47
Xoossa Keetha Garsafe Pultiya Haathi
1 He uray zaaridi, tana Xoossa keetha geliya pengiyako efis. Xoossa keetha geliya pengiyafe garsara haathi pultidi, Xoossa keethaafe doloha bagga goggees. Xoossa keethas garsa baggara duge goggidi, yarsho bessaafe garsa baggara kanthees.
2 I tana qommo pengiya baggara kessidi, doloha pengiyako yuushshis. He pengiyafe garsa baggara haathi goggees.
3 He uray wadha wodoro ba kushen oykidi, doloha bagga bidi, goggiya haatha kaallidi, issi mukulu wadhis. Tana haatha giddora kaalethis; haathay taw shuqule gakis.
4 Zaaridi issi mukulu wadhidi, haatha giddora tana kaalethis. Haathay taw gulbata gakis. Qassi issi mukulu wadhidi, tana haatha giddora kaalethis. He wode haathay taw xeesse gakis.
5 I qassi issi mukulu wadhis. Shin he haathay daro ciimmo gidiya gisho, ta pinnanaw danda7abike; I asi wadhonna pinnanaw danda7onna shaafa gidis.
6 He uray taako, “Asa na7aw, haysa akeekada be7a?” yaagis.
Hessafe guye, I tana shaafa gaxa guye zaaris.
7 Ta yaa gakiya wode shaafa gaxan ha baggaranne ya baggara daro mithi de7eysa be7as.
8 I taako, “Ha haathay doloha bagga goggidi, Arabe zangaaranne Maxine Abban gelees. Haathay Maxine Abbaa geliya wode Maxine Abbay ooraxidi xillo haathi gidees.
9 Shaafay goggidi biya bessan dumma dumma medhetethati de7oosona. He shaafay yaara goggiya gishonne he haatha oorathidi xillisiya gisho daro moloti yan de7oosona. Hessa gisho haathay goggiya bessan de7iya medhetethati ubbay de7on daana.
10 Molo oykiya asati abba gaxan eqana; Engaadape bidi En Eglayma gakanaw de7iya bessay molo oykanaw gite yeggiya besse gidana. Medetiraane Abban de7iya molotada, yan daro dumma dumma moloti daana.
11 Shin abba gaxan de7iya eelleynne cafa haathay maxine gididi attanaape attishin, ooraxidi xillenna.
12 He shaafa doonan ha baggaranne ya baggara meetetiya ayfe immiya, dumma dumma qommo mithati de7oosona. Enta haythay qoqofetenna; ayfe aggokona. Xoossa keethaafe keyiya haathay entako goggiya gisho, enti ageenan ageenan ooratha ayfe ayfana. Enti ayfiya ayfey kathi gidana; enta haythay dhale gidana” yaagees.
Biitta Zawata
13 Ubbaa Haariya Goday haysada yaagees: “Tammanne nam7u Isra7eele zerethaas laata biitta oothada, ne shaakana zaway haysa. Yoosefa kochaas nam7u saami imeto.
14 Taani kase hinte mayzata ha biitta laatisanaw caaqas; ha77i hinte ubbay shaakidi laattite.
15 “Pudeha bagga biitta zaway haysa: Medetiraane Abbaafe dendidi, Hetloonanne Hamaata kanthidi, Xedaada gakees.
16 Damasqofenne Hamaatape giddon de7iya Berootanne Sibrayma katamata kanthidi, Hawurana zawan de7iya Tikoona katamaa gakees.
17 Isra7eele biitta pudeha bagga zaway Hamaata biitta pudeha baggan aggidi, Medetiraane Abbaafe doloha bagga bidi, Damasqo zawan de7iya Haxar-Enaana katamaa gakees.
18 “Doloha bagga zaway Haxar-Enaanape dendidi, Damasqofenne Hawuranape gidduwara kanthees. Isra7eelepenne Galadape giddon de7iya Yordaanose shaafan zawatidi Maxine Abbaa kanthidi Tamaare katamaa gakees.
19 “Dugeha bagga zaway Tamaarape dendidi, Mariba Qaadesan de7iya haatha gakees. Yaape Gibxe shaafape bidi Medetiraane Abbaa gakees. Hessi dugeha zawa.
20 “Wuloha bagga zaway Medetiraane Abbaa gididi, pudeha baggara Hamaata sinthara kanthidi wuloha bagga gakees.
21 “Ha biitta Isra7eele zareti shaakidi ekite.
22 Hintenne hinte giddon na7a yelidi de7iya bete asaas laata biitta oothidi shaakite. Enta hinte, hinte biittan yeletida Isra7eele asada xeellite. Enti Isra7eele kochatara taybetidi biitta saaman shaaketidi eko.
23 Bete asi Isra7eelen kochaara awunka de7iko, he I de7iya kochaa giddon iyaw laata biitta immite” yaagees Ubbaa Haariya Goday.