2
ኤፈሶና ዎሳ ኬꬅ
“ኤፈሶና ዎሳ ኬꬃ ኪታንቹዋስ ሀይሳዳ ያጋዳ ፃፋ።
ባ ኡሻቻ ኩሸን ላፑን ፆልንቶታ ኦይክዳይስነ ላፑን ዎርቃ ኮጫታ ግዶራ ሄመተይስ ሀይሳዳ ያጌስ፦ ታኒ ነ ኦሱዋ፥ ነ ዳቡራነ ነ ገንጫ ኤራይስ። ኔኒ ኢታ አሳታባ ገንጫናዉ ዳንዳአቦናይሳ ኤራይስ። ቃስ ሀዋረ ግዶናሽን ባንታና፥ ሀዋረ ገይሳታ ፕልጋ ኤራዳ ኤንቲ ዎርዳንቾ ግደይሳ ደምዳይሳ ታ ኤራይስ። ኔኒ ገንጫዳሳ፤ ታ ሱንꬃ ግሾ መቶ ዳንዳአዳሳ፤ ፆነታባካ። ግዶሽን፥ ሀእ ታ ነና ቦርያባይ ደኤስ፤ ሄስካ ኔኒ፥ ነ ኮይሮ ሲቁዋ አጋዳሳ። ህዛ፥ ነ አይ መላ ꬎቃ በሳፈ ኩንድዳኮ አኬካ! ነ ናጋራፐ ስማ፤ ኔኒ ካሰ ኦꬅያ ኦሱዋ ኦꬃ። ኔኒ ነ ናጋራፐ ስሞና እፅኮ፥ ነ ፆምፐ ዎꬅያ ኮጫ እያ በሳፈ ኤካና። ሀእ ታ ነና ናሽያ እስባይ ደኤስ፤ ታ እፅያ ንቆላዌታ ኦሱዋ ነካ እፃዳሳ።
ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦንካ ፆሳ ጋናትያን ደእያ ደኦ ምꬄ አይፈፐ ማና መላ ማታ እማና።”+
ሳምርኔሳ ዎሳ ኬꬅ
ሳምርኔሳ ዎሳ ኬꬃ ኪታንቹዋስ ሀይሳዳ ያጋዳ ፃፋ።
“ኮይሮይነ ዉርሰꬃይ፥ ሀይቅዳይስነ ሀይቆፐ ደንድዳይስ ሀይሳዳ ያጌስ፦ +
ታኒ ነ ዋያነ ነ ማንቆተꬃ ኤራይስ፤ ግዶሽን ኔኒ ዱረ። አይሁደ ግዶናሽን ባንታና አይሁደ ገይሳት ጫይያ ጫሻ ታ ኤራይስ፥ ሽን ኤንቲ ፃላሄ ማባራን ደኦሶና። 10 ኔኒ ኤካናዉ ደእያ ዋይያ ባቦፋ። ፃላሄይ ህንተፈ እሶታ እሶታ ፓጫናዉ ቃሾ ኬꬃን የጋና፤ ታሙ ጋላስ ጋካናዉ ህንተ ዋየታና። ሀይቃና ጋካናዉ አማነትዳይሳ ግዳ፤ ታ ነዉ ደኦ ካላቻ እማና።”
11 “ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦንካ ናምአንꬆ ሀይቁዋን ቆሄተና።”+
ጳርጋሞና ዎሳ ኬꬅ
12 “ጳርጋሞና ዎሳ ኬꬃ ኪታንቹዋስ ሀይሳዳ ያጋዳ ፃፋ።
ናምኡ ባጋራ ቃራትዳ ማሻይ ደኤይስ ሀይሳዳ ያጌስ፦ 13 ታኒ ነ ደእያ በሳ ኤራይስ፤ ኔኒ ፃላሄ አራታይ ደእያ በሳን ደኣሳ፤ ታ ሱንꬃ ምንꬃ ናጋዳሳ። ሀር አቶሽን፥ ፃላሄይ ደእያ ህንተ ካታማን ሀይቅዳ ታ አማነትዳ ማርካይ፥ አንትጳስ፥ ደእያ ዎደካ አማኑዋ አጋባካ።
14 ግዶሽን፥ ታ ነና ቦርያ ጉꬃባት ደኦሶና። ሄስካ እስራኤለ አሳይ ኤቃስ ያርሸትዳ ካꬃ ምድ ቱናና መላነ ላይማተꬃ ናጋራ ኦꬃና መላ ባላቃ ታማርስዳ ባላማ ትምርትያ ኤክዳ እስ እስ አሳት ኔራ ደኦሶና። + 15 ሄሳዳካ፥ ንቆላዌታ ትምርትያ ታማርያ አሳት ኔራ ደኦሶና። 16 ሄሳ ግሾ፥ ኔኒ ነ ናጋራፐ ስማ። ሄስ ሀኖና እፅኮ፥ ታ ኔኮ ኤለሳ ያዳ ሄ አሳታ ታ ዶናፐ ከይያ ማሻን ኦላና።”
17 ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦደስካ ቆሰትድ ደእያ ማናፈ * እማና። ቃስ ኤክያ ኡራፐ አትሽን፥ ሀራ አስ ኤሮና ኦራꬃ ሱንꬃይ ፃፈትዳ ቦꬃ ሹቹ ታኒ እያዉ እማና። +
ትያትሮና ዎሳ ኬꬅ
18 “ትያትሮና ዎሳ ኬꬃ ኪታንቹዋስ ሀይሳዳ ያጋዳ ፃፋ።
ታማ ላጮ ዳንያ አይፈይ ደኤይስ፥ ቃስ ታማን ሴርዳ ናሰ ብራታ ዳንያ ቶሆይ ደኤይስ፥ ፆሳ ናአይ፥ ሀይሳዳ ያጌስ፦ 19 ታኒ ነ ኦሱዋ፥ ነ ሲቁዋ፥ ነ አማኑዋ፥ ነ ኦሱዋነ ነ ገንጫ ኤራይስ። ኔኒ ኮይሮ ኦይሳፈ ሀእ አꬃዳ ኦይሳካ ኤራይስ።
20 ግዶሽን፥ ታ ነና ቦርያ እስባይ ደኤስ፤ ባና ናበ ግያ ማጫስዉ፥ ኤልዛቤሎ፥ አይኮካ ጋባካ። ሄ ማጫስያ ኤቃስ ያርሸትዳ ካꬃ ምድ ቱናናዳነ ላይማታናዳ ኦꬃዳ ታ አይለታ ባለꬃሱ።+ 21 እያ ባ ናጋራፐ ስማና መላ ታ እዉ ዎደ እማስ፥ ሽን እያ ስማናዉ ኮያቡኩ። 22 ኤንቲ እ ባላ ኦግያፐ ስሞና እፅኮ፥ ታ እዮ ኢታ ሀርገን የጋና፤ ኢራ ላይማተይሳትካ ኢታ ዋየ ዋየታና። 23 ታኒ እ ናይታ ዎꬋና፤ ቃስ ዎሳ ኬꬃ ኡባይ ታ አሳ ቆፋነ አሳ ዎዛና ኤረይሳ ግደይሳ ኤራና። ታ እሱዋስ እሱዋስ ህንተ ኦሱዋዳ ኦሱዋዳ እማና።”+ 24 ሽን ትያትሮናን ደእያ ሀራታ፥ ሄ ኢታ ትምርትያ ኤክቦናይሳታነ፥ “ፃላሄ ግታ ፁራ” ጌተትያ ሀ ትምርትያ ታማርቦና ህንተና ሀራ ዴፆ ቶሆ ቶስከ። 25 ግዶሽን፥ ታ ያና ጋካናዉ ህንተዉ ደእያባ ምንꬅ ናግተ።
26 ፆነይሳስነ ዉርሰꬅ ጋካናዉ ታዉ ኪተትያ ኦደስካ ካዎተꬃታ ሃራና መላ ማታ እማና። +
27 “እ ኤንታ ብራታ ፃምአን ሃራና፤
መቃ ሚሸዳካ መንረꬃና።”
ሄ ማታይ ታኒ ታ አዋፐ ኤክዳ ማታ መላ። 28 ቃስ ታ እያዉ ባካላ ፆልንቶ እማና። 29 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።
+ 2:7 መ 2:9፤ ቆን 22:2፤ ህዝ 28:13፤ 31:8. + 2:8 እሳ 44:6፤ 48:12፤ ቆን 1:17፤ 22:13. + 2:11 ቆን 20:14፤ 21:8. + 2:14 ታይቦ 22:5. * 2:17 ማና፦ እስራኤለ አሳይ መላ ቢታን ሄመትያ ዎደ ሳሎፐ ፆሳይ ኤንታዉ እምዳ ዱማ ካꬅ ዎይኮ ኪታንቾ ካꬅ። + 2:17 ከሳ 16:14. + 2:20 1 ካዎ 16:31፤ 2 ካዎ 9:22. + 2:23 ማዝ 7:9፤ ኤርም 17:10፤ ማዝ 62:12. + 2:26 ማዝ 2:8-9.