19
Eeliyaasi Siina Zuma Bolla
1 Eeliyaasi oothidaba ubbaanne Ba7aale nabeta ubbaa mashshan wodhidaysa Akaabi Elzabeelis odis.
2 Elzabeela, “Neeni he nabeta bolla oothidaysada wonto hannoode taani ne bolla oothonna ixiko, xoossati tana pirdo” yaagada Eeliyaasako kiittasu.
3 Eeliyaasi ba shempuwas yayyidi, ba aylliya ekidi, Yihuda biittan de7iya Barsaabe bis.
4 Issi gallasa oge mela biittan hemetis. I hemethaa aggidi issi sankara kuya garsan uttidi, “Abeeti Godaw, taw gidana; taani ta mayzatape aadhidike; ta shempuwa eka” yaagidi hayqo woossis.
5 Hessafe guye, sankara kuya garsan zaqullidi dhiskis. I dhiskidashin, Heko, issi kiitanchoy iya bochidi, “Denda; ma” yaagis.
6 I dendidi xeelliya wode, Heko, shucha mishan uuketidi, kaxida uythinne oto haathi iya huupheson be7is. I midi uyidaape guye simmidi dhiskis.
7 Godaa kiitanchoy nam7antho yidi, “Eeliyaasa, neeni baana ogey daro adusse gidiya gisho, dendada ma” yaagis.
8 Eeliyaasi dendidi mis, uyis. He I mida kathaa wolqan Xoossa Zumaa Koreeba gakanaw oytamu gallasinne oytamu qamma hemetis.
9 I yaa gakidi, gongolo giddo gelidi aqis.
Goday, “Eeliyaasa, haysan ay oothay?” giya Xoossa qaalay iyako yis.
10 Eeliyaasi, “Ubbaafe Wolqaama Godaa Xoossaas taani daro mishetas. Isra7eele asay neera caaqida caaquwa menthis; ne yarsho bessa laallidosona; ne nabeta mashshan wodhidosona. Taani tarka attas; ha77i enti ta shempuwa wodhanaw koyoosona” yaagis.
11 Goday, “Haysafe keyada deriya huuphen ta sinthan eqa” yaagis. Eeliyaasi eqidashin, Heko, Goday iya matara aadhis. He wode wolqaama carkoy zumaa phalqerethis; zaallata tincherethis; shin Goday he carkuwa giddon baawa. Carkuwafe guye biitti qaaxis; shin Goday he biitta qaaxuwan baawa.
12 Biitta qaaxuwape guye tami keyis; shin Goday tama giddon baawa. Tamape guye kalkashi si7etis.
13 Eeliyaasi he kalkashaa si7ida wode ba som7uwa afilan kammidi, kare keyidi gongoluwa pengen eqis.
Heko, issi girsi Eeliyaasako, “Eeliyaasa, haysan ay oothay?” yaagis.
14 Eeliyaasi, “Ubbaafe Wolqaama Godaa Xoossaas taani mishetas. Isra7eele asay neera caaqida caaquwa menthidosona; ne yarsho bessa laallidosona; ne nabeta mashshan wodhidosona. Taani tarka attas; enti ta shempuwa ekanaw koyoosona” yaagis.
15 Goday iyako, “Neeni yida ogiyara guye simmada Damasqo mela biitta ba. Neeni yaa gakiya wode Azaheela, Soore bolla kawo oothada tiya.
16 Namisa na7aa, Iyyu Isra7eele bolla kawo oothada tiya. Ne bessan nabe oothada Abeel-Mahoola addiya Safaaxa na7aa Elsa tiya.
17 Azaheela mashshafe kessi ekiya ubbaa Iyyuy wodhana; Iyyu mashshafe kessi ekiya ubbaa Elsi wodhana.
18 Shin Ba7aale eeqa goyinnona woyko banta doonan Ba7aale eeqa yeeronna 7,000 asaa taani Isra7eelen taw ashshana” yaagis.
Eeliyaasi Elsa Xeegis
19 Eeliyaasi he bessaafe dendidi bishe Safaaxa na7ay Elsi tammanne nam7u waaxa booran gade goyishin demmis; Elsi tammanne nam7antho waaxan goyees. Eeliyaasi iya matara aadhishe ba afila iya bolla yeggis.
20 Elsi boorata essidi, Eeliyaasa geedo woxi bidi, “Taani ta aawanne ta aayiw yeera sarothada yaana; yaape simmada nena kaallana” yaagis.
Eeliyaasi, “Ero ba; ta nena diggike” yaagis.
21 Hessa gisho, Elsi guye simmidi waatha boorata shukis; boora miishiya qeridi ashuwa kathidi, asaas aathin asay midosona. Hessafe guye, dendi bidi, Eeliyaasas kiitetis.