4
ሳሎን ደእያ አራታ
1 ሄሳፈ ጉየ፥ ታኒ ሳሎ ፄልያ ዎደ ዶየትዳ ፐንገ በአስ። ቃስ ታ ካሰ ስእዳ ሞይዘ ግርሳ መላይ ታኮ፥ “ሀ ከያ፤ ሀይሳፈ ጉየ፥ ሀናናዉ ደእያባ ታ ነና በሳና” ያግስ።
2 ሄ ዎደ ታ አያናን ሃረታዳ ደአይስ። ሄኮ፥ ሳሉዋን አራታ ቦላ እሶይ ኡትዳይሳ በአስ።
3 ሄ ኡትዳይሳ ማላይ ያስጰደነ ሳርድዮነ አልኦ ሹቻ መላ። እያ አራታ ዩሹዋን አልኦ ማርግደ ሹች ዳንያ ዙል ደኤስ።
4 ሄ አራታ ዩሹዋን ላታማነ ኦይዱ አራታት ደኦሶና፤ ኤንታ ቦላ ቦꬃ ማኦ ማእድ፥ ሁጰን ዎርቃ ካላቻ ዎꬅዳ ላታማነ ኦይዱ ጭማት ኡትዶሶና።
5 አራታፐ ዎልአንꬅ፥ ጉንꬅነ ደሾይ ከዬስ። አራታ ስንꬃን ላፑን ፖእያ ፆምፐት ደኦሶና፤ ኤንቲ ላፑን ፆሳ አያናታ።
6 አራታ ስንꬃን ብርለ ዳንያ ጶልያ ቡርጩኮ አባይ ደኤስ።
ስንꬃራነ ጉየራ አይፈይ ደእያ ኦይዱ ደኦራ ደእያ መተꬃት አራታ ዩሹዋንነ አራታ ግዶን ደኦሶና።
7 ኮይሮ መተꬃ መꬎይ ጋሞ ዳኔስ፤ ናምአንꬆይ ቦር ዳኔስ፤ ሄꬓንꬆይ አሰ ዳኔስ፤ ቃስ ኦይዳንꬆይ ፕራꬍያ አርጋንꬅ ዳኔስ።
8 ኦይዱ መተꬃታ ኡባስ ኡሱፑን ቀፈይ ደኤስ፤ ኤንታ አሳተꬃ ኡባይ አይፈን ኩምስ። ኤንቲ ቃማነ ጋላስ ቃንፆና፥
“ጌሻዉ፥ ጌሻዉ፥ ጌሻዉ፥
ጎዳዉ፥ ኡባፈ ዎልቃማ ፆሳዉ፥
ካሰካ፥ ሀእካ ደኤይሶ፥ ስንꬃፈ ያናይሶ”
ያጎሶና።
9 ሄ መተꬃት አራታን ኡትዳይሳስነ መርናዉ ደኤይሳስ ሳባ፥ ቦንቾነ ጋላታ እምዳ ዎደ፥
10 ላታማነ ኦይዱ ጭማት አራታን ኡትዳይሳነ መርናዉ ደኤይሳ ስንꬃን ጉፋንድ ጎይንዶሶና፤ ባንታ ካላቻ አራታ ስንꬃን ዎꬅድ፥
11 “ኑ ጎዳዉ፥ ኑ ፆሳዉ፥
ኔኒ ቦንቾ፥ ሳባነ ዎልቃ ኤካናዉ በሳሳ።
ኔኒ ኡባ መꬋዳሳ፤
ኡባባይ ነ ሸንያዳ ሀንስ፥ መትስ”
ያግዶሶና።