16
Ammaniya Asaas Shiiqida Imota
1 Ammaniya asaas miishe shiishobaa Galatiya woosa keethatas taani kiittidaysada hinteka oothite.
2 Miishiya shiishoy ta hinteko biya wode gidonna mela issoy issoy saamintafe koyro gallas, wogga wode, wogga wode, ba demmeysafe kessidi ba son dagayo.
3 Taani yaa bida wode miishiya Yerusalaame gathana mela hinte dooriya asaas dabdaabe immada enta Yerusalaame kiittana.
4 Entara ta buussay koshshiyaba gidiko enti taara baanaw danda7oosona.
Phawuloosa Halcho
5 Taani Maqedoonera aadhanaw qopida gisho, yaa bada hinteko yaana.
6 Ta biya bessa aw gidikoka, ta buussan hinte tana maaddana mela hinte matan guutha wode gam7onna aggike. Balgo ageenata hinte matan aathona waaya aggana.
7 Taani ogera aadhashe hintena be7anaw koyke. Goday giiko, hinte matan guutha wode takanaw qopayis.
8 Shin taani Phanxeqosxe Ba7aaley gakanaw Efesoonan gam7ana.
9 Taw oosoy kumida dalga pengey dooyetis, shin daro eqetiya morketi de7oosona.
10 I ta mela Godaa ooso oothiya asi gidiya gisho, Ximotiyoosi hinteko biiko, hinte matan I hirgonna daana mela oothite.
11 Oonika iya kadhopo. I taako saro simmana mela iya maaddidi moyzite. Taani I hanko ammaneysatara simmanaysa naagayis.
12 Nu ishaa Aphiloosi hanko ammaneysatara hinteko baana mela ta iya mintha woossas. Ha77i hinteko baanaw koybeenna, shin iyaw injetiya wode hinteko baana.
Zorenne Sarotho
13 Barkite; Ammanon eqite; xaalite; minnite.
14 Ooso ubbaa siiqon oothite.
15 Ta ishato, Isxifaanoseynne iya soo asay Akayan enti koyro ammanidaysata gideysanne ammaneyisata maaddanaw bantana aathidi immidaysa hinte ereeta.
16 Hinteka enta mela asaasinne, entara ooson daaburiya ubbaas kiitetana mela ta hintena woossayis.
17 Isxifaanosey, Ferdonaxisinne Akayqoosi taako yidaysi tana ufaysis. Hinte bayna bessan enti hintena gididi ta pacaa kunthidosona.
18 Enti hintena ufaysidaysada tanaka ufaysidosona. Hessa mela asata dogopite.
19 Iise woosa keetha asay hintena saro goosona. Aqilinne Phirisqilla banta son shiiqiya woosa keetha asaara issife hintena Godaa sunthan wozanape sarothoosona.
20 Ammaniya ishati ubbay hintena saro yaagosona.
Geeshsha yeeretethi yeeretishe issoy issuwa sarothite.
21 Taani, Phawuloosi, ha sarothuwa ta kushen xaafas.
22 Godaa dosonna asi de7iko, baadetidaysa gido. Nu Godaw, haaya!
23 Godaa Yesuus Kiristoosa aadho keehatethay hintera gido.
24 Ta siiqoy Kiristoos Yesuusan de7iya hinte ubbaara gido. Amin7i.