7
Akaana Nagara
1 Isra7eele asay digetidabaa bochidi, Godaas kiitetonna ixidosona. Yihuda koche gidida Karma na7ay, Zebda na7aa na7ay, Zaara na7ay Akaani, digetidabatape ekidi Isra7eele bolla Godaa hanquwa denthis.
2 Isra7eele asay Iyaarko matan dunkaanidi de7ishin, Iyyasuy Beet-Aweena matan Beetelepe doloha baggan de7iya Gayee katamanne iya heera xomoosidi yaana mela guutha asata kiittis. Kiitetida asati bidi, Gayee katamaa xomoosidosona.
3 Enti Iyyasuko simmi yidi, “Gayee katamaa olanaw asa ubbay baanaw koshshenna; nam7u woyko heedzu mukulu olanchoti biiko gidana. Yan guutha asi de7iya gisho, asa ubbay daaburanaw bessena” yaagidosona.
4 Yaatin, heedzu mukulu gidiya asati olanaw Gayee katamaa bidosona. Shin Isra7eeleti Gayee katamaa asaa sinthafe baqatidosona.
5 Gaye katamaa asay Isra7eele asaape hastamanne usupun asaa wodhidi, katamaa dirsaa pengiyafe doomidi, Shebarime gakanaw Isra7eele asaa wodhishe goodidosona. Isra7eele asaa wozanay til7idi, haathe gidis.
6 Yaanin, Iyyasuynne Isra7eele cimati azzanidi, banta ma7uwa daakidosona. Godaa taabotiya sinthan omarsi gakanaw gufannidosona. Banta huuphen bido qolidosona.
7 Yaatin, Iyyasuy, “Hay7i Godaa Xoossaw, Yordaanose shaafa pinthada ne nuna ehiday Amooretas nuna aatha immanaasee? Yordaanosepe hefinthan de7idaako nuus lo77oshin.
8 Abeeti Godaw, Isra7eele asay xoonetidi, banta morketa sinthafe baqatiko, ta woygo?
9 Kanaanetinne ha biittan de7iya asa ubbay, hessa si7idi, nuna teqidi, biittafe dhaysana. Yaatin, ne gita sunthaa gisho ne oothanay aybee?” yaagis.
10 Goday Iyyasuko, “Ayis gufannadii? Denda eqa.
11 Isra7eele asay qohidosona; ta entana kiitida kiita naagonna ixidi, caaquwa menthidosona. Enti digetidabaape ekidosona; kaysotidosona; wordotidosona; qassi he miishiya banta miishiyara walakidosona.
12 Hessa gisho, Isra7eele asay banta morketa sinthan eqanaw danda7ibookona. Enti dhayanaw bessiya gisho, banta morketa sinthafe guye simmidi baqatidosona. Hinte giddofe dhayanaw bessiyaba hinte dhaysona ixiko, hizape ta hintera gidike.”
13 Bada asaa geeshsha. Goday, Isra7eele Xoossay, “Hinte ekanaw bessonnaba ekida gisho, wontos hintenatethaa geeshshite” yaagees gada oda. Isra7eele asaw, hessa hinte giddofe diggona ixiko, hinte morketa sinthan eqanaw danda7eketa.
14 Wonto wonta, hinte zariyan zariyan shiiqite. Goday shaakiya zarey ba kochan kochan shiiqo. Goday shaakiya kochay ba soo asan asan shiiqo; qassi Goday shaakiya soo asay, issoy issoy baw shiiqo.
15 Digetidabaa ekida uray Godaa caaquwa menthidaynne Isra7eele asaa qohiday iya gidiya gisho, inne iyaw de7iyaba ubbay taman xuugeto.
16 Iyyasuy wontetha gallas guura dendidi, kochan kochan Isra7eele asaa shiishin, Goday Yihuda kochay bala gideysa bessis.
17 Iyyasuy Yihuda kochaa shiishin, Goday Zaraha kochay bala gideysa bessis. Zaraha kochaa shiishin, Goday Zabida soo asay bala gideysa bessis.
18 Zabida soo asay issoy issoy baw shiiqin, wursethan Goday Zabida na7a na7aa, Karma na7aa Akaani bala gideysa qoncisis.
19 Iyyasuy Akaanako, “Ta na7aw, Godaa, Isra7eele Xoossaa boncha; ane ne oothidaba taw qosonna oda” yaagis.
20 Akaani zaaridi, “Ee tuma, taani Godaa Isra7eele Xoossaa naaqas. Taani oothiday haysa;
21 Nuuni di77idi ekida miishiya giddofe issi lo77o Sana7oora biitta kaaba, nam7u kilo gidiya birata biranne bagga kilo gidiya worqa be7ada amottas; ekas. Yaatada ta dunkaaniya giddon biitta bookada bira garsara wothada moogas.”
22 Yaatin, Iyyasuy ase kiittis. Enti woxi bidi dunkaaniya giddon bira garsara wothidi moogida miisheta demmidosona.
23 Kiitetidi bida asati he miisheta dunkaaniyape Iyyasukonne Isra7eele asa ubbaako ehidi, Godaa sinthan wothidosona.
24 Yaatin Iyyasuynne Isra7eele asa ubbay, Akaana, bira, kaaba, worqaa, iya adde naytanne iya macca nayta, iya mehiya, iya hareta, iya dorsata, iya dunkaaniyanne iyaw de7iyaba ubbaa Meto Zangaara geetetiya bessa efidosona.
25 Iyyasuy Akaanako, “Ha metuwa nu bolla ayis ehadii? Goday hachi ne bolla meto ehana” yaagis.
Yaatin Isra7eele asa ubbay, Akaananne iya soo asaa shuchan caddi wodhidi, iyaw de7iyaba ubbaara woli gathidi taman xuuggidosona.
26 Enti Akaana bolla hachi gakanaw bentiya daro shuchi keelidosona. Yaatin, Goday ba eexiya hanquwafe simmis. Hachi gakanaw he bessay Meto Zangaara geetetidi xeegetees.