4
Yoonasa Yilonne Godaa Maarota
1 Shin hessi Yoonasa daro ufaysibeenna. Hessa gisho, I yilotis.
2 Godaako, “Abeeti Godaw taani koyro ta biittan de7ashe gidaysi haysa gidennee? Taani ne sinthafe betada Tarsesa baanaw ellesiday haysasa. Neeni qadheynne maaroti kumida Xoossi gideysa, hanqos ellesonaysanne wuronna siiqon kumidaysa, qassi ehana gida iitabaka qadhetada aggiya Xoossi gideysa taani kaseka erayis.
3 Ha7i Abeeti Godaw, hayyana tana wodha; de7ope taw hayqoy lo77o” yaagidi woossis.
4 Goday iyako, “Neeni haysatho shenetanaw bessii?” yaagis.
5 Hessafe guye, Yoonasi katamaape gaxa keyidi doloha baggan uttis. Hessan baw shaqara shaqaridi I kuyan uttidi katama bolla gakanaw de7iyaba ba7anaw naagees.
6 Awa suulape Yoonasa ashshana mela Goday issi gose dolisis. He gose haythay Yoonasa huuphe bolla baggara kuya gidana mela oothis. Yoonasi he gose gaason daro ufaytis.
7 Shin wontetha gallas wonta guura Xoossay guxune giigisis. He guxuniya gosey melana gakanaw masu.
8 Away keyiya wode Xoossay doloha baggafe misha carko yeddis. Yoonasi labbanana gakanaw away Yoonasa huuphiya xuuggis. Yaatin I, “De7ope taw hayqoy lo77o” yaagidi hayqos woossis.
9 Xoossay Yoonasako, “Neeni ha gose gisho yilotanaw bessii?” yaagis.
Yoonasi, “Ee bessees; ubbaraka hayqana gakanaw yilotanaw taw bessees” yaagis.
10 Yaatin Xoossay Yoonasako, “Zine dolada hachi melida gosees, ne daaburonaaris, ne dichonaris haysa mela qadhetadasa.
11 Shin ushachinne haddirsi shaakidi eronna xeetanne laatamu mukulu asinne daro mehey de7iya ha gita katamaa Nanawes taani qadhetanaw bessennee?” yaagis.