8
ዳዊታ ፆኖታ
(1 ታር 18:1-17)
ሄሳፈ ጉየ፥ ካዎይ ዳዊቲ ፍልስፄመታ ፆንድ ሃርስ፤ ያትድ መተግ-አማ ካታማ * ፍልስፄመታ ኩሸፐ ኤክስ።
ዳዊቲ ቃስ ሞአበታ ፆንስ። እ ኤንታ ቢታን ዝንእስድ ኩሸን ዋꬍስ፤ ኤንታፈ ናምኡ ኩሽያ ዎꬍድ፥ ሄꬓንꬆ ኩሽያ ፓፃ አግስ። ያትን ሞአበት ዳዊታስ ሃረትድ ጊርዶሶና።
ረሆባ ናአይ፥ ሱባ ካዎይ፥ አድራዛር ኤፍራፂሳ ሻፋ ማታን ደእያ ባ ዛዋ ዛራናዉ ብዳ ዎደ ዳዊቲ እያ ኦልድ ፆንስ። ዳዊቲ እያ አሳፐ እስ ሙኩሉነ ላፑን ፄቱ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ጋረታ ጎቻናዉ ፄቱ ፓራታ አሽድ ሀራ ፓራታ ኡባስ ጋድያ ግልዳይስ።
ዳማስቆን ደእያ ሶረ ኦላንቾት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ ላታማነ ናምኡ ሙኩሉ አሳ ዎꬍስ። ዳዊቲ ሶረ ካዎተꬃን፥ ዳማስቆን፥ ኦላንቾታስ ሚፃ መꬍስ። ያትን ሶረ አሳይ ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።
አድራዛራ ቶራ ሞጮናት ኦይክያ ዎርቃ ጎንዳልያ ዳዊቲ ኤክድ የሩሳላመ ኤህስ። በፃሀነ በሮታ ጌተትያ አድራዛራ ካታማታፐ ካዎይ ዳዊቲ ዳሮ ናሰ ብራታ ኤክስ።
አድራዛራ ኦላንቾታ ኡባ ዳዊቲ ፆንዳይሳ ሀማታ ካዎይ ቶእ ስእስ። 10 ዳዊቲ አድራዛራ ኦልድ ፆንዳ ዎደ ሀዳድዘር ቶአራራ ኦለትሸ ጋምእዳ ግሾ እያ ሀሹ ጋናዉነ ሳሮꬃናዉ ባ ናኣ ዮራማ ዳዊታኮ ኪትስ። ዮራም ዎርቃፈ፥ ብራፐነ ናሰ ብራታፐ ኦሰትዳ እሞታታ ዳዊታስ ኤህስ። 11 ካዎይ ዳዊቲ ካሰ ጊርስያ ካዎተꬃታ ኡባፈ ኤክዳ ዎርቃነ ብራ ኦꬅዳይሳዳ ሀ እሞታታካ ጎዳስ ዱማይስ። 12 እ ፆንዳ ካዎተꬃት ኤዶመ፥ ሞአበ፥ አሞነ፥ ፍልስፄመነ አማለቃ። ሄሳዳካ ረሆባ ናኣ፥ ሱባ ካዋ አድራዛራ ኤክዳ ዲኡዋ ጎዳስ ዱማይስ።
13 ማፅነ ዛንጋራን ታማነ ሆስፑን ሙኩሉ ኤዶመ አሳታ ዳዊቲ ዎꬍድ ስምዳፐ ጉየ እያ ሱንꬃይ ከይስ። 14 ዳዊቲ ኤዶመ ቢታን ኦላንቾታ ሚፃ መꬍስ፤ ሄ ቢታይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።
ዳዊታ ሞርናታ
15 ዳዊቲ እስራኤለ ኡባ ቦላ ካዎትስ፤ ባ አሳ ኡባ ፅሎተꬃንነ ሱረ ፕርዳን አይስስ። 16 ፃሩያ ናአይ እዮኣብ ቶራ ሞጮና ግድሽን፥ አህሉዳ ናአይ እዮሳፈፅ ታርከ ፃፈ። 17 አህፁባ ናአይ ሳዶቅነ አብያታራ ናአይ አብመለከ ካህነ ግድሽን፥ ሳራይ ቃስ ፃፈ። 18 ዮዳሄ ናአይ ባናያስ ካዋ ናገይሳታ ሀላቃ ግድሽን፥ ዳዊታ አደ ናይት ካዋ ዞረይሳታ። §
* 8:1 መተግ-አማ፦ 1 ታርከ ማፃፋን ፃፈትዳይሳዳ ጋተነ እያ ሄራን ደእያ ጉታታ በሴስ። 8:13 አራመ ዎይኮ ሶረ ጉሱ። 8:18 ካዋ ናገይሳታ፦ ከርታወታነ ከልታወታ ጌተቶሶና። § 8:18 ካዋ ዞረይሳታ፦ ዎይኮ ካህነታ