7
1 “Taani Isra7eele pathanaw koyiya wode Efreema nagaraynne Samaare asaa iita oosoy qoncis. Enti ubba wode cimmoosona; kaysoti menthidi geloosona; pangati keyidi bonqoosona.
2 Shin taani enta iita ooso ubbaa ereysa akeekokona. Enta iita oosoy enta naaqi oykis; he iita oosoy ubba wode ta sinthan de7ees.
3 “Enti kawa banta iitatethan, halaqata banta worduwan ufaysoosona.
4 Enti ubbay laammoosona; munuqay dendana gakanaw daabbo uukeysi tama shiisho koshshonaysada enti teellida cooce mela.
5 Banta kawa boncho ba7aale gallasan halaqati woyne ushshan mathotidosona. Ika qelqiseysatas ba kushiya immis.
6 Enta wozanay tama cooce mela; enti shiiqidi iitabaa maqetidosona. Enta hanqoy qamma kumetha cuuyishe aqees; sa7i wontiya wode tama lacoda eexees.
7 Enti ubbay teellida cooce mela banta halaqata moosona. Enta kawoti ubbay kundidosona; entafe oonika tana xeegey baawa.
8 “Efreema asay hara kawotetha asaara walaketis; Efreema asay shiretiboonna uytha mela gidis.
9 Allagati iya wolqaa midosona, shin I hessa eribeenna; iya huuphey puulumis, shin I hessa akeekibena.
10 Isra7eele asaa otoroy enta bolla markatees. Hessi ubbay haninka enti Godaako, banta Xoossaako, simmibokona woyko iya koybookona.
11 “Efreema asay holleda eeyanne coo cimeteyisata. Enti maado demmanaw issi toho Gibxe; issi toho Asoore simmoosona.
12 Enti biya wode taani enta bolla gite yeggana; taani enta kafo oykiyada oykana. Enta iita oosuwa gisho taani enta seerana.
13 “Enta ayye! Enti taape haakidosona. Entaw dhayo gido! Enti ta bolla makallidosona. Taani enta wozanaw koyas, shin enti ta bolla wordo haasayoosona.
14 Banta hiixan zin7idi zeleelosona, shin banta wozanaape woossokona. Kathasinne woyne ushshas banta asatethaa gaarosona, shin enti taape haakidosona.
15 “Enta loohisidaynne minthiday tana, shin taw iitabaa maqetoosona.
16 Enti hadabaako simmidosona. Enti ammanthona donge gididosona. Enta halaqati iitaba odetida gisho mashshan wurana; hessika entaw Gibxen miichas gidana.