21
Aylle Ayso Woga
(Taybo 15:12-18)
1 Goday Muse baggara ba deriyas immida wogay haysa;
2 “Ne Ibraawe aylle shammiko, I new usupun laythi ootho, shin laapuntha laythan aykoka qanxonna, aylletethaafe coo yedeto.
3 I macho ekona shametidaba gidiko, barka yedeto. I machidi, shametidaba gidiko, iya machiyaka iyara yedeto.
4 Iya goday iyaw macho immidaba gidikonne machiya iyaw adde nayta woyko macca nayta yelidaba gidiko, iya machiyanne I nayti iya godaaba gido; addey barka yedeto.
5 Shin aylley, ‘Taani ta godaa, ta machiwnne ta nayta dosayis’ gidi aylletethaafe keyanaw koyonna ixiko,
6 iya goday, Godaa sinthe iya aatho. Yaatidi, penge woyko penge zizgiya matan iya essidi, iya haythaa goothan luko. Hessafe guye, I ba de7o laytha ubban iyaw aylle gido.
7 “Issi asi ba macca na7iw aylletethas bayziko, adde aylletatho aylletethaafe keyopo.
8 Iyo shammidi machanaw efida goday iyo dosona ixiko, I goday iyo deriyan woziso. I goday I bolla iitabaa oothida gisho, iyo allagas bayzanaw danda7ena.
9 I iyo ba na7aas immanaw koyiko, ba macca na7atho oothidi eko.
10 I hara macho I bolla ekiko, koyro machees kathi, ma7onne indas bessiya woga iw pacisopo.
11 I ha heedzubata iw oothonna ixiko, aybi miisheka qanxonna aylletethaafe keyada boo.”
Iita Asi Seero Woga
12 “Ase shocidi wodhiya oonika hayqanaw bessees.
13 I wodhanaw qoponna iyape hayqiyaba gidiko, I baqatidi attana bessi taani iyaw giigisana.
14 Shin asi qopidi hara asi wodhiko, he uray ta yarsho bessi biiko yaape diggada hara bessan wodha.
15 “Ba aawa woyko ba aayiw dechiya oonika hayqo.
16 “Ase bayzanaw woyko haaranaw wolqan oykiya asi hayqanaw bessees.
17 “Ba aawa woyko ba aayiw cayey hayqo.
18 “Nam7u asati ooyetidi, issoy issuwa shuchan caddidi qoo7iko, woyko zhultiko, he deshetidaysi hayqonna attidi hargidi hiixan pee7iko,
19 dendidi guufetidi kare heeran hemetiko, he dechidaysi hayqope attees. Gidikoka I iya oosope ashshida gisho, accanawunne paxana gakanaw hargisanaw koshshees.
20 “Issi asi ba adde aylliya woyko macca aylliw xam7an shocidi wodhiko seeretanaw bessees.
21 Shin he aylley issi woyko nam7u gallasa giddon hayqonna ixiko, iya goday seeretofo. He aylley iya shalo gidiya gisho iya hayqoy baw seera.
22 “Nam7u asati issoy issuwara wadhetidi qanxatida maccasiw dechidi, iya boshetana mela oothiko, hara iita qoho gathonna ixiko, he dechida uray, he mache azinay oychiya aca daynnati pirdiko ciggo.
23 Shin he maccase deshethay dariko, shempo gisho shempo,
24 ayfe gisho ayfe, acha gisho ache, kushe gisho kushe, toho gisho toho,
25 xuussa gisho xuussi, maduntha gisho madunthi, qoo7o gisho qoo7o ekanaw koshshees.
26 “Issi asi ba adde aylliyas woyko macca ayllees ayfe baqidi toysiko, he ayfiya gisho aylletethafe kessi yeddo.
27 Hessadaka, ba aylliya ache woyko ba aylle ache menthiko, he acha gisho aylletethafe kessi yeddo.
28 “Boori ase qaycidi wodhiko, he booray shuchan caddeti hayqo. Iya ashoy meetetofo, shin boora goday seeretofo.
29 Shin booray kaseka qayciyaba gidikonne koyrottidi boora godaas odetin, I qachonna ixidaba gidiko, he booray ase wodhiko, booraynne boora goday issife shuchan cadetidi hayqo.
30 Shin boora goday aca qanxana mela oyshetiko, enti oychidaba qanxidi ba shempuwa wozo.
31 Booray adde na7a woyko macca na7a qaycidi wodhiko pirday iya mela gido.
32 Booray adde aylle woyko macca aylle qaycidi wodhiko, boora goday aylliya godaas hastamu bira santime qanxo; booray shuchan caddetidi hayqo.
33 “Issi asi olla bookidi kammonna aggiko woyko kamaa denthin boori woyko harey he ollan wulliko,
34 he ollaa goday mehiya gatiya qanxo. I iya godaas gatiya qanxidi, hayqida mehiya baw eko.
35 “Issi asa boori hara asa boori caddidi wodhiko, paxa boora bayzidi, iya miishiyanne hayqida boora ashuwa nam7ay shaaki eko.
36 Shin he booray kaseka qayciyaba gideysa erishe, iya goday qachonna aggidaba gidiko, he uray iyaw boori qanxo. Yaatidi, he hayqidaysa baw eko.”