17
Mika Eeqata
Derey dariya Efreema biittan Mika geetetiya issi addey de7ees. Issi gallas Miiki ba aayiw, “Neepe asi tammanne issi kilo giraame bira santime kaysin neeni he kaysida addiya baaddishin ta si7as. He miishey ta matan de7ees; taani ekas” yaagis.
Iya aayiya, “Ta na7aw, nena Godi anjo” yaagasu. Na7ay tammanne issi kilo giraame bira santime aayes zaaris. Iya aayiya, “Baadethay ta na7aa gakonna mela taani ha miishiya Godaas dummayana. Biraa sheeshidi, mithafe oosetida eeqa misiliya tiyanaw go7etana; bira ta new zaarana” yaagasu.
Na7ay miishiya ba aayes zaarin, iya he birape nam7u xeetu bira santime ekada, mithi massidi, bira sheeshi tiyidi, eeqa misile medhiya, issi hiillas immasu. I oothida misiley Mika son uttis.
Mikas eeqa goyinniya keethi de7ees. I efuudenne soo giddo eeqa misileta giigisidi, he keethan ba naytape issuwa kahine oothidi shuumis. He wode Isra7eele biittan kawoy baawa; asi ubbay baw lo77o daanidaba oothees.
He wode Yihuda biittan Beeteleme kataman Leewe koche gidida issi na7atethay de7ees. Ha addey baw de7iya bessi koyanaw Beeteleme katamaape dendidi derey dariya Efreema biittan de7iya Mika soo gakis. Miki, “Awupe yadii?” yaagidi oychis.
Addey, “Taani Yihuda biitta Beeteleme katamaape yas; taani Leewe koche. Ha77i taani de7iya bessi koyayis” yaagidi zaaris.
10 Miiki iyako, “Taara de7a; taw aawanne kahine gida. Taani new laythan laythan tammu bira santime, kumetha afilanne miyaba immana” yaagis. 11 Na7atetha Leewey Mikara issife daanaw gelis; Mikas yelida na7ada hanis. 12 Miiki iya ba kahine oothidi shuumin iya son de7is. 13 Miiki, “Issi Leewey taw kahine gidida gisho Goday tabaa loythanaysa erayis” yaagis.