4
1 ታኒ ነና ፆሳ ስንꬃንነ፥ ካዎ ግድድ ሃራናዉ ቆንጭያ ዎደ ፓፃታነ ሀይቅዳይሳታ ፕርዳናዉ ደእያ ክርስቶስ የሱሳ ስንꬃን ዞራይስ።
2 ቃላ ኦዳ፤ ዎደይ እንጀትን እንጀቶና እፅን ምናዳ ኦዳ። ዳሮ ዳንዳአንነ ታማርሶን አሳ ዞራ ሴራነ ደንꬃ።
3 አሳይ ቱማ ትምርትያ ስኦና እፅያ ዎደይ ያና። ኤንቲ ባንታ አሙዋ ካልድ፥ ባንታዉ ስአናዉ ኡፋይስያባ ኦድያ አስታማረታ ሺሾሶና።
4 ኤንቲ ቱማ ትምርትያ አግድ፥ ቱማ ግዶና ኦዳ ስአናዉ ባንታ ሀይꬃ ዛሮሶና።
5 ሽን ኔኒ ኡባባን ነና ሃራ። መቶ ዳንዳአ። ዎንገላ ማርካተꬃ ኦሱዋ ኦꬃ። ነዉ እመትዳ ፆሳ ኦሶ ኡባ ፖላ።
6 ታኒ ያርሸትያ ዎደይ ጋክስ፤ ሀ አላምያ አጋዳ ብያ ዎደይ ማትስ።
7 ታኒ ሎኦ ኦላ ኦለታስ፤ ታ ጋድያ ዎፃዳ ዉርሳስ፤ አማኑዋ ናጋስ።
8 ስንꬃፈ ፅሎተꬃ ካላቻይ ታና ናጌስ። ሄሳ ፅሎ ፕርዳ ፕርድያ ጎዳይ ሄ ጋላስ ታዉ እማና። ሄሳ ታ ፃላላስ ግዶናሽን፥ እያ ቆንጨꬃ አሞትያ ኡባስ እማና።
ጳዉሎሳ ቡዞ ቆፋ
9 ኤለሳ ያዳ ታና በአ።
10 ዴማስ ሀእ አላምያ ዶስድ፥ ታና አግድ፥ ተሰሎንቀ ካታማ ብስ። ቀርቅስ ጋላትያ ቢታ፥ ቃስ ትቶይ ድልማፀ ቢታ ብስ።
11 ሉቃሳ ፃላል ታራ ደኤስ። ማርቆስ ፆሳ ኦሶን ታና ማዳናዉ ዳንዳእያ ግሾ፥ ኔራ ኤካዳ ያ።
12 ታኒ ትክቆሳ ኤፈሶና ካታማ ኪታስ።
13 ኔኒ ያሸ፥ ፅሮኣዳ ካታማን ካርፖሳ ማታን አጋዳ ይዳ ታ ኮትያነ ማፃፋታ ታዉ ኤካዳ ያ። ኡባካ ጋልባን ፃፈትዳ ማፃፋታ ኤኮና ዮፓ።
14 ብራታ ቆፅያ እስክንድረይ ታና ዳሮ ቆህስ፤ ጎዳይ እያ ኦሱዋዳ እያዉ ዛራና።
15 እ ኑ ትምርትያ ዳሮ እፅያ ግሾ እያፐ ነና ናጋ።
16 ኮይሮ ታ ሞተትያ ዎደ ኡባይ አግድ ብዶሶናፐ አትሽን፥ ኦንካ ታና ማድቤና። ፆሳይ ሄ ናቁዋ ኤንታዉ ታይቦፖ።
17 ሽን ታኒ ኩመꬃ ኪታ አይሁደ ግዶና አሳ ኡባስ ማርካትን፥ ኤንቲ ስአና መላ ጎዳይ ታ ማታን ኤቅድ ታዉ ዎልቃ እሚስ። ቃስ ኮሻትዳ ጋሞዳ ዶና ዶይዳ ሀይቁዋፐ ታና አሽስ።
18 ጎዳይ ታና ኢታ ኡባፈ አሽድ ባ ሳሎ ካዎተꬃ ሳሮን ኤፋና። እያዉ መርናፐ መርና ጋካናዉ ቦንቾይ ግዶ። አምንእ።
ሳሮꬆ
19 ጵርስቅላስ፥ አቅላስነ አነስፎራ ሶ አሳስ ታ ሳሮꬁዋ ኦዳ።
20 ኤራስፆስ ቆሮንቶሳ ካታማን አትስ። ፅሮፍሞስ ሀርገትዳ ግሾ፥ ምልፀ ካታማን አጋስ።
21 ባልጎይ ገላናፐ ስን ኤለሳዳ ያ።
ኤዉቡሉስ፥ ጱዴስ፥ ልኑስ፥ ቅላደይነ ሀራ አማንያ አሳት ኡባይ ነና ሳሮ ጎሶና።
22 ጎዳይ የሱስ ክርስቶሲ ነ አያናራ ግዶ።
ፆሳ ማሮተꬃይ ህንተ ኡባራ ግዶ።