13
Xoossa Hanqoy Isra7eele Bolla
1 Efreemi odetida wode si7ida ubbay yashshan kokoris; Isra7eele biittan enti bonchetida asi. Shin Ba7aale eeqa goyinnidosona; he nagara gaason hayqidosona.
2 Ha77ika nagara bolla nagara oothosona; banta bira sheeshidi bantaw eeqa medhidosona; hiillan oosetida misileta giigisidosona; ubbayka kushe hiillan medhetidosona. Asay entaba odishe, “Yarshiya asay mara eeqa misileta yeerite” yaagosona.
3 Hessa gisho, enti wonta shaara mela woyko wonta xaasa mela woyko carkoy wudummafe denthidi efiya puno mela woyko maskootera keya cuyaa mela gidana.
4 Goday “Taani hintena Gibxe biittafe kessada ehida Godaa, hinte Xoossaa. Hinte taape attishin, hara xoossi ereketa; ashshey taape hari baawa.
5 Bazzon, mela biittan taani hintena naagas.
6 Taani hintena muzin, midi kallidi otortideta; hessafe guye, tana dogideta.
7 Hessa gisho, taani hinte bolla gaammo gidana; maahe mela oge doonan zugana.
8 Mari eketida maahe mela taani hintera gahetada ta hintena puuzana. Taani hintena gaammoda mentherethana; bazzo do7ada hintena pooshshana.
9 “Isra7eele asato, hinte ta bolla, hintena maaddeysa bolla dendida gisho ta hintena dhaysana.
10 Hinte tana, ‘Nuus kawonne halaqa imma’ yaagidi oychideta. Hintena ashshiya hinte kawoy anee? Katamatan de7iya hinte halaqati awun de7oona?
11 Taani ta hanquwan hintew kawo immas; ta yiluwan iya denthas.
12 Efreema balaynne nagaray xaafetidi uttis.
13 Iqethi oykida maccasi un7eteysa mela un7i iya bolla yaana. Shin I eri bayna na7a; yeletiya wodey gakin, ba aaye ulope wodhonna ixiya na7a mela.
14 Taani enta duufope ashshana; hayqo wolqaafe wozana. Hayqo, ne gadoy awunee? Si7oole, ne dhaysoy awunee? Taani ta asaas qadhetike.
15 Efreemi ba ishata giddon minnikoka, Goday yeddida doloha bagga carkoy bazzofe carkishe yaana; iya pultoy eqana; iya haathay melana. I minjida al7o miishe ubbay bonqetana.
16 Samaare asay banta Xoossaa bolla geellatida gisho, seera ekanaw bessees. Enti mashshan busetana; enta nayti tinchetana; enta qanthatida maccasata uloy daaketana” yaagees.