30
Ixas Giya Deriya Ayye!
1 Goday, “Geella nayta ayye! Taani halchaboona oothosona; ta Ayyaanan gidonashin banta shenen caaqidi nagara bolla nagara gujeyisata ayye!
2 Tana zore oychonna Gibxe wodhoosona. Paarona miixa bantaw teqe, Gibxe bantaw shempiya kuya oothosona.
3 Shin Paarona miixay hintew yeella, Gibxe kuyay hintew kawushatethi gidana.
4 Enta halaqati Xaanesan de7ikoka, enti kiittidaysati Haneesa katamaa gakikoka,
5 yeellafe attishin, hara maaddeynne go77i bayna gisho iyan ammanetiya ubbay kawuyananne yeellatan” yaagees.
6 Negeban de7iya do7ataba Goday odiday haysa: kiitetidaysati metoynne un7i de7iya biittara, adde gaammoynne macca gaammoy worara, iitanne xongetiya shooshati de7iya bazzuwara kanthidi baana. Haretanne gimaleta zokon banta duretetha caanidi enta aykoka maaddonna biitta baana.
7 Gibxey aykoka maaddenna; hessa gisho, taani iya, “Pathonna Ra7aaba” yaagada xeegana.
8 Ha77i bada sinthara yaana wodiyas merinaa malla gidana mela enta sinthan shuchaa woocada xaafa; mazgabenka xaafa.
9 Enti geellanne wordancho nayta; enti Goday odiyaba si7anaw koyonna nayta.
10 Enti qoncethi be7eyisata, “Qoncethi be7opite” yaagosona. Nabeta, “Ufaysiyabaanne cimmiyaba oditepe attishin, suureba odopite.
11 Ogiyape kichite; horogape haakite; Isra7eele Geeshshara nuna som7on gathofite” yaagosona.
12 Hessa gisho, Isra7eele Geeshshay haysada yaagees: “Hinte ha qaala ixidi, geneninne cimon ammanetida gisho,
13 ha nagaray hintew za77idi woddiya, akeekona ellesidi kundiya adussa gimbe mela gidana.
14 Iya meqoy urqafe medhida oto mela dipi gidi meqana. He mequwa giddofe tama kaashiya woyko haathe duuqiya kun7i bentenna” yaagees.
15 Isra7eele Geeshshay, Ubbaa Haariya Goday, haysada yaagees. “Simoninne shempon hinte attana; si77i guussaninne ammanetethan hintew wolqa gidana; shin hinte ixideta.
16 Hinte, ‘Akay, nuuni para bolla uttidi baqatana’ yaagideta; hessa gisho, hinte baqatana. Qassi hinte, ‘Eesotiya para toggidi baana’ ” yaagideta; shin hintena yedetheysati hintefe aadho eesotana.
17 Issi tooranchuwa be7idi hintefe mukulu asay baqatana; ichashu tooranchoti hintena ubbaa yedethana. Zumaa huuphen eqida bandira mithada woyko zuma bolla de7iya mallada hinte hanana gakanaw hintena yedethena.
18 Shin Goday hintew keehanaw naagees; Goday xillo pirdiya Xoossi gidiya gisho hintew qadhetanaw dendana. Iya ammanetidi naagiya ubbay anjetidaysata.
19 Hinteno, Yerusalaamen de7iya Xiyoone asaw, hizape guye yeekeketa. Xoossay qadhen kumida Xoossi gidiya gisho, hinte maade koyidi iyako waassiya wode hintew zaaro immana.
20 Goday hintew meto kathinne un7a haathi immikoka, hinte astamaarey hizape bana qosenna. Shin hinte ayfey hinte astamaariya be7ana.
21 Hinte ushachi woyko haddirsi simmiya wode, guyera hintena, “Ogey haysa; iyara biite” giya qaala hinte si7ana.
22 Biraninne worqan alleeqetida eeqa misileta hinte tunisana. Tuna curqada hinte enta, “Nuupe haakite” yaagidi wora holana.
23 He wode I, hinte biittan zerida kathaas ira bukisana; biittafe doliya kathay daronne muruuta gidana. He gallas hinte mehey dalga denban heemetana.
24 Goshsha booratinne hareti gillan punetida geeshsha harquwa maana.
25 Asi wuriya wode miixati laaletiya gallas deretanne zumata bollafe pulto haathi goggana.
26 He gallas ageena poo7oy awa poo7oda hanana; awa poo7oy kaseysafe laapun kushe darana; laapun gallas poo7uwa mela gidana. He ubbay hananay Goday meqida ba asaa kooliya wodenne I dechin madunxida asaa pathiya wode.
27 Heko, Godaa sunthay suulliya hanquwara, dhumida cuyaa shaarara haaho bessaafe yaana. Iya doonan hanqoy kumis; iya inxarsan miya tami de7ees.
28 Iya peenoy, qoodhe gakanaw kixidi, ubbaba pittidi efiya haatha kixa mela. I, kawotethata dhayo zarzaren harqana; asaa gapata bixaalidi oge balethana.
29 Geeshsha ba7aaley bonchetiya gallas yexeysada, hinte yexana. Godaa zumako, Isra7eele Zaallako biya wode suusul7e punnishe yexiya asay ufayteysada hinte ufaytana.
30 Goday ba yashshiya qaala sissana; ba suulliya hanquwan, tama lacuwan, gotiyan, uushuwaninne shachan ba qesiya qoncisana.
31 Goday ba girsan Asoore daganthana; iya xam7ay enta shocana.
32 Goday enta ba seeriya xam7an enta shociya wode iya asay karaaboranne diithara yexana. Ba qesiya denthidi enta shocana.
33 Benipe doomidi Asoore kawoy xuussa Toofeta geetetiya bessi giigis. He bessay ollanne dalga; qassi daro mithi dooretidi de7iya bessi. Godaa peenoy diinne shaafada goggidi, he tama eethana.