14
Yordaanosepe Wuloha Bagga Biittata
1 Kahiney Alaazari, Nawe na7ay Iyyasuynne Isra7eele soo asaa halaqati, Kanaane biitta enta kochan kochan shaakin, Isra7eele asaa gakida biittay haysafe kaallidi de7eysa.
2 Goday Muse kiitidaysada laata biittay uddufunanne bagga kochaas saaman shaaketis.
3 Musey kase nam7anne bagga kochaas Yordaanosepe doloha baggan de7iya biitta immis, shin Leewe kochaas enta giddon laata biitta immibeenna.
4 Yoosefa nayti Minaaseynne Efreemey nam7u koche gididosona. Leewe kochaas duussa katamatanne mehe heemmiya biitta immisipe attishin, laata biitta immibeenna.
5 Goday Muse kiitidaysada Isra7eele asay biitta shaaketidi ekidosona.
Kebrooney Kaalebas Imetis
6 Issi gallas Yihuda asay Iyyasuko Galgala yidosona. Entafe issoy, Qeneza kochay, Yoofona na7ay Kaalebi Iyyasuko, “Nuuni Qaades-Barnen de7iya wode Goday nabiya Muse baggara nebaanne tabaa odidaysa eraasa.
7 Godaa aylley Musey ha biitta wochana mela Qaades-Barnefe tana kiittiya wode taw laythi oytama. He wode taani ammanthiya oda Muses ehas.
8 Taara bida asati asaa wozanaa yashshan til7isidosona, shin taani Godaa, Xoossaa polo kaallas.
9 He gallas Musey, ‘Neeni, Godaa, Xoossaa polo kaallida gisho, ne tohoy yedhida biittay newunne ne kochaas merinaa laata biitta gidana’ gidi taw caaqis.
10 Iyyasu, ane qopa; Goday hessa Muses odi simmin hachi oytamanne ichashu laythi gidis. Isra7eele asay mela biittan simeretiya wode ubban hachi gathanaw Goday tana paxa wothis. Ha77i taw laythi hospun tammanne ichasha gidis.
11 Taw he wode de7iya minotethay hachika de7ees. Oletanaw, keyanawunne gelanaw taw ha77ika wolqinne xaalatethi de7ees.
12 He wode Goday taw immana gidi caaqida he derey dariya biitta taw imma. He biittan Anaaqeti de7eysanne enta katamati gitanne gimbetida katama gideysa he wode ne si7adasa. Gidikoka Goday gidaysada I taara gidiko, enta he biittafe taani gooddana” yaagis.
13 Iyyasuy Yoofona na7a Kaaleba anjidi, Kebroona iyaw laata oothi immis.
14 I Godaa, Isra7eele Xoossaa polo kaallida gisho, Kebroona hachi gakanaw Qeneza kocha Yoofona na7aa Kaaleba kochaas laata biitta gidis.
15 Kase Kebroona sunthay Qiriyaat-Arba geetetees. Arbi, Anaaqeta giddon eretida gita ase.
Hessafe guye, biittay olape shempis.