Daanela Maxaafa
Gaatha Qofa
Daanela geetetiya suntha birshethay Xoossay taw daynna woyko taw pirdeysa guussu. Daaneli Babiloone biittan eretanaw gaaso gididay, iya lo77o kanduwa, tinbite imota, Xoossay iya de7uwan oothida oosuwa, ba imetida maatan ehida laamiyanne dicha (2:46-49; 6:1-3).
Daaneli, K.Y.S. 605 laythan di7etidi Babiloone bida koyro asaara de7ees (1:1-2). Daaneli kawa Nabukadanaxoora kawo gadhon oothana mela dooretida na7atethatape issuwa. Daaneli iita kawotethata wode ubban ba Xoossaas ammanetidi de7is. Daanela maxaafan eretida taariketi, laxiya itoone tama, gaammo ollanne goda bolla xaafetida xuufiya. Daaneli amuho be7oninne amuho bilethan eretida asi.
Daanela maxaafay xaafetida waanna gaasoti nam7a. Hessatika:-
1. Ayhude gidonna deriyan di7etidi aylle gididi allaga biittan duussi Isra7eele asaas wursetha qaada gidonaysa akeekisidi, enta zaaridi minthethanaasa.
2. Taarike giddon hanida tinbite qoncethan, Xoossi kawotethata ubba bolla Goda gideysanne iya kawotethay xooneysa Xoossa deriya akeekisanaasa.
Daanela maxaafay nam7u gita kifiletan shaaketees.
1. Daaneli de7ida wode hanida taariketa odiya kifiliya (shem 1-6). He wode dendida kawotethatanne Xoossay Daanelanne iya laggeta waatidi ashshidako odees.
2. Daaneli be7ida dumma dumma qoncethata odiya kifiliya (shem 7-12). Ha kifiliyan kawotethata dendoynne kundethay dumma dumma mallataninne leemisotan qoncis.
Maxaafa Ayfe Qofata
Daanelinne iya laggeti kawo gadhon (1:1-21)
Xoossi kawotethata ubbaa bolla Goda (2:1—6:28)
Nabukadanaxoora amuhuwa (2:1-49)
Worqa misilenne laxiya itoone tama (3:1-30)
Nabukadanaxoora gooyetha (4:1-37)
Bilxasooranne goda bolla xuufiya (5:1-31)
Daaneli gaammofe attis (6:1-28)
Daaneli be7ida qoncethata (7:1—12:13)
Oyddu do7ata qoncethi (7:1—8:27)
Daaneli ba asaas woossida woosa (9:1-27)
Xegroosa shaafa matan be7ida qoncethaa (10:1—12:13)
1
Daanelinne Iya Laggeti Babiloonen
1 Yihuda kawoy Iyo7aqeemi kawotida heedzantho laythan Babiloone Kawoy Nabukadanaxoori Yerusalaame katama bolla dendi katamaa teqis.
2 Goday Yihuda kawa Iyo7akemenne Xoossa keethan de7iya miishetape baggaa, iya kushen aathidi immis. I he miisheta Sana7oora biittan de7iya ba eeqa xoossata keethi efidi, miishe minjiya keethan wothis.
3 Kawoy, Asfanaaza geetetiya ba oosanchota halaqaa haysada yaagidi kiittis: “Isra7eele asaa giddofe kawo koche gididaysatanne gita asata koche gididaysata doora.
4 Dooretana na7atethati, borey baynayisata, mala lo77ota, timirte ellesidi ekanaw danda7eyisata, akeekanchota, eratethi kumidaysatanne kawo gadhon oothanaw danda7eyisata gidanaw bessees. Enta Babiloone doonanne xaafo tamaarsa” yaagis.
5 Enti maana kathaanne uyana woyne ushsha kawa kathaafenne ushshafe gallas gallas immana mela kawoy kiittis. Heedzu laythi loohidaape guye kawa sinthe shiiqidi ooso doomana mela qofa kuuyis.
6 Dooretidaysata giddofe Yihuda koche gidida Daanela, Anaana, Misa7eelanne Azaara geeteteysati de7oosona.
7 Kawa oosanchota halaqay enta suntha laammidi, Daanela Bilxasoora, Anaana Sidiraaqa, Misa7eela Misaaqa, Azaara Abdanaago gidi sunthis.
8 Daaneli kawa kathaa midinne woyne ushsha uyidi, bana tunisonna mela ba wozanan qofa qachidi, he qofaa ekanaada, kawa oosanchota halaqaa woossis.
9 Xoossay, oosanchota halaqaa sinthan Daanelas sabanne qadhe immis.
10 Gidoshin, oosanchota halaqay Daanelako, “Hintew ha kathaanne ushsha kiitida ta godaa, kawa yayyayis. Hinte lagge gidida na7atethata som7uwafe hinte som7oy gilqidi bentiko, hinte gaason kawoy tana wodhana” yaagis.
11 Oosanchota halaqay shuumin Daanela, Anaana, Misa7eelanne Azaara naagiya addiyako, Daaneli haysada yaagis:
12 “Maanaw nuus atakilte, uyanaw haatha xalaala immada, nuna ne aylleta tammu gallas paaca.
13 Yaatada, nu som7uwanne kawo kathaa miya na7atethata som7uwa xeellada, nuna ne aylleta new bentidaysada ootha” yaagis.
14 I, hessa ekidi tammu gallas enta paacis.
15 Tammu gallasape guye, kawa kathaa mida na7atethata ubbaafe enta som7oy ciiyin, modhidi bentidosona.
16 I, entaw giigida kathaanne woyne ushsha diggidi atakilte immis.
17 Ha oyddu na7atethatas Xoossay eranne ubba qommo xuufenne timirte ekiya akeeka immis. Daaneli qoncethinne amuho birshethi erees.
18 Kawoy, na7atethati baako gelanaada kiitida wodey gakin, oosanchota halaqay enta Nabukadanaxoora sinthe ehis.
19 Kawoy, enta odisiya wode Daanela, Anaana, Misa7eelanne Azaara mela asi enta giddon bentibeenna. Yaatin, enti kawas oothanaw gelidosona.
20 Kawoy enta oychida ay cincatethaanne akeeka oyshan, iya kawotethan de7iya marotapenne bitanchotape enti tammu kushe aadhidi bentidosona.
21 Daaneli, kawoy Qiroosi kawotida koyro laytha gakanaw gam7is.