41
1 “Neeni Leewataane geetetiya abba do7aa manxaqon oykanaw,
woyko iya inxarsaa wodoron ancafanaw danda7ay?
2 Iya siidhiya lukada dafo aathanaw danda7ay?
Woyko iya gacuwa wospen lukanaw danda7ay?
3 I nena, ‘Hayyana tana aggarki’ yaagidi woossii?
Woyko new mal7o qaala odii?
4 Ne iya merinaw aylle oothada haarana mela,
I new ero gidi caaqanee?
5 Asi kafo loohiseysada ne iya loohisanaw danda7ay?
Woyko iya qachada ne macca naytara kaa7ana mela oothanee?
6 Molo zal7anchoti iya gatiya bolla palamona?
Woyko iya qanxerethidi bayzoona?
7 Neeni iya galbaa tooran,
woyko iya huuphiya mashshan caddanaw danda7ay?
8 Ane iya ne kushen bocha;
ne iyara butetida butiya dogaka;
nam7antho iyara butetanaw qopaka.
9 He do7aa oykanaw paacey mela waaye;
hari attoshin iya be7ida ubbay yashshan kokorees.
10 I zin7ida bessaafe iya denthanaw oonika xaalenna;
yaatin, ta sinthan eqanaw danda7ey oonee?
11 Taani iyaw zaarana mela koyro taw tal7iday oonee?
Salope garsan de7iyaba ubbay tabaa.
12 “Taani Leewataane tohotaba, iya gita wolqaabanne
lo77iya iya asatethaba qoncisonna aggike.
13 Iya galbaa qaaranaw danda7ey oonee?
Iya gacuwa pooqidi bixaala barsanay oonee?
14 Yashshiya achay de7iya
iya gacuwa pooqanaw danda7ey oonee?
15 Iya zoko galbay issoy issuwa bolla dooretidi;
shuchada minnida gondalle daanees.
16 Enti issoy issuwas daro matatida gisho,
enta giddora hari attoshin carkoy kanthanaw danda7enna.
17 Issoy issuwara gahetidi de7iya gisho,
enta aybika shaakenna.
18 I hadhishiya wode poo7oy pol7u gees;
iya ayfeti wonta xalqeda caddees.
19 Iya doonape tama lacoy keyees;
pinxiya tami bentees.
20 Iya siidhiyape cuyay,
tama bolla de7iya otope keya pento mela.
21 Iya siidhera keya shempoy kenchikelo bonqisees;
tama lacoy iya doonape keyees.
22 Iya morgiyan wolqay de7iya gisho,
I daro yashshees.
23 Iya ashoy issife oyketidi de7iya gisho,
iya asatethay biratada minnees.
24 Iya wozanay shuchada mino;
gaacha woxa mela mino.
25 I dendiya wode minoti yayyoosona;
dagammidi baqatoosona.
26 Iya gakiya mashshay aykoka oothenna;
toori woyko dongey woyko mashshi iya qohenna.
27 I birata xinqa maatada,
naase birata wooqida mithada mentherethees.
28 Dongey iya betisenna;
yambarsha shuchi iyaw suulla mela.
29 Gumba xam7i iyaw xinqo mela;
toora xongiya wode qelqisidi miicees.
30 Iya uluwa bolla de7iya galbay meqida kun7a mela qara;
urqara I biya wode marasha mela biitta phalqees.
31 Abbaa pentida haatha mela tumbul tumbul oothees;
xaaron pentiya zayte mela shiri shiri yeggees.
32 Iya biya ogey poo7ees;
abba haatha goponto laammees.
33 I yashshi eronna gisho,
biitta bolla iya mela medhetethi hari baawa.
34 I daro gita medhetethata ubbaa kadhees;
do7a ubbaas I kawo” yaagis.