርካቴስ። 17 ኑኒ እያ ናይታ ግድኮ ፆሳ አንጁዋ ላታና፤ ክርስቶሳራ ዎላ ሄ አንጁዋ ላታና። ቃስ ኑኒ ክርስቶሳራ መቱዋ ኤክኮ እያራ ዎላ እያ ቦንቹዋን ሻከታና።
ያና ቦንቹዋ
18 ኑኒ ሀእ ዋየትያ ዋይያ፥ ስንꬃፈ ኑስ ቆንጫና ቦንቹዋራ ጋꬅ በእኮ፥ ግንሳናዉ ዳንዳኤተና ጋዳ ቆፓይስ። 19 መተꬃ ኡባይ ፆሳ ናይታ ቆንጨꬃ ዳሮ ላሞትድ ናጎሶና። 20 መተꬃ ኡባይ ሀዳ ግድስ፤ ሄስካ፥ መተꬃ ዶሮን ግዶናሽን፥ ኡፋይሳን ናጋና መላ ኦꬅዳ ፆሳ ሸነን ሀንስ። + 21 መተꬃይ ባ ሁጰን ꬋዮ አይለተꬃፈ ዎዘትድ፥ ፆሳ ናይታራ ዎላ ቦንቾ ላአ ሻከታና። 22 መተꬃይ እስፈ ሀኖ ጋካናዉ እቀꬅ ኦይክዳ ማጫሳዳ ኦለንነ ኡንአን ደኤይሳ ኑ ኤሮስ። 23 ቃስ ሄሳ መተꬃ ፃላላ ግዶናሽን፥ ጌሻ አያና ባይራ እሞታዳ ኤክዳ ኑኒ፥ ኑ ሁጰን ኑ አሳተꬃስ ዎዞ ግድዳ ፆሳ ናይታ ግዳና ኡፋይሳ ናግሸ ኑ አሳተꬃን ኦሎስ። + 24 ሀ ኡፋይሳን ኑኒ አትዳ። ሽን ኑኒ ኡፋይስ ኦꬅያባይ በንትያ ግድኮ ሄሳ ኦን ኡፋይስ ኦꬂ? 25 ሽን ኑ በኦናባ ደማና ግድ ኡፋይሳን ናግኮ ሄሳ ዳንዳአን ናጎስ።
26 ሄሳዳ ጌሻ አያናይ ኑ ዳቡራን ማዴስ። ኑኒ ፆሳ ዋት ዎሳናዉ በሲያኮ ኤሮኮ፥ ሽን ጌሻ አያናይ ባ ሁጰን፥ አስ ኦዳናዉ ዳንዳኤቶና ቃላን ኑስ ጋናቴስ። 27 ቃስ አሳ ዎዛና ኤርያ ፆሳይ ጌሻ አያና ቆፋይ አይበኮ ኤሬስ። ጌሻ አያናይ ፆሳ ሸንያዳ ጌሻታስ ጋናቴስ።
28 ፆሳ ሲቀይሳታስነ እያ ሸንያዳ ፄገትዳይሳታስ ፆሳይ ኡባ ሎኦስ ኦይሳ ኤሮስ። 29 ፆሳይ ኮይሮትድ ኤርዳይሳት ባ ናኣ ዳናና መላነ ናአይካ አማነይሳታ ግዶን ባይራ ግዳና መላ ኤንታ ዱማይድ ዎꬅስ። 30 ፆሳይ ኮይሮትድ ዱማይዳይሳታ ፄግስ፤ ሄ ፄግዳይሳታ ፅልስስ፤ ሄ ፅልስዳይሳታ ቃስ ቦንችስ።
ፆሳ ሲቆ
31 ያትን፥ ኑ ሀ ኡባስ ዎይጋኔ? ፆሳይ ኑ ባጋ ግድኮ ኑራ ኦነ ኤቀታናይ? 32 እ ሀር አቶሽን፥ ባ ናኣስ ቃቶናሽን፥ ኑ ግሾ አꬅድ እሚስ። ያትን፥ ባ ናኣ ኑስ አꬅድ እምዳይስ ዋንድ ኡባባ ጮ እመኔ?
33 ፆሳይ ኤንታና ፅልስዳ ግሾ እ ዶርዳይሳታ ኦነ ሞታናይ? 34 ያትን፥ ኤንታ ቦላ ፕርዳናዉ ዳንዳኤይ ኦኔ? ኦንካ ባዋ። ሀይቆፐ ደንድድ ፆሳ ኡሻቻን ኡትዳ፥ ክርስቶስ የሱሲ፥ እ ኑስ ጋናቴስ።
35 ህዛ፥ ኑና ክርስቶሳ ሲቁዋፐ ሻካናይ ኦኔ? ዋየየ ዎይኮ መቶየ ዎይኮ ጎደየ ዎይኮ ኮሸየ ዎይኮ ካሎተየ ዎይኮ ያሸየ ዎይኮ ኦለዬ? 36 ጌሻ ማፃፋን፥
“ኑኒ ነ ግሾ ኩመꬃ ጋላስ ሀይቆስ፤
ሹካስ ኤፍያ ዶርሳዳ ታይበትዳ”+
ጌተትድ ፃፈትዳይሳ መላ ግድስ።
37 ሽን ኑኒ፥ ኑና ሲቅዳ ክርስቶሳን ሀ ኡባ ፖሎ ፆኖስ።
38 ሄሳ ግሾ፥ ሀይቆ ግድን ደኦ ግድን ኪታንቾታ ግድን ሃረይሳታ ግድን ሀእ ደኤይሳ ግድን ስንꬃፈ ያናይሳ ግድን ዎልቃማታ ግድን፥ 39 ሳሎ ዎልቃ ግድን ሳአ ዎልቃ ግድን አይ መተꬅ ግድን ኑ ጎዳ፥ ክርስቶስ የሱሳን ደእያ ፆሳ ሲቁዋፐ ኑና ሻካናዉ ዳንዳኦናይሳ ታኒ ኤራስ።
+ 8:11 2 ቆሮ 3:16. + 8:15 ማር 14:36፤ ጋላ 4:6. + 8:20 መ 3:17-19. + 8:23 2 ቆሮ 5:2-4. + 8:36 ማዝ 44:2.